ភ្នំពេញៈ គម្រោងអច្ឆរិយភាពនៃទន្លេមេគង្គរបស់ទីភ្នាក់ងារជំនួយអាមេរិកUSAIDបាននិងកំពុងរៀបចំការតាំងពិព័រណ៍រូបថតដែលបង្ហាញពីផលប៉ះពាល់យ៉ាងធ្ងន់ធ្ងរនៃការប្រែប្រួលអាកាសធាតុ និងការអភិវឌ្ឍនៅលើបឹងទន្លេសាបដល់សាធារណជនចូលទស្សនារយៈពេលប្រមាណ ១ ខែ ក្នុងខែនេះ ដោយរំពឹងថា អ្នកចូលទស្សនាផ្ទាល់នឹងមានដល់ប្រមាណ ២ ០០០ នាក់។
ការតាំងពិព័រណ៍រូបថតនេះមានចំណងជើងថា «ទន្លេសាប៖ បេះដូងនៃទន្លេមេគង្គ» របស់អ្នកជំនាញថតរូបអាជីព លោក ស៊ូថេប គ្រីតសាណាវ៉ារិន (Suthep Kritsanavarin) ដែលបង្ហាញពីជីវចម្រុះ និងជីវិតនៅលើបឹងទន្លេសាប។
លោកបានអំពាវនាវ តាមរយៈសេចក្តីប្រកាសព័ត៌មាននៃគម្រោងនេះនៅថ្ងៃទី ២ ខែឧសភា ឱ្យមានការយកចិត្តទុកដាក់ចំពោះផលវិបាកដែលនឹងប៉ះពាល់យ៉ាងធំធេងពីការប្រែប្រួលអាកាសធាតុ សកម្មភាពមនុស្ស និងការអភិវឌ្ឍនៅលើបឹងទន្លេសាប។
ការតាំងពិព័រណ៍រូបថតនេះប្រព្រឹត្តទៅចាប់ពីថ្ងៃទី ២ ដល់ថ្ងៃទី ៣១ ខែឧសភា នៅមជ្ឈមណ្ឌលបុប្ផាណា ក្នុងរាជធានី-ភ្នំពេញ ដែលជាផ្នែកមួយនៃគម្រោងអច្ឆរិយភាពនៃទន្លេមេគង្គដែលឧបត្ថម្ភគាំទ្រដោយទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID)។
សេចក្តីប្រកាសព័ត៌មាននេះបញ្ជាក់ថា «រូបថតប្លែកៗដ៏អស្ចារ្យទាំងនេះបង្ហាញពីរបៀបរបបរស់នៅយ៉ាងចម្រុះតាមបែបផែនផ្សេងៗគ្នានៃសហគមន៍នេសាទជុំវិញបឹងទន្លេសាប។ ខណៈពេលដែលបណ្ដុំរូបថតមួយចំនួននិទានប្រាប់ពីរឿងរ៉ាវទូទៅអំពីបរិស្ថាន ភូមិសាស្ត្រ និងជីវចម្រុះនៃបឹងទន្លេសាប កម្រងរូបភាពផ្សេងទៀតបានប្រៀបធៀបបឹងទន្លេសាបក្នុងរដូវប្រាំង និងរដូវវស្សា ដោយបង្ហាញពីវិធីដែលភាវៈមានជីវិត និងប្រជាជនសម្របខ្លួនទៅនឹងស្ថានភាពផ្សេងៗគ្នានោះ»។
លោក Kritsanavarin ប្រាប់ភ្នំពេញប៉ុស្តិ៍នៅថ្ងៃទី ២ ខែឧសភាថា ក្នុងរយៈពេល ២០ ឆ្នាំនៃការងារថតរូបរបស់លោក លោកបានជួបប្រទះនូវការប្រែប្រួលបឹងទន្លេសាប។ រូបថតទាំងនេះក៏បង្ហាញផងដែរពីរបៀបដែលប្រជាជនសម្របខ្លួនរស់នៅលើបឹងទន្លេសាប។
លោកថ្លែងថា៖ «ក្នុងរយៈពេលនេះប្រភេទសត្វក្នុងទឹកមួយចំនួនបានក្លាយទៅជាប្រភេទសត្វកម្រ និងរងការគំរាមកំហែងដល់ការផុតពូជ។ រូបថតទាំងនេះក៏បង្ហាញពីផលប៉ះពាល់នៃការប្រែប្រួលអាកាសធាតុដែលជះឥទ្ធិពលដល់បឹងទន្លេសាប និងជីវិតមនុស្សផងដែរ»។
សេចក្តីប្រកាសព័ត៌មានបញ្ជាក់ថា បឹងទន្លេសាបស្ថិតនៅចំកណ្តាលនៃប្រទេសកម្ពុជា និងជាបឹងទឹកសាបដ៏ធំបំផុតនៅអាស៊ីអាគ្នេយ៍ ហើយក៏ជាដែនដែលមានផលិតភាពធនធានជលផលទឹកសាបខ្ពស់បំផុតមួយក្នុងពិភពលោកដែរ។ ផលត្រីរបស់បឹងនេះ ជាប្រភពប្រូតេអ៊ីន សម្រាប់ប្រជាជនកម្ពុជារាប់លាននាក់ និងប្រជាជននៅប្រទេសជិតខាងក្នុងតំបន់។
លោក Kritsanavarin ថ្លែងតាមរយៈសេចក្តីប្រកាសព័ត៌មាននេះថា៖ «ចាប់តាំងពីឆ្នាំ ២០០០ មកខ្ញុំបានទៅទស្សនាបឹងនេះជាង ១០ ដងទៅហើយ ហើយរាល់ពេលដែលខ្ញុំទៅដល់ ខ្ញុំបានរៀនអ្វីថ្មីៗជានិច្ច។
វាជាកន្លែងដ៏អស្ចារ្យមួយ ប៉ុន្តែច្បាស់ណាស់ថា អ្វីៗជាច្រើនបាននិងកំពុងផ្លាស់ប្តូរយ៉ាងឆាប់រហ័សនៅលើបឹង រួមទាំងការធ្លាក់ចុះនៃត្រី និងការបាត់បង់ជម្រកធម្មជាតិ»។
លោក Kritsanavarin និងគម្រោងអច្ឆរិយភាពនៃទន្លេមេគង្គគឺជាអ្នកឧបត្ថម្ភដល់ការតាំងពិព័រណ៍នេះ ដើម្បីបង្ហាញពីផលប៉ះពាល់នៃការប្រែប្រួលអាកាសធាតុ និងការអភិវឌ្ឍអាងទន្លេមេគង្គ និងអាងទន្លេសាប។
សេចក្តីប្រកាសព័ត៌មានដដែលបានបញ្ជាក់ថា៖ «ការតាំងពិព័រណ៍រូបថតក្នុងរយៈពេល ១ ខែនេះ ត្រូវបានគេរំពឹងថានឹងមានអ្នកទៅចូលរួមទស្សនាផ្ទាល់ប្រមាណ ២០០០ នាក់។
រូបថតនានានៃស្ថានភាពបរិស្ថានបច្ចុប្បន្ន និងការផ្លាស់ប្តូរទៅតាមរដូវនៃប្រព័ន្ធបឹង និងទន្លេនឹងត្រូវបង្ហាញជាសាធារណៈ ដើម្បីអប់រំ និងលើកកម្ពស់ការការពារ និងការអភិរក្សទៅលើធនធានដ៏មានតម្លៃដែលបានផ្ដល់ឱ្យដោយប្រព័ន្ធទន្លេទាំងនេះ»។
លោក ហ្សេបហូហ្គេន (Zeb- Hogan) ដែលជាអ្នកដឹកនាំគម្រោងអច្ឆរិយភាពនៃទន្លេមេគង្គ ថ្លែងក្នុងសេចក្តីប្រកាសព័ត៌មាននេះថា សកម្មភាពដើម្បីបុព្វហេតុការពារបឹងទន្លេសាប និងប្រព័ន្ធអេកូឡូស៊ីដែលពាក់ព័ន្ធនឹងផ្តល់អត្ថប្រយោជន៍ដល់ប្រជាជនកម្ពុជាទាំងអស់តាមរយៈការការពារប្រភពស្បៀងអាហារដ៏សំខាន់ និងជាកន្លែងដែលសំខាន់ចំពោះបេតិកភណ្ឌធម្មជាតិរបស់ប្រទេសកម្ពុជា។
លោកថ្លែងថា៖ «ខ្ញុំសង្ឃឹមថាអ្នករាល់គ្នាដែលចូលទៅទស្សនាការតាំងពិព័រណ៍នឹងទទួលបានការយល់ដឹងកាន់តែស៊ីជម្រៅនិងការដឹងគុណចំពោះធម្មជាតិដ៏វិសេសវិសាលរបស់ប្រទេសកម្ពុជា និងបញ្ហាប្រឈម»។
គម្រោងអច្ឆរិយភាពនៃទន្លេមេគង្គមានគោលបំណងធ្វើឱ្យកាន់តែមានការប្រសើរឡើងលើការយល់ដឹង ការដឹងគុណ និងសមត្ថភាពគ្រប់គ្រងមុខងារ និងសុខុមាលភាពទន្លេមេគង្គមួយសម្រាប់ត្រី សត្វព្រៃ និងមនុស្សជាតិ៕
វីដេអូ៖