តាកែវៈ សៀវភៅសត្វស្លាបនៅតំបន់ការពារទេសភាពបឹងព្រែកល្ពៅក្នុងខេត្តតាកែវ ដែលមានរូបភាពសត្វស្លាប និងព័ត៌មាននៃសត្វស្លាប ៨៦ ប្រភេទត្រូវបានចងក្រង និងបោះពុម្ពផ្សាយទៅដល់ប្រជាពលរដ្ឋជាពិសេសកុមារា-កុមារី ដើម្បីស្វែងយល់ និងជួយចូលរួមការពារ និងអភិរក្សសត្វស្លាបទាំងនេះ។
អង្គការជីវិតសត្វស្លាបអន្តរជាតិប្រចាំកម្ពុជាបានឱ្យដឹងថា សៀវភៅសត្វស្លាបតំបន់ការពារទេសភាពបឹងព្រែកល្ពៅនេះគឺជាស្នាដៃមួយដែលអង្គការជីវិតធម្មជាតិនៅកម្ពុជាបានចងក្រងឡើងដោយបានសហការជាមួយមន្ទីរបរិស្ថានខេត្តតាកែវ។
ការផលិតសៀវភៅនេះឡើងក្នុងគោលបំណងផ្សព្វផ្សាយអំពីប្រភេទសត្វស្លាបដែលមានវត្តមាននៅក្នុងតំបន់ការពារទេសភាពបឹងព្រែកល្ពៅដល់សាធារណជនទូទៅ ជាពិសេសសិស្សានុសិស្សនៅមូលដ្ឋានជុំវិញតំបន់ការពារនេះ អ្នកសិក្សាស្រាវជ្រាវ ភ្ញៀវទេសចរ និងអ្នកធ្វើសេចក្តីសម្រេចចិត្ត។
លោក ឆយ ម៉ុនលី ប្រធានមន្ទីរបរិស្ថានខេត្តតាកែវបានប្រាប់ភ្នំពេញប៉ុស្តិ៍នៅថ្ងៃទី ២ ខែឧសភាថា សៀវភៅនេះជាស្នាដៃអ្នកថតរូបដែលជាឧទ្យានុរក្ស និងអ្នកចងក្រងដែលជាអ្នកស្រាវជ្រាវវ័យក្មេងជនជាតិខ្មែរ តែវាមានសារ:សំខាន់ណាស់សម្រាប់អ្នកសិក្សាស្រាវជ្រាវ និងចូលរួមបង្កើនចំណេះដឹងអំពីសត្វស្លាបទឹកដល់អ្នកអានគ្រប់វ័យ។
លោកមានប្រសាសន៍ថា៖ «សៀវភៅនេះពិតជាមានសារៈសំខាន់ណាស់សម្រាប់ក្មេងៗពីជំនាន់នេះរហូតដល់ជំនាន់ក្រោយៗទៀតបានស្គាល់សត្វ ធនធានធម្មជាតិ ជីវចម្រុះ និងជាការអប់រំពួកគាត់ឱ្យបានស្គាល់ និងចេះស្រឡាញ់សត្វក្នុងប្រទេសយើង និងជាការជួយឱ្យពួកគាត់ចេះថែរក្សា ការពារសត្វស្លាប»។
សៀវភៅមានរក្សាទុកក្នុងបណ្ណាល័យក្នុងមន្ទីរបរិស្ថានខេត្តតាកែវ ចែកតាមសាលារៀន និងវត្តអារាមផងដែរ សម្រាប់ប្រជាពលរដ្ឋ ពិសេសសិស្សានុសិស្សក្នុងការសិក្សាស្វែងយល់ពីសត្វស្លាបទាំងនេះ។
លោក ឆយ ម៉ុនលី បានបន្ថែមថា ប្រជាពលរដ្ឋនៅជុំវិញតំបន់ការពារទេសភាពបឹងព្រែកល្ពៅនេះ មានការយល់ដឹងច្រើន បើប្រៀបធៀបជាមួយនឹងប៉ុន្មានឆ្នាំកន្លងទៅទាក់ទងនឹងការការពារ ការស្រឡាញ់ និងអភិរក្សសត្វស្លាបនៅជិតតំបន់ដែលពួកគាត់រស់នៅ។
លោកបានប្រាប់ថា៖ «យើងឧស្សាហ៍មានកម្មវិធីជួបជុំសិស្ស ប្រជាសហគមន៍ និងអ្នកដែលទទួលអាស្រ័យផលនៅក្នុងតំបន់នោះដើម្បីធ្វើការអប់រំ និងណែនាំពួកគាត់ពីសារៈសំខាន់របស់សត្វស្លាបទាំងនេះ ដែលធ្វើឱ្យពួកគាត់មានការកែប្រែដែលកាលពី ៣-៤ ឆ្នាំមុន នៅពេលដែលពួកគាត់មករកត្រី គឺពួកគាត់ឆ្លៀតលួចបរបាញ់សត្វ ឬលួចពងសត្វផងដែរ ប៉ុន្តែពេលនេះគឺមិនមានទៀតទេ»។
ក្នុងសៀវភៅនេះ បណ្តុំដោយរូបភាព ព័ត៌មានសំខាន់ៗទាក់ទងនឹងរបាយប្រជាសាស្ត្រ ពេលវេលាដែលមានវត្តមានព័ត៌មានមូលដ្ឋានក្នុងការធ្វើអត្តសញ្ញាណ និងចំណាត់ថ្នាក់សម្រាប់ការអភិរក្សនៃប្រភេទសត្វស្លាបនីមួយៗដូចជាប្រភេទសម្បូរបង្គួរ ប្រភេទជិតរងការគំរាមកំហែង ប្រភេទងាយរងគ្រោះ ប្រភេទជិតផុតពូជ និងប្រភេទជិតផុតពូជបំផុត។
អង្គការជីវិតសត្វស្លាបអន្តរជាតិប្រចាំកម្ពុជាបានបញ្ជាក់ផងដែរថា សៀវភៅនេះមានរូបភាពសត្វស្លាប និងព័ត៌មាននៃសត្វស្លាបនេះត្រូវបានអង្កេតតាមដានដោយក្រុមការងារអង្គការជីវិតធម្មជាតិនៅកម្ពុជាដោយសហការជាមួយមន្ត្រីឧទ្យានុរក្សប្រចាំនៅក្នុងតំបន់ការពារទេសភាពបឹងព្រែកល្ពៅអស់រយៈពេលជាង ១៥ ឆ្នាំមកហើយ។
នាយករងតំបន់ការពារទេសភាពបឹងព្រែកល្ពៅ លោក លឹម វ៉ាត ថ្លែងថា សៀវភៅនេះមានសារៈសំខាន់ខ្លាំងណាស់ក្នុងការលើកស្ទួយអំពីតម្លៃជីវចម្រុះក្នុងតំបន់ដីសើម។
លោកថា៖ «វានឹងជំរុញឱ្យមានការចូលរួមយ៉ាងសកម្មថែមទៀតក្នុងការថែរក្សា ការពារ និងអភិរក្សធនធានធម្មជាតិ ជាពិសេសវត្តមានរបស់សត្វស្លាបជាច្រើនប្រភេទនៅតំបន់ដីសើមបឹងព្រែកល្ពៅនេះ»។
ចំណែក លោក ប៊ូ វរសក្ស នាយកកម្មវិធីអង្គការជីវិតសត្វស្លាបអន្តរជាតិប្រចាំកម្ពុជា ក៏បានឱ្យដឹងដែរថា សៀវភៅនេះជាមគ្គុទ្ទេសក៍សម្រាប់អ្នកទស្សនាសត្វស្លាប និងជាឯកសារអង្កេតតាមដានជីវចម្រុះដ៏សំខាន់មួយដែលអាចប្រើប្រាស់គាំទ្រដល់ការរៀបចំផែនការគ្រប់គ្រង និងអភិរក្សនាពេលអនាគត។
គួរបញ្ជាក់ថា រូបថតសត្វស្លាបទាំង ៨៦ ប្រភេទនេះ គឺត្រូវបានថតដោយផ្ទាល់នៅក្នុងតំបន់ការពារទេសភាពបឹងព្រែកល្ពៅនេះ៕