អំណាន និងគណិតវិទ្យានៅថ្នាក់ដំបូងមានសារៈសំខាន់ណាស់សម្រាប់កុមារ ដើម្បីងាយស្រួលក្នុងការអាន គិត និងគណនាគណិតវិទ្យានៅថ្នាក់បន្ទាប់។ ក្រសួងអប់រំ យុវជន និងកីឡា និងអង្គការដៃគូពាក់ព័ន្ធនានាបានចូលរួមដាក់ចេញនូវយុទ្ធសាស្ដ្រ សៀវភៅអំណាន និងគណិតវិទ្យានានា វីដេអូជំនួយដល់ការអាន និងគណិតវិទ្យា និងកម្មវិធីសិក្សាតាមប្រព័ន្ធអនឡាញមួយចំនួន ដើម្បីជាយន្តការក្នុងការលើកកម្ពស់ការអាន និងគណិតវិទ្យាថ្នាក់ដំបូងនៅកម្រិតបឋមសិក្សា។ ខ្លឹមសារអត្ថបទប្រចាំខែឧសភា ឆ្នាំ ២០២២ នេះនឹងផ្តោតសំខាន់ទៅលើផែនការយុទ្ធសាស្ដ្រវិស័យអប់រំឆ្នាំ ២០១៩-២០២៣ ស្ដីពីអនុវិស័យអប់រំបឋម សិក្សា សកម្មភាពនានាដែលទាក់ទងទៅនឹងការលើកកម្ពស់កម្មវិធីអំណាន និងគណិតវិទ្យាថ្នាក់ដំបូង ការអនុវត្តកញ្ចប់សម្ភារអំណាននិង គណិតវិទ្យាថ្នាក់ដំបូង ក៏ដូចជាកម្មវិធី «កុមាររៀន កុមារចេះ» ដែលគាំទ្រ និងលើកកម្ពស់ដល់ការអាន និងការសិក្សាគណិតវិទ្យាថ្នាក់ដំបូងនៅកម្រិតបឋមសិក្សា។
នៅក្នុងផែនការយុទ្ធសាស្ដ្រវិស័យអប់រំឆ្នាំ ២០១៩-២០២៣ របស់ក្រសួងអប់រំ យុវជន និងកីឡា អនុវិស័យអប់រំបឋមសិក្សា បានដាក់ចេញនូវចំណុចអាទិភាពមួយចំនួនដែលផ្ដោតលើការកែលម្អលើការទទួលបានសេវាអប់រំ ការបញ្ចប់ការសិក្សារបស់សិស្សបឋមសិក្សា ជាពិសេសក្រុមកុមារជួបការលំបាក និងការពង្រឹងគុណភាពអប់រំតាមកម្មវិធីពង្រឹងការរៀនថ្នាក់ដំបូងរួមមាន ភាសាខ្មែរ គណិតវិទ្យា និងការជួយគ្រូតាមមុខវិជ្ជា ព្រមទាំងគុណវុឌ្ឍិគ្រូបង្រៀន តាមរយៈការអនុវត្តការគ្រប់គ្រងសាលារៀន។
នៅក្នុងនោះ វត្ថុបំណងអនុវិស័យទី ២ ស្ដីពី «ការកែលម្អការផ្ដល់ធាតុចូលប្រកបដោយគុណភាពនៅបឋមសិក្សា ជាពិសេសកម្មវិធីអំណាន និងគណិតវិទ្យាថ្នាក់ដំបូង» នៃវត្ថុបំណងទាំង ៣ របស់អនុវិស័យការអប់រំបឋមសិក្សា បានបង្ហាញឱ្យឃើញអំពីទិន្នន័យនៃចំនួនកញ្ចប់សម្ភារអំណានថ្នាក់ដំបូង និងកញ្ចប់សម្ភារគណិតវិទ្យាថ្នាក់ដំបូងដែលគ្រូបង្រៀននៅបឋមសិក្សាទទួល បានសម្រាប់ការបំប៉នសមត្ថភាពបន្ថែមក្នុងឆ្នាំនីមួយៗ។ ដើម្បីធានាការសម្រេច បានដោយជោគជ័យនូវវត្ថុបំណងអនុវិស័យទី ២ ដែលបានកំណត់យុទ្ធសាស្ដ្រចំនួន ៥ ត្រូវបានដាក់ចេញ ដូចជា៖ (១) លើកកម្ពស់គុណវុឌ្ឍិ របស់គ្រូបង្រៀនដែលមានស្រាប់ និងពង្រឹងការពង្រាយគ្រូ (២) ពង្រឹង គុណភាពនៃការបណ្ដុះបណ្ដាលសម្រាប់ គ្រូបឋមសិក្សា (៣) កែលម្អការផ្គត់ផ្គង់ និងការប្រើប្រាស់សៀវភៅសិក្សាគោល និងសម្ភាររៀន និងបង្រៀន (៤) ពង្រឹងការអនុវត្តអធិការកិច្ចផ្ទៃក្នុង អធិការកិច្ចផ្ទៃក្រៅ និងអធិការកិច្ចតាមតំបន់ និង (៥) ពង្រឹងតួនាទី និងការទទួលខុសត្រូវរបស់ក្រុមការងារបំប៉ន និងពិនិត្យតាមដានថ្នាក់ស្រុក ក្នុងការពិនិត្យតាមដាន និងវាយតម្លៃការងាររបស់គណៈកម្មការគ្រប់គ្រងសាលារៀន គ្រូបង្រៀន និងសិស្ស។ ការដាក់ចេញយុទ្ធសាស្ដ្រទាំងនេះ មានគោលបំណងផ្ដោតលើការអភិវឌ្ឍវិស័យអប់រំបឋមសិក្សា ជាពិសេសលើកកម្ពស់វឌ្ឍនភាពនៃកម្មវិធីអំណាន និងគណិតវិទ្យាថ្នាក់ ដំបូងដល់លោកគ្រូ អ្នកគ្រូ និងសិស្សានុសិស្ស។
យោងតាមរបាយការណ៍សន្និបាតបូកសរុបលទ្ធផលការងារអប់រំ យុវជន និងកីឡា ឆ្នាំសិក្សា ២០១៩-២០២០ និងទិសដៅឆ្នាំសិក្សា ២០២០-២០២១ បានបង្ហាញឱ្យឃើញថា អនុវិស័យអប់រំបឋមសិក្សា ក្រោមកិច្ចសហការជាមួយគម្រោងពង្រឹងកម្មវិធីការអប់រំគ្រូបង្រៀននៅកម្ពុជា អង្គការយូណេស្កូ អង្គការវីវីអូប៊ី អង្គការអប់រំពិភពលោក អង្គការសង្គ្រោះកុមារកម្ពុជា អង្គការរូមធូរីដ អង្គការទស្សនពិភពលោក និងដៃគូពាក់ព័ន្ធនានាបានផលិត និងចែកចាយសៀវភៅណែនាំគ្រូបង្រៀន សៀវភៅភាសាខ្មែរកម្រិតថ្នាក់ដំបូង សៀវភៅគណិតវិទ្យាថ្នាក់ដំបូង កញ្ចប់សម្ភារអំណាន កញ្ចប់សម្ភារគណិតវិទ្យាថ្នាក់ទី ១ ទី ២ ដល់នាយកសាលា គ្រូបង្រៀន សិស្សានុសិស្សនៅតាមបណ្ដាខេត្តគោលដៅមួយចំនួន។ ជាមួយគ្នានេះដែរ ក្រសួងអប់រំ យុវជន និងកីឡាបានផ្ដល់វគ្គបំប៉នសមត្ថភាពដល់លោកគ្រូ អ្នកគ្រូ ស្ដីពីវិធីសាស្ដ្រក្នុងការបង្រៀន និងការប្រើប្រាស់កញ្ចប់សម្ភារអំណាន កញ្ចប់សម្ភារគណិតវិទ្យាថ្នាក់ដំបូង ដើម្បីឱ្យការរៀនអំណាន និងគណិតវិទ្យាថ្នាក់ដំបូងកាន់តែមានប្រសិទ្ធភាព។ ដើម្បីជាការឆ្លើយតបទៅនឹងផលប៉ះពាល់ដែលកើតមាន ឡើងដោយជំងឺរាតត្បាតជាសកលកូវីដ ១៩ និងជំរុញឱ្យកុមាររៀនសូត្រតាមគន្លងបរិបទថ្មីកាន់តែប្រសើរជាងមុន ក្រសួងអប់រំ យុវជន និងកីឡា ស្ថិតក្រោមកិច្ចសហការជាមួយ អង្គការ និងដៃគូអភិវឌ្ឍន៍វិស័យអប់រំនានាបានផលិតវីដេអូស្ដីអំពីការបង្រៀនមុខវិជ្ជាភាសាខ្មែរ និងគណិតវិទ្យា ចាប់ពីថ្នាក់ទី ១ ដល់ទី ៣ បានចំនួនប្រហែល ១ ៨០០ ឃ្លីបវីដេអូ និងបានផ្សព្វផ្សាយតាមប្រព័ន្ធអេឡិចត្រូនិក ព្រមទាំងក្នុងគេហទំព័រហ្វេសប៊ុកផ្លូវការក្រសួងអប់រំ យុវជន និងកីឡា។
ដោយមានការចង្អុលបង្ហាញដឹកនាំ និងគាំទ្រពីថ្នាក់ដឹកនាំក្រសួង ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា និងក្រុមការងារអំណានថ្នាក់ដំបូងនៃនាយកដ្ឋានបឋមសិក្សាសហការជាមួយនាយកដ្ឋានអភិវឌ្ឍកម្មវិធីសិក្សា នាយកដ្ឋានបណ្តុះបណ្តាល និងវិក្រឹតការ អង្គការដៃគូពាក់ព័ន្ធ ក្រោមការសម្របសម្រួលរបស់អង្គការ RTI (Research Triangle Institute) ដែលឧបត្ថម្ភដោយទីភ្នាក់ងារជំនួយអាមេរិកបានផលិតកញ្ចប់សម្ភារអំណានថ្នាក់ដំបូង និងអង្គការវីវីអូប៊ី ដែលឧបត្ថម្ភដោយគម្រោង STEPCam តាមរយៈអង្គការយូណេស្កូ បានផលិតកញ្ចប់សម្ភារគណិតវិទ្យាថ្នាក់ ដំបូង។ កញ្ចប់សម្ភារអំណាន និងគណិតវិទ្យាថ្នាក់ដំបូង បង្កើតឡើងដើម្បីឱ្យគ្រប់អ្នកពាក់ព័ន្ធជាពិសេសគ្រូបង្រៀនថ្នាក់ទី ១ និងទី ២ មានកញ្ចប់សម្ភារអប្បបរមាមួយ ដែលទាំងអស់គ្នាអាចយកទៅប្រើប្រាស់សម្រាប់ការអនុវត្ត និងពង្រីកការអនុវត្តនៅទូទាំងប្រទេសក្នុងន័យលើកកម្ពស់គុណភាពអប់រំ តាមរយៈការបង្កើនលទ្ធផលសិក្សារបស់សិស្ស ពោលគឺកុមារកម្ពុជាចេះអាន សរសេរ និងគិតលេខទាំងអស់គ្នា។
ក្រសួងបាននិងកំពុងអនុវត្តកម្មវិធីអំណានថ្នាក់ដំបូងនៅគ្រប់សាលាបឋមសិក្សាទាំងអស់ក្នុងខេត្តចំនួន ៨ រួម មាន ខេត្តកំពង់ធំ ខេត្តកំពត ខេត្តកែប ខេត្តសៀមរាប ខេត្តក្រចេះ ខេត្តស្ទឹងត្រែង ខេត្តព្រះវិហារ និងខេត្តឧត្តរមានជ័យ។ ចំពោះការអនុវត្តកម្មវិធីកញ្ចប់សម្ភារគណិតវិទ្យាថ្នាក់ដំបូង ក្រសួងបាននិងកំពុងអនុវត្តនៅខេត្តសៀមរាប ក្រចេះ ស្ទឹងត្រែង ព្រះវិហារ និងឧត្តរមានជ័យ។ ឈរលើមូលដ្ឋាននេះ ឯកសារដែលផលិតបានមានដូចជា សៀវភៅជំនួយសិស្សមុខវិជ្ជាភាសាខ្មែរថ្នាក់ទី ១ ទី ២ សៀវភៅហ្វឹកហាត់អានសរសេរថ្នាក់ទី ១ ទី ២ សៀវភៅរឿងខ្លីៗ (៤៥ ចំណងជើង) សៀវភៅលំហាត់ថ្នាក់ទី ១ ទី ២ សៀវភៅណែនាំសម្រាប់គ្រូបង្រៀនថ្នាក់ទី ១ ទី ២ និងការរៀបចំបញ្ចូលកញ្ចប់សម្ភារអំណាន កញ្ចប់សម្ភារគណិតវិទ្យាថ្នាក់ដំបូងទៅក្នុងកម្មវិធីបណ្តុះបណ្តាលគ្រូតាមប្រព័ន្ធ ១២+២ និង ១២+៤ នៅតាមសាលាគរុកោសល្យ។
ជាមួយគ្នានេះដែរ នៅថ្ងៃទី ២៤ ខែកុម្ភៈ ឆ្នាំ ២០២២ ក្រសួងអប់រំ យុវជន និងកីឡាបានប្រកាសដាក់ ឱ្យអនុវត្តជាផ្លូវការនូវកម្មវិធី «កុមាររៀន កុមារចេះ» ដែលត្រូវបានបង្កើតឡើងតាមរយៈបទពិសោធន៍ និងការចូលរួមរបស់អ្នកពាក់ព័ន្ធ ដោយផ្អែកលើភស្ដុតាងនៃការសិក្សាស្រាវជ្រាវលើការសិក្សានៅកម្រិតថ្នាក់ដំបូងនៃបឋមសិក្សា។ កម្មវិធីនេះទទួលបានការឧបត្ថម្ភគាំទ្រពីទីភ្នាក់ងារជំនួយអាមេរិក មូលនិធិភាពជាដៃគូសកលសម្រាប់ការអប់រំ អង្គការយូណេស្កូ អង្គការយូនីសេហ្វ និងអង្គការមិនមែនរដ្ឋាភិបាលនានាផងដែរ។
កញ្ចប់សម្ភារអំណាន និងគណិតវិទ្យាកម្រិតថ្នាក់ដំបូងនៅបឋមសិក្សាក្នុងកម្មវិធី «កុមាររៀន កុមារចេះ» នេះ មានដូចជា សៀវភៅណែនាំសម្រាប់គ្រូ និងឯកសារបង្រៀន និងរៀន សម្រាប់ប្រើប្រាស់ក្នុងមុខវិជ្ជាភាសាខ្មែរ និងគណិតវិទ្យាសម្រាប់សិស្សថ្នាក់ទី ១ និងទី ២។ ដើម្បីធានាដល់ការលើកកម្ពស់គុណភាពអប់រំបឋមសិក្សាជារួម ក្រសួងគ្រោងនឹងពង្រីកការអនុវត្តកម្មវិធី «កុមាររៀន កុមារចេះ» ទៅគ្រប់សាលាបឋមសិក្សាទូទាំងប្រទេស និងក្នុងកម្មវិធីនៃការបណ្ដុះបណ្ដាលគ្រូ នៅតាមគ្រឹះស្ថានបណ្ដុះបណ្ដាលគ្រូបឋមសិក្សាទូទាំងប្រទេសផងដែរ។
ក្រសួងអប់រំ យុវជន និងកីឡា និងអង្គការដៃគូអភិវឌ្ឍវិស័យអប់រំនានាបាននឹងកំពុងខិតខំយកចិត្តទុកដាក់យ៉ាងខ្លាំងក្នុងការលើកកម្ពស់ការអាន និងគណិតវិទ្យាថ្នាក់ដំបូង តាមរយៈការផ្សព្វផ្សាយ និងដាក់ឱ្យប្រើប្រាស់កញ្ចប់សម្ភារអំណាននិងគណិតវិទ្យាថ្នាក់ដំបូង ក៏ដូចជាកម្មវិធីសិក្សាកម្រិតបឋមសិក្សាផ្សេងៗទៀត នៅតាមបណ្ដារាជធានី-ខេត្ត។ ក្រសួងអប់រំ យុវជន និងកីឡាជឿជាក់យ៉ាងមុតមាំថា នៅកម្រិតថ្នាក់ដំបូងនៃបឋមសិក្សា កុមារកម្ពុជាទាំងអស់ រួមទាំងកុមារមានពិការភាពផងដែរនឹងទទួលបាននូវការអភិវឌ្ឍជំនាញភាសាខ្មែរ និងគណិតវិទ្យាបានល្អប្រសើរប្រកបដោយគុណភាព ដែលជាមូលដ្ឋានដ៏រឹងមាំក្នុងការបន្ដការសិក្សាទៅកម្រិតថ្នាក់បន្ដបន្ទាប់ទៀត៕