ភ្នំពេញៈ លោកនាយករដ្ឋមន្ត្រី ហ៊ុន សែន អំពាវនាវជាថ្មីទៀតឱ្យការបោះឆ្នោតឃុំសង្កាត់ ខាងមុខប្រព្រឹត្តទៅដោយមានសុវត្ថិភាព និងមិនមានអំពើហិង្សាណាមួយកើតឡើងទោះក្នុងរូបភាពណាក៏ដោយ ហើយប្រជាពលរដ្ឋមានសេរីភាពក្នុងការជ្រើសរើសគណបក្សនយោបាយ។
លោក ហ៊ុន សែន ថ្លែងដោយសង្ឃឹមថា ការបោះឆ្នោតឃុំ- សង្កាត់នៅថ្ងៃទី ៥ ខែមិថុនា ខាងមុខនឹងប្រព្រឹត្តទៅដោយសុវត្ថិភាព ដោយភាពស្ងប់ស្ងាត់ និងមានសេរីភាពគ្រប់គ្រាន់សម្រាប់ពលរដ្ឋ ក្នុងការជ្រើសរើសតំណាងរបស់ខ្លួន ហើយអ្វីដែលរាជរដ្ឋាភិបាលចង់បានគឺសុវត្ថិភាព និងបរិយាកាសនយោបាយដ៏ល្អប្រសើរសម្រាប់ដំណើរការប្រជាធិបតេយ្យ។ លោកថ្លែងដូច្នេះក្នុងពិធីសំណេះសំណាលជាមួយសិស្សប្រឡងជាប់និទ្ទេស A ចំនួន ១ ៧៥៣ នាក់ នៅភ្នំពេញនាថ្ងៃទី ៣ ខែឧសភា។
លោក ហ៊ុន សែន បញ្ជាក់ថា៖ «សុំឱ្យការបោះឆ្នោតនៅក្នុងប្រទេសរបស់យើងដែលនឹងប្រព្រឹត្តទៅខាងមុខនេះ កុំឱ្យមានអំពើហិង្សាណាមួយកើតឡើង ទោះក្នុងរូបភាពណាក៏ដោយ។ សុំគិតគូរឱ្យបានច្បាស់ ការប្រកួតប្រជែងនៅទីនេះក្នុងដំណើរការប្រជាធិបតេយ្យធម្មតា មិនមែនការកាប់សម្លាប់គ្នាយកឈ្នះយកចាញ់នោះទេ។ ១៧ គណបក្សនឹងចូលរួមធ្វើការប្រកួតប្រជែង ដើម្បីយកសំឡេងឆ្នោត»។
លោក យ៉ង់ គិមអេង ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាពប្រាប់ភ្នំពេញប៉ុស្តិ៍នាថ្ងៃទី ៣ ខែឧសភាថា ការអំពាវនាវរបស់លោក ហ៊ុន សែន នេះគឺជារឿងមួយល្អដែលនឹងជំរុញឱ្យបរិយាកាសបោះឆ្នោតមានភាពល្អប្រសើរ។
លោកបន្តថា ប្រសិនបើមន្ត្រីជាន់ខ្ពស់របស់រដ្ឋាភិបាលផ្សេងៗទៀត មានការលើកទឹកចិត្តបែបនេះ និងលើកឡើងអំពីភាពសេរី និងយុត្តិធម៌នៃការបោះឆ្នោត និងការបង្កបរិយាកាសល្អប្រពៃសម្រាប់ការបោះឆ្នោត ក៏ដូចជាបរិយាកាសនយោបាយ សម្រាប់ប្រជាពលរដ្ឋធ្វើការជ្រើសរើសគណបក្សនយោបាយដែលខ្លួនពេញចិត្តដោយសេរី នោះគឺជារឿងល្អដែលធ្វើឱ្យប្រជាធិបតេយ្យនៅកម្ពុជាអាចនឹងមានការសាទរសាជាថ្មីទៀត។
លោក យ៉ង់ គិមអេង ថ្លែងថា៖ «ជាមួយគ្នានេះ ក៏ខ្ញុំចង់ឃើញថា មន្ត្រីនៅថ្នាក់ក្រោមក៏មិនត្រូវឱ្យមានរូបភាពនៃការគំរាមកំហែងបំភិតបំភ័យណាមួយកើតឡើងទេគឺត្រូវតែគោរពទៅតាមអ្វីដែលជាការអំពាវនាវរបស់សម្តេចនាយករដ្ឋមន្ត្រីនេះ»។
កាលពីចុងខែមេសា លោក ហ៊ុន សែន បានប្រកាសថា លោកនឹងមិនធ្វើការឃោសនារកសំឡេងឆ្នោតនោះទេ ខណៈយុទ្ធនាការបោះឆ្នោតឃុំ សង្កាត់នេះ នឹងចាប់ផ្តើមនៅថ្ងៃទី ២១ ខែឧសភា គឺចំថ្ងៃដែលលោកគ្រោងជួបសំណេះសំណាល ជាមួយប្រជាពលរដ្ឋខ្មែរនៅប្រទេសស្វ៊ីសក្នុងឱកាសដែលលោកទៅបំពេញទស្សនកិច្ចនៅប្រទេសនេះ។
កាលពីខែកុម្ភៈ លោក ហ៊ុន សែន ក៏ធ្លាប់បានអំពាវនាវឱ្យអាជ្ញាធរគ្រប់លំដាប់ថ្នាក់ បង្កលក្ខណសម្បត្តិឱ្យបណ្តាបក្សនយោបាយ ដែលនឹងត្រូវចូលរួមការបោះឆ្នោតឃុំ សង្កាត់ នៅពេលខាងមុខទទួលបាននូវឱកាសសម្រាប់ការជួបជុំ ការរៀបចំចុះទៅជួបប្រជាជនដែលជាសមាជិកសមាជិការបស់ពួកគេដោយគ្មានការរំខានណាមួយពីអាជ្ញាធរមូលដ្ឋាន។ លោក ហ៊ុន សែន ថែមទាំងអំពាវនាវដល់អាជ្ញាធរ ត្រូវខិតខំជួយការពារសុវត្ថិភាពបណ្តាបក្សនយោបាយឱ្យបាន ដោយមិនត្រូវឱ្យមានការបោះឆ្នោតមួយញាំញីដោយអំពើហិង្សារហូតទៅដល់មានមនុស្សគ្រោះថ្នាក់។
កាលពីខែកុម្ភៈ គណៈកម្មាធិការជាតិរៀបចំការបោះឆ្នោត (គ.ជ.ប) បានប្រកាសថា អ្នកដែលមានឈ្មោះក្នុងបញ្ជីបោះឆ្នោត គឺមានចំនួនជាង ៩ លាននាក់ ខណៈការិយាល័យបោះឆ្នោតនៅទូទាំងប្រទេសមានចំនួនជាង ២ ម៉ឺនការិយាល័យ៕