.jpg)
សិស្សប្រឡងជាប់បាក់ឌុបនិទ្ទេសAសរុប ១ ៧៥៣ នាក់ ពេលជួបសំណេះសំណាល ជាមួយលោកនាយករដ្ឋមន្ត្រី ហ៊ុន សែន។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន បានជួបសំណេះសំណាល និងផ្តល់រង្វាន់លើកទឹកចិត្តដល់សិស្សប្រឡងសញ្ញាបត្រទុតិយភូមិ (បាក់ឌុប) ដែលទទួលបាននិទ្ទេស A ក្នុងឆ្នាំសិក្សា ២០២០-២០២១ សរុប ១៧៥៣ នាក់នាព្រឹកថ្ងៃទី ៣ ខែឧសភា នាសាលពិព័រណ៍ OCIC ជ្រោយចង្វារ។
នាឱកាសនោះ លោក ហ៊ុន សែន បានបង្ហាញពីភាពសប្បាយរីករាយដែលបានជួបជាមួយសិស្សនិទ្ទេស A ដែលមកពីគ្រប់រាជធានី-ខេត្តទាំង ២៥។
លោកមានប្រសាសន៍ថា៖ «ខ្ញុំពិតជារីករាយចំពោះចំនួនដ៏ច្រើននេះ ហើយខ្ញុំក៏យកឱកាសនេះអបអរសាទរជាមួយសិស្សនិទ្ទេស A និងអាណាព្យាបាលទាំងអស់ដែលមានកូនក្លាយជាសិស្សឆ្នើម ហើយយើងក៏សោកស្តាយផងដែរចំពោះសិស្សានុសិស្សដែលមិនបានប្រឡងជាប់ តែសង្ឃឹមថា ចៅៗក្មួយៗនឹងបន្តសិក្សានៅឆ្នាំ ២០២២ នេះ ដើម្បីប្រឡងជាថ្មី ឬបន្តចាប់យកជំនាញវិជ្ជាជីវៈនៅតាមសាលាបណ្តុះបណ្តាលបច្ចេកទេសនានា»។
លោកនាយករដ្ឋមន្ត្រីក៏បានលើកឡើងដែរថា ផ្តើមចេញពីការដាក់ចេញគោលនយោបាយអាទិភាពលើវិស័យអប់រំ បានធ្វើឱ្យមានការយកចិត្តទុកដាក់លើការអប់រំពីអាជ្ញាធរគ្រប់លំដាប់ថ្នាក់ទៅលើការសិក្សារបស់សិស្សានុសិស្ស។ លោកក៏បានកោតសរសើរចំពោះ ក្រសួងអប់រំយុវជន និងកីឡា ដែលបានខិតខំសម្របសម្រួលក្នុងការប្រឡងបាក់ឌុបនៅទូទាំងប្រទេស ដែលទទួលបានលទ្ធផលគួរជាទីមោទនភាព។
ឆ្លៀតក្នុងឱកាសនោះដែរ លោក ហ៊ុន សែន ក៏ប្រកាសដាក់សិស្សានុសិស្សនិស្សិតទាំងអស់នៅទូទាំងប្រទេសជាក្រុមអាទិភាពនៃការទទួលវ៉ាក់សាំងផងដែរ បន្ទាប់ពីមន្ត្រីរាជការ គ្រូបង្រៀន បុគ្គលិកសុខាភិបាល ហើយនិងកម្លាំងប្រដាប់អាវុធដែលហៅថា ក្រុមអាទិភាពជួរមុខ។
លោកថា៖ «មុននេះ ខ្ញុំបានប្រកាសត្រឹមតែមុខសញ្ញាពាក់ព័ន្ធជាមួយនឹងមន្ត្រីរាជការគ្រូបង្រៀនទេ ហើយនឹងកម្លាំងប្រដាប់អាវុធដែលហៅថាក្រុមអាទិភាពជួរមុខ។ ឥឡូវដើម្បីធានាសុវត្ថិភាពជូនដល់សិស្សានុសិស្ស កុមារាកុមារីរបស់យើងគឺត្រូវដាក់ចូលក្នុងដំណើរការអាទិភាពនៃការទទួលបានការចាក់វ៉ាក់សាំង»។ ជាមួយគ្នានោះដែរ ប្រមុខរាជរដ្ឋាភិបាលកម្ពុជាក៏បានសម្រេចឱ្យក្រសួងធំៗចំនួន ២ គឺក្រសួងអប់រំ យុវជន និងកីឡា និងក្រសួងសុខាភិបាល ធ្វើការជ្រើសរើសបុគ្គលិកក្របខ័ណ្ឌបន្ថែម ខណៈដែលវិស័យផ្សេងៗទៀត មិនអនុញ្ញាតឱ្យជ្រើសរើសនោះទេ។
លោកនាយករដ្ឋមន្ត្រី ហ៊ុន សែន បានមានប្រសាសន៍ថា៖ «យើងបានផ្តល់អាទិភាពសម្រាប់វិស័យអប់រំ វិស័យសុខាភិបាល ដែលវាមានទំនាក់ទំនងជាមួយគ្នា ហើយមានតែវិស័យ ២ ទេដែលរាជរដ្ឋាភិបាលផ្តល់អាទិភាពឱ្យរើសគ្រូបង្រៀន និងគ្រូពេទ្យបន្ថែមទៀត ដើម្បីគ្រប់គ្រងសភាពការណ៍ ដោយសារមន្ទីរពេទ្យដែលត្រូវពង្រីកមានច្រើន ដែលធ្វើឱ្យតម្រូវការពេទ្យកម្រិតធំ»។
ទាក់ទងនឹងវិស័យផ្សេងៗទៀត លោកនាយករដ្ឋមន្ត្រី ហ៊ុន សែន បានបញ្ជាក់ថា លោកមិនផ្តល់ឱ្យមានការជ្រើសរើសនោះទេ ប៉ុន្តែអាចឱ្យមានការជ្រើសរើសជំនួសបុគ្គលិកណាដែលចូលនិវត្តន៍តែប៉ុណ្ណោះ។
លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានថ្លែងឱ្យដឹងថា ការកើនឡើងនូវសិស្សនិទ្ទេស A នេះ គឺអាស្រ័យដោយការខិតខំរៀនសូត្រ ហើយក្រសួង និងអ្នកពាក់ព័ន្ធបានខិតខំផ្តល់ឱកាស និងការគាំទ្រគ្រប់រូបភាពដើម្បីឱ្យសិស្សបានរៀន។
លោកបានបន្ថែមថា សិស្សនិទ្ទេស A ទាំងនោះ មកពីសាលារៀនចំនួន ៤២១ ក្នុងនោះសាលារដ្ឋចំនួន ៣១១ មានសិស្សនិទ្ទេស A ចំនួន ១ ២៩៦ នាក់ និងសាលាឯកជន ១០៨ មានសិស្សនិទ្ទេស A ចំនួន ៤៦១ នាក់។
លោក ហង់ជួន ណារ៉ុន មានប្រសាសន៍ថា៖ «លទ្ធផលជាទីមោទនៈដែលយើងទទួលបានរហូតមកដល់សព្វថ្ងៃនេះគឺដោយសារមានការដឹកនាំប្រកបដោយគតិបណ្ឌិតរបស់សម្តេចតេជោ នាយករដ្ឋមន្ត្រី ដែលបានដឹកនាំប្រទេសកម្ពុជាឱ្យមានការបង្រួបបង្រួម សុខសន្តិភាព និងមានការអភិវឌ្ឍគ្រប់វិស័យ»។
គួរបញ្ជាក់ដែរថា សិស្សនិទ្ទេស A ទាំងនោះមាន៖ រាជធានីភ្នំពេញចំនួន ៥៦៥ នាក់, ខេត្តសៀមរាប ១៥៣ នាក់, កណ្តាល ១២៧ នាក់, បាត់ដំបង ១២៣ នាក់, កំពង់ចាម ១១៨ នាក់, បន្ទាយមានជ័យ ៩៩ នាក់, តាកែវ ៩៩ នាក់, ព្រៃវែង ៨៧ នាក់, កំពត ៧៥ នាក់, ត្បូងឃ្មុំ ៥៤ នាក់, ក្រចេះ ៤៥ នាក់, កំពង់ធំ ៤១ នាក់, កំពង់ស្ពឺ ៣៣ នាក់, ពោធិ៍សាត់ ២៨ នាក់, ស្វាយរៀង ២៦ នាក់, កំពង់ឆ្នាំង ២២ នាក់, ព្រះសីហនុ ២០ នាក់, រតនគិរី ៩ នាក់, ស្ទឹងត្រែង ៦ នាក់, ប៉ៃលិន ៦ នាក់, ឧត្តរមានជ័យ ៥ នាក់, កោះកុង ៤ នាក់, ព្រះវិហារ ៤ នាក់, កែប ៣ នាក់ និងខេត្តមណ្ឌលគិរី ១ នាក់។
លោកនាយករដ្ឋមន្ត្រីបានផ្តល់រង្វាន់លើកទឹកចិត្តដល់សិស្សនិទ្ទេស A ទាំង ១ ៧៥៣ នាក់ ដែលក្នុងម្នាក់ៗទទួលបានថវិកា ២ លានរៀល និងសៀវភៅអប់រំទូន្មាននានា៕
