ភ្នំពេញៈ សត្វក្តាន់ប្រមាណ ៧០ ក្បាលដែលជាសត្វកម្រនៅលើពិភពលោកត្រូវបានអ្នកវិទ្យាសាស្ត្រតាមដានរកឃើញកំពុងរស់នៅក្នុងតំបន់ទីជម្រកព្រៃវាលស្មៅនៃតំបន់ព្រៃទេសភាពមេគង្គក្នុងខេត្តក្រចេះ។ នេះបើយោងតាមរបាយការណ៍របស់ក្រសួងបរិស្ថាន។
ក្រសួងបរិស្ថានបានឱ្យដឹងថា លទ្ធផលដ៏គួរឱ្យរំភើបនេះត្រូវបានបញ្ចូនតាមសេចក្តីរាយការណ៍កាលពីសប្តាហ៍កន្លងទៅនេះ ដែលមានការបញ្ជាក់ដោយរូបភាពទទួលបានពីការតាមដានសត្វក្តាន់ដោយប្រើម៉ាស៊ីនថតស្វ័យប្រវត្តិ និងបច្ចេកវិទ្យាដ្រូនដែលបំពាក់ម៉ាស៊ីនថតប្រើកម្តៅ។
កម្មវិធីស្រាវជ្រាវនេះត្រូវបានអនុវត្តដោយអ្នកជំនាញផ្នែកស្រាវជ្រាវសត្វព្រៃនៃមន្ទីរបរិស្ថានខេត្តក្រចេះ និងអង្គការ WWF ដោយមានការគាំទ្រផ្នែកបច្ចេកទេស និងចូលរួមពីក្រុមអ្នកជំនាញអភិរក្សជីវចម្រុះ BINCO ក្រុមអ្នកជំនាញបច្ចេកវិទ្យាដ្រូននៃម៉ាស៊ីនថតប្រើកម្តៅ DRONES GmbH ក៏ដូចជាពីសំណាក់សហគមន៍ និងអាជ្ញាធរមូលដ្ឋានក្នុងតំបន់នៃដែនជម្រកសត្វព្រៃដែលស្ថិតក្រោមការគ្រប់គ្រងរបស់ក្រសួងបរិស្ថាន ដោយមានការគាំទ្រពីអង្គការ WWF។
លទ្ធផលនៃការស្រាវជ្រាវក៏បានបង្ហាញផងដែរពីវត្តមាននៃសត្វក្តាន់វ័យជំទង់ និងកូនជាច្រើន ដែលជាកត្តាចង្អុលបង្ហាញពីការបន្តពូជរបស់សត្វដ៏កម្រប្រភេទនេះនៅក្នុងតំបន់ទីជម្រក ខណៈក្រសួងបរិស្ថាន និងអង្គការ WWF កំពុងរៀបចំរបាយការណ៍ស្តីពីស្ថានភាព និងចំនួនសត្វក្តាន់ សម្រាប់ការចេញផ្សាយនាពេលខាងមុខនេះ។
ក្រសួងបរិស្ថានថា៖ «សត្វក្តាន់ត្រូវបានកំណត់ក្នុងបញ្ជីក្រហមរបស់អង្គការ IUCN ថាជាប្រភេទសត្វរងគ្រោះថ្នាក់ជិតផុតពូជជាសកល ហើយនៅក្នុងប្រទេសកម្ពុជា សត្វក្តាន់នេះធ្លាប់ត្រូវបានអ្នកវិទ្យាសាស្ត្រប៉ាន់ប្រមាណថាបានផុតពូជទៅហើយរហូតដល់មានការរកឃើញឡើងវិញនៅក្នុងឆ្នាំ ២០០៦ នៅក្នុងខេត្តក្រចេះ»។ ក្រសួងបន្តថា សត្វក្តាន់បាននិងកំពុងទទួលរងការគំរាមកំហែងដោយការបាត់បង់ទីជម្រក ការបរបាញ់ និងវិបត្តិអន្ទាក់ ដែលបានរាលដាលឡើងដោយការជួញដូរសត្វព្រៃខុសច្បាប់។
ដើម្បីជួយសង្គ្រោះសត្វក្តាន់ និង សត្វព្រៃសំខាន់ៗជាសកលជាច្រើនប្រភេទទៀតក្នុងប្រទេសកម្ពុជាពីការបរបាញ់ និងការដាក់អន្ទាក់ ក្រសួងបរិស្ថានបានផ្តួចផ្តើម យុទ្ធនាការ «អន្ទាក់សូន្យក្នុងតំបន់ការពារធម្មជាតិកម្ពុជា» ដែលត្រូវបានរៀបចំឡើង និងបើកឱ្យដំណើរការជាផ្លូវការកាលពីដើមខែមីនាឆ្នាំ ២០២២ កន្លងទៅនេះ ដោយមានគោលដៅលុបបំបាត់ការដាក់អន្ទាក់គ្រប់ប្រភេទ និងបញ្ចប់ការជួញដូរសត្វព្រៃខុសច្បាប់។
ប្រធានអង្គការសមាគមអភិរក្សសត្វព្រៃនៅកម្ពុជា (WCS) លោក កែន សិរីរដ្ឋា ថ្លែងថា ការរកឃើញសត្វកម្រជាបន្តបន្ទាប់នៅក្នុងទឹកដីកម្ពុជា ដែលបង្ហាញពីរបកគំហើញនៃហ្វូងសត្វក្តាន់នេះដែលជាសញ្ញាវិជ្ជមាន សម្រាប់វិស័យការងារអភិរក្សធនធានជីវចម្រុះនៅកម្ពុជា។ នាពេលថ្មីៗនេះក្រសួងបរិស្ថានក៏បានបង្ហាញប្រភេទសត្វកម្រ និងសត្វជិតផុតពូជច្រើនប្រភេទ លេចវត្តមាននៅកម្ពុជា រួមមាន សត្វខ្លាលឿងមាស ឈ្លូសយក្ស សត្វឆ្កែព្រៃ សត្វខ្លាពពក សត្វក្តាន់ និងសត្វស្លាបជាច្រើនប្រភេទផងដែរ។ WCS បង្ហាញបញ្ហាប្រឈមនៅមានការលួចបរបាញ់ និងដាក់អន្ទាក់សត្វព្រៃ៕