.jpg)
ខេមបូចា ប្រារព្ធទិវាសេរីភាពសារព័ត៌មាន ក្រោមប្រធានបទរួម «សារព័ត៌មានក្នុងសម្ពាធឌីជីថល» កាលពីម្សិលមិញ។ រូបថត ខេមបូចា
ភ្នំពេញៈ សហភាពសហព័ន្ធអ្នកសារព័ត៌មានកម្ពុជា (ស.ស.ស.ក) និងសមាគមសម្ព័ន្ធអ្នកសារព័ត៌មានកម្ពុជាហៅកាត់ថា (ខេមបូចា) បានចេញសេចក្ដីថ្លែងការណ៍ដោយឡែកពីគ្នា ចូលរួមអបអរសាទរ ទិវាសេរីភាពសារព័ត៌មានពិភពលោកដែលអង្គការយូណេស្កូបានជ្រើសរើសយកប្រធានបទ «សារព័ត៌មានក្នុងសម្ពាធប្រព័ន្ធឌីជីថល» ដោយអង្គភាពទាំង ២ នេះបានសម្ដែងក្ដីបារម្ភពីឥទ្ធិពលបច្ចេកវិទ្យាឌីជីថល ប្រហាក់ប្រហែលគ្នា។
ស.ស.ស.ក បានថ្លែងថា ថ្នាក់ដឹកនាំក្នុងវិស័យព័ត៌មាន និងអ្នកសារព័ត៌មាន គប្បីខិតខំប្រឹងប្រែងប្រកបដោយបញ្ញាញាណ ដើម្បីប្រើប្រាស់បច្ចេកវិទ្យាឌីជីថលដោយភាពច្នៃប្រឌិតក្នុងការបង្កើតបាននូវកាលានុវត្តភាព និងមានសារប្រយោជន៍ដល់សង្គមជាតិ។
ស.ស.ស.ក ថ្លែងថា៖ «យើងមិនអាចគេចចេញពីតម្រូវការបច្ចេកវិទ្យាឌីជីថលបានទេ ក៏ប៉ុន្តែយើងត្រូវចាប់យក និងប្រើប្រាស់ឌីជីថល ដោយវាងវៃ ដើម្បីជាមធ្យោបាយជំរុញការរីកចម្រើននៃជីវភាពសង្គម និងសេដ្ឋកិច្ចជាតិយើង។ (យើង) ទទួលស្គាល់ថា នៅមានបញ្ហាប្រឈមក្នុងវិស័យព័ត៌មានដែលមានរួមទាំង បញ្ហាហិរញ្ញវត្ថុ សុវត្ថិភាពការងារ និងសិទ្ធិទទួលបានព័ត៌មាន»។
ខេមបូចា ដែលមានការចូលរួមពីអង្គការជាតិ និងអន្តរជាតិចំនួន ២២ បានអបអរទិវានេះដែរ ដោយបង្ហាញជំហរសុំឱ្យពង្រីកកិច្ចសហការ និងធ្វើការរួមគ្នាដើម្បីលើកកម្ពស់ការយល់ដឹងជូនប្រជាពលរដ្ឋអំពីអក្ខរកម្មប្រព័ន្ធផ្សព្វផ្សាយ និងប្រព័ន្ធឌីជីថល។
យោងតាមសេចក្ដីថ្លែងការណ៍រួមរបស់ ខេមបូចា បានឱ្យដឹងថា៖ «(ខេមបូចា) ស្នើសុំបើកឱ្យមានការប្រឹក្សាយោបល់ទូលំទូលាយ រួមទាំងការទទួលយកនូវធាតុចូលពីដៃគូពាក់ព័ន្ធទៅលើសេចក្ដីព្រាងច្បាប់ដែលពាក់ព័ន្ធ ដូចជាសេចក្ដីព្រាងច្បាប់ស្ដីពីឧក្រិដ្ឋកម្មតាមប្រព័ន្ធបច្ចេកវិទ្យា សន្តិសុខឌីជីថល និងវិធានគតិយុត្តផ្សេងទៀតដែលអាចនឹងប៉ះពាល់ដល់សិទ្ធិទទួលព័ត៌មាន សេរីភាពសារព័ត៌មាន និងសេរីភាពបញ្ចេញមតិ»។
អង្គភាពអ្នកនាំពាក្យរាជរដ្ឋាភិបាលរួមនឹងក្រសួងបរិស្ថាននៅព្រឹកថ្ងៃទី ២ ខែឧសភា ឆ្នាំ ២០២២ នេះបានបើកកិច្ចប្រជុំមួយផ្សព្វផ្សាយស្ដីពី «ព័ត៌មានជាអំណាច នាយុគសម័យឌីជីថល» ដល់អ្នកនាំពាក្យក្រសួង-ស្ថាប័ន និងរាជធានី-ខេត្ត។
ប្រធានអង្គភាពអ្នកនាំពាក្យរាជរដ្ឋាភិបាលលោក ផៃ ស៊ីផាន បានលើកឡើងថា ការផ្សព្វផ្សាយនេះធ្វើឡើងក្នុងគោលបំណងចែករំលែកនូវទស្សនទាន យន្ដការ និងយុទ្ធសាស្ដ្ររួមដែលជាមូលដ្ឋានគ្រឹះនៃវិស័យព័ត៌មានរបស់រដ្ឋក្នុងទិសដៅកសាងឱ្យបាននូវអភិបាលកិច្ចល្អលើវិស័យព័ត៌មានថ្នាក់ជាតិ និងថ្នាក់ក្រោមជាតិ។
លោកថ្លែងថា៖ «ដើម្បីជំរុញប្រសិទ្ធភាពនៃការផ្សព្វផ្សាយ បំផុសព័ត៌មានឱ្យចូលទៅកៀកប្រជាពលរដ្ឋ ដើម្បីផលប្រយោជន៍នៃមតិសាធារណៈ ហើយនេះក៏ជាកញ្ចក់ឆ្លុះបញ្ចាំងនូវការអនុវត្តគោលនយោបាយកែទម្រង់មុតស្រួច ផ្សារភ្ជាប់ក្នុងវិស័យព័ត៌មាននៅថ្នាក់ជាតិ និងថ្នាក់ក្រោមជាតិផងដែរ»។
នៅក្នុងយុគសម័យឌីជីថល កិច្ចរួមគ្នាកសាងសង្គមព័ត៌មាននៅក្នុងបរិបទឌីជីថល ដែលស្ថិតនៅក្នុងលម្ហ និងឥទ្ធិពលបញ្ញាសិប្បនិម្មិត។ អាស្រ័យហេតុដូចនេះ បរិមាណ និងគុណភាពព័ត៌មានត្រូវតែកសាង និងផ្សព្វផ្សាយនៅលើប្រព័ន្ធឌីជីថល ដែលអាចមានលទ្ធភាពគ្រប់មុខសញ្ញា និងវិស័យរបស់រដ្ឋ។ យោងតាមលោក ផៃ ស៊ីផាន។ លោកថា៖ «ព័ត៌មានទាំងនោះត្រូវរក្សាជាស្វ័យប្រវត្តិ នៅលើប្រព័ន្ធឌីជីថល ដែលជាប្រភពផ្ទៀងផ្ទាត់ព័ត៌មានផ្លូវការ និងព័ត៌មានប្រឌិតក្លែងក្លាយ។ សព្វថ្ងៃនេះ យើងបានរួមគ្នា ឯកភាពគ្នា ក្នុងកិច្ចកសាងនូវព័ត៌មានឱ្យទទួលបានប្រសិទ្ធភាព និងតម្លាភាពដែលជាផលប្រយោជន៍សាធារណៈ»។
លោក មាស សុភ័ណ្ឌ អ្នកនាំពាក្យក្រសួងព័ត៌មានបានថ្លែងឱ្យដឹងផងដែរថា ការប្រារព្ធឡើងនូវទិវាសេរីភាពសារព័ត៌មានពិភពលោកនេះគឺចង់បង្ហាញពីការប្តេជ្ញាចិត្តយ៉ាងមុតមាំរបស់រាជរដ្ឋាភិបាលកម្ពុជាក្នុងការធានាការពារ និងលើកកម្ពស់បន្ថែមទៀតនូវការគោរពនូវសិទ្ធិសេរីភាពសារព័ត៌មាន សិទ្ធិបញ្ចេញមតិ និងសិទ្ធិដទៃទៀតផងដែរដោយអនុលោមតាមច្បាប់សារព័ត៌មានដែលមានស្រាប់៕
