The Phnom Penh Post Search

Search form




Logo of Phnom Penh Post newspaper Phnom Penh Post - បុរស​កាប់​ស្ត្រី​ម្នាក់​ស្លាប់ ព្រោះតែ​ខឹង​និយាយដើម​ខ្លួន ត្រូវ​បញ្ជូន​ទៅ​ស្នងការដ្ឋាន​នគរបាល​ខេត្ត

បុរស​កាប់​ស្ត្រី​ម្នាក់​ស្លាប់ ព្រោះតែ​ខឹង​និយាយដើម​ខ្លួន ត្រូវ​បញ្ជូន​ទៅ​ស្នងការដ្ឋាន​នគរបាល​ខេត្ត

Content image - Phnom Penh Post
បុរស​កាប់​ស្ត្រី​ម្នាក់​ស្លាប់ ព្រោះតែ​ខឹង​និយាយដើម​ខ្លួន ត្រូវ​បញ្ជូន​ទៅ​ស្នងការដ្ឋាន​នគរបាល​ខេត្ត។ រូបថត ប៉ូលិស

បុរស​កាប់​ស្ត្រី​ម្នាក់​ស្លាប់ ព្រោះតែ​ខឹង​និយាយដើម​ខ្លួន ត្រូវ​បញ្ជូន​ទៅ​ស្នងការដ្ឋាន​នគរបាល​ខេត្ត

បាត់ដំបងៈ នគរបាល​ស្រុក​បវេល​នៅ​ថ្ងៃទី​ ២​ ឧសភា បាន​បញ្ជូន​បុរស​ម្នាក់​ទៅ​ស្នងការដ្ឋាន​នគរបាល​ខេត្ត បន្ទាប់ពី​ឃាត់ខ្លួន​បាន​ ១​ ថ្ងៃ ករណី​កាប់​ស្ត្រី​ម្នាក់​នឹង​កាំបិត​ខ្វែវ​បណ្តាល​ឱ្យស្លាប់​ភ្លាមៗ នៅ​ភូមិ​យុត្តិធម៌ ឃុំ​បឹងប្រាំ​ដោយសារ​តែ​ខឹង​ស្ត្រី​រងគ្រោះ​និយាយ​អាក្រក់​ពី​គ្រួសារ​ខ្លួន​។

លោក ម៉ី គឹមសាន្ត អធិការរង​ទទួល​ផែន​ការងារ​នគរបាល​ព្រហ្មទណ្ឌ​នៃ​អធិការដ្ឋាន​នគរបាល​ស្រុក​បវេល​ឱ្យដឹង​នៅ​ថ្ងៃទី​ ២ ​ឧសភា​ថា បុរស​សង្ស័យ​ឈ្មោះ ​សឿន សុខណា អាយុ ៣១ ​ឆ្នាំ​ត្រូវបាន​ចាប់​បញ្ជូន​ទៅ​ស្នងការដ្ឋាន​នគរបាល​ខេត្ត​។ ស្ត្រី​រងគ្រោះ​ដែល​ត្រូវបាន​ជនសង្ស័យ​កាប់​ស្លាប់​កាលពី​ថ្ងៃទី ​១ ​ឧសភា​នោះ ឈ្មោះ​ ឡាយ គី អាយុ​ ៥៣​ឆ្នាំ​។ លោក​ថ្លែងថា​៖ «​ជនសង្ស័យ​គឺ​បាន​បង្ក​បទល្មើស​ជាក់ស្តែង ហើយ​នគរបាល​ប៉ុស្តិ៍​យើង​បាន​ចាប់គាត់​បាន​ភ្លាមៗ​»​។

លោក ប្រាប់​តាម​ចម្លើយ​របស់​ជនសង្ស័យ​ថា ផ្ទះ​របស់​ស្ត្រី​រងគ្រោះ និង​ផ្ទះ​របស់​ជនសង្ស័យ នៅ​ម្ខាង​ផ្លូវ​ម្នាក់​ដោយ​ស្ត្រី​រងគ្រោះ​រស់នៅ​ក្នុង​ភូមិ​យុត្តិធម៌ ឃុំ​បឹងប្រាំ រីឯ​ផ្ទះ​ជនល្មើស​រស់នៅ​ភូមិ​អូរឫស្សី ឃុំ​បឹងប្រាំ ស្រុក​បវេល​។ ជនសង្ស័យ​ថា ស្ត្រី​រងគ្រោះ​បាន​ដើរ​និយាយប្រាប់​អ្នកភូមិ​ថា ជនសង្ស័យ​នៅតែ​ផ្ទះ​មិន​ធ្វើការងារ​អី​ទេ​។ លោក​បានឱ្យដឹង​បន្តថា ស្រាប់តែ​នៅវេលា​ម៉ោង​ ៧ ​កន្លះ​ព្រឹក​ថ្ងៃទី ​១ ខែឧសភា​ជនសង្ស័យ​បាន​កាន់​កាំបិត​ខ្វែវ​ទៅ​កាប់​ស្ត្រី​រងគ្រោះ​ពីក្រោយ​ចំ​កញ្ចឹងក ស្មា​ខាងស្តាំ គល់​ក​ខាងស្តាំ និង​កាប់​ចំ​ខ្នង​បណ្តាល​ឱ្យ​ស្លាប់​នៅ​នឹង​ផ្ទះ​ភ្លាមៗ​។

បើតាម​លោក​ គឹមសាន្ត ក្រោយ​បង្កហេតុ ជនសង្ស័យ​បាន​ដើរ​ត្រឡប់​មកផ្ទះ​វិញ ហើយ​បោះ​កាំបិត​ខ្វែវ​ចូលក្នុង​ស្រះ​ទឹក​នៅក្បែរ​ផ្ទះ ហើយក៏​មិនបាន​រត់គេច​ទៅណា​ដែរ​។ ចំណែក​នៅ​កន្លែង​កើតហេតុ​វិញ បន្ទាប់ពី​អ្នកភូមិ​ឃើញ​ស្ត្រី​រងគ្រោះ​ត្រូវគេ​សម្លាប់​បែបនេះ ក៏​រាយការណ៍​ប្រាប់​នគរបាល​ប៉ុស្តិ៍​ឃុំ​បឹង​ប្រាំ​ឱ្យ​ចុះទៅ​ចាប់ខ្លួន​ដល់ផ្ទះ​របស់​ជនសង្ស័យ​ប្រហែលជា​កន្លះ​ម៉ោង​ក្រោយ​កើតហេតុ​។

លោក គឹម ស៊ីដេត នាយ​នគរបាល​ប៉ុស្តិ៍​ឃុំ​បឹងប្រាំ ប្រាប់​នៅ​ថ្ងៃទី ​២ ​ឧសភា​ថា ករណីនេះ ជនសង្ស័យ​ប្រាប់​ក្រោយ​ចាប់ខ្លួន​ថា រូបគេ​គ្មាន​គំនុំ​អ្វី​ធំដុំ​ជាមួយ​នឹង​ស្ត្រី​រងគ្រោះ​ទេ តែ​គេ​ខឹង​នឹង​ស្ត្រី​រងគ្រោះ ចេះតែ​និយាយ​ពី​ក្រុមគ្រួសារ​របស់គេ​ទៅប្រាប់​អ្នកដទៃ ទើប​គេ​ខឹង និង​បាន​កាប់​ស្ត្រី​រងគ្រោះ​សម្លាប់ចោល​ទៅ​។

លោក​ថា​៖ «​ជនសង្ស័យ​ពេល​វា​ទៅ​ធ្វើការ​នៅ​ប្រទេស​ថៃ វា​ប្រើ​គ្រឿងញៀន ពេល​មកវិញ​ស្មារតី​វា​ដូចជា​មិនសូវ​ល្អ រាង​ភាំងៗ​យ៉ាងម៉េច​ទេ ហើយ​ឪពុកម្តាយ ក៏​មិន​យក​កូន​ទៅ​មណ្ឌល​បន្សាប​គ្រឿងញៀន​ទៀត​។ ប្រហែលជា​ឪពុកម្តាយ​ឃាត់ឃាំង​ឱ្យនៅតែ​ផ្ទះ​ខ្លាំងពេក​ធ្វើឱ្យ​កូន​តប់ប្រមល់​ស្មុគស្មាញ​ក្នុង​ចិត្ត​ក៏​មិនដឹង​»​។

លោក ឈា នី មេឃុំ​បឹងប្រាំ​ឱ្យដឹងថា ឪពុកម្តាយ​របស់​ជនសង្ស័យ​ក៏​ដឹង​ដែរ​ថា កូន​គាត់​មាន​ស្មារតី​មិនល្អ ហើយ​បាន​ទៅ​មណ្ឌល​សុខភាព​ឃុំ សុំ​ថ្នាំ​សរសៃប្រសាទ​យកមក​ឱ្យ​កូន​លេប តែ​ពួកគាត់​មិនបាន​នាំ​កូន​ទៅ​ពេទ្យ​ពិនិត្យ​សុខភាព​ឱ្យបាន​ត្រឹមត្រូវ​ទេ ទុក​រហូតដល់​មាន​បញ្ហា​បែបនេះ​។ «​ខាង​គ្រូពេទ្យ​មណ្ឌល​សុខភាព រាយការណ៍​មក​ខ្ញុំ​ដែរ​ថា គាត់​ឃើញតែ​ម្តាយ​ជនសង្ស័យ​មកសុំ​ថ្នាំ​សរសៃប្រសាទ​ឱ្យ​កូន​លេប តែ​មិនឃើញ​មាន​លិខិតបញ្ជាក់​ពី​គ្រូពេទ្យ​ថា ជនសង្ស័យ មាន​ជំងឺ​សរសៃ​ប្រសាទ​ទេ​។ តាមពិត​បើ​ឪពុកម្តាយ​ព្យាយាម​មើល​កូន​ប្រហែល​មិន​អី​ទេ​»៕

វីដេអូ៖

អត្ថបទគួរចាប់អារម្មណ៍