.jpg)
ថ្នាក់ដឹកនាំគណៈមេធាវី និងថ្នាក់ដឹកនាំក្រសួងកិច្ចការនារីក្នុងកិច្ចប្រជុំនៅថ្ងៃទី ៣ ឧសភា។ រូប ក្រសួងកិច្ចការនារី
ភ្នំពេញៈ គណៈមេធាវីនៃព្រះរាជាណាចក្រកម្ពុជាបានលើកឡើងពីបញ្ហាប្រឈមមួយចំនួនពាក់ព័ន្ធការផ្តល់សេវាការពារក្តីជូនស្រី្ត និងក្មេងស្រីក្រីក្ររងគ្រោះដោយអំពើហិង្សា ដោយសារខ្វះកិច្ចសហការពីស្ថាប័នរដ្ឋជំនាញ ទោះបីការអនុវត្តនៅឆ្នាំ ២០២១ ទទួលបានលទ្ធផលជោគជ័យក៏ដោយ។
បញ្ហាប្រឈមនេះត្រូវបានលើកឡើងនៅក្នុងកិច្ចប្រជុំបូកសរុបលទ្ធផលនៃការផ្តល់សេវាការពារក្តីជូនស្រី្ត និងក្មេងស្រីក្រីក្ររងគ្រោះដោយអំពើហិង្សាឆ្នាំ ២០២១ កាលពីថ្ងៃទី ៣ ខែឧសភា ឆ្នាំ ២០២២ ដោយមានការចូលរួមពីប្រធានគណៈមេធាវី លោក លី ច័ន្ទតុលា រដ្ឋមន្ត្រីក្រសួងកិច្ចការនារី និងជាប្រធានក្រុមប្រឹក្សាជាតិកម្ពុជា ដើម្បីស្រី្តលោកស្រី អ៊ឹង កន្ថាផាវី រួមនឹងលោក Connor Floyd លេខាទី ២ ទទួលបន្ទុកសហប្រតិបត្តិការ និងការអភិវឌ្ឍនៃស្ថានឯកអគ្គរដ្ឋទូតអូស្ត្រាលីប្រចាំកម្ពុជា។
គណៈមេធាវី និងក្រុមប្រឹក្សាជាតិកម្ពុជាដើម្បីស្ត្រីបានចុះអនុស្សរណៈនៃការយោគយល់ចំនួន ២ លើកគឺលើកទី ១ ចុះក្នុងឆ្នាំ ២០១៨ មានរយៈពេល ៣ ឆ្នាំ ២០១៨-២០២០ និងលើកទី ២ ចុះក្នុងឆ្នាំ ២០២១ មានរយៈពេល ៣ ឆ្នាំ ២០២១-២០២៣ ក្នុងកិច្ចសហប្រតិបត្តិការលើការផ្តល់សេវាការពារក្ដីជូនស្ត្រី និងក្មេងស្រីក្រីក្ររងគ្រោះដោយអំពើហិង្សា។
គណៈមេធាវីបានលើកឡើងថា ដោយសារខ្វះបទពិសោធ និងជាលើកដំបូងនៃការសហការគ្នាក្នុងការអនុវត្តអនុស្សរណៈលើកទី ១ ពុំសូវទទួលបានលទ្ធផលដូចការរំពឹងទុកទេ ពីព្រោះមានបញ្ហាប្រឈមមួយចំនួន ដែលត្រូវរួមគ្នាដោះស្រាយបន្ត។ ដោយឡែកការអនុវត្តអនុស្សរណៈលើកទី ២ នេះបានរយៈពេល ១ ឆ្នាំមកហើយដោយគណៈមេធាវីបានចាត់តាំងមេធាវីជួយការពារក្តីជូនស្ត្រី និងក្មេងស្រីក្រីក្ររងគ្រោះក្នុងអំពើហិង្សាបានចំនួន ១០៧ ករណី មានកូនក្តីសរុប ១១០ នាក់ក្នុងនោះមានក្មេងស្រីរងគ្រោះចំនួន ៦៩ នាក់។ ក្នុងគម្រោងការពារក្តីជូនស្ត្រី និងក្មេងស្រីក្រីក្ររងគ្រោះក្នុងអំពើហិង្សានេះគណៈមេធាវីមានមេធាវីស្ម័គ្រចិត្តចូលរួមក្នុងគម្រោងនេះចំនួន ១៦៣ រូបនៅទូទាំងប្រទេស។
ជាមួយនឹងលទ្ធផលកិច្ចខំប្រឹងប្រែងនេះ លោក លី ច័ន្ទុតុលា លើកឡើងថា ទោះបីជាការផ្តល់សេវាការពារក្តីជូនស្ត្រី និងក្មេងស្រីក្រីក្ររងគ្រោះ ដោយអំពើហិង្សាទទួលបានលទ្ធផល និងជោគជ័យតាមការរំពឹងទុកក៏ដោយ ក៏ការអនុវត្តអនុស្សរណៈនៃការយោគយល់ និងការផ្តល់សេវាការពារក្ដីជាក់ស្ដែងនៅមានបញ្ហាប្រឈមមួយចំនួន។
លោកថា៖ «បញ្ហាប្រឈមទាំងនោះត្រូវរួមគ្នាដោះស្រាយ មិនត្រឹមតែស្ថាប័នយើងទាំង ២ គឺត្រូវមានការចូលរួមពីក្រសួងយុត្តិធម៌ ក្រសួងសេដ្ឋកិច្ច និងហិរញ្ញវត្ថុ អង្គការអយ្យការ និងសាលាជម្រះក្ដីគ្រប់ជាន់ថ្នាក់ផងដែរ»។
បញ្ហាប្រឈមទាំងនោះរួមមាន ប្រភេទរឿងក្តីរបស់ស្ត្រី និងក្មេងស្រីក្រីក្ររងគ្រោះ ដែលត្រូវផ្តល់មេធាវីជូននៅមានកម្រិត។ ឧទាហរណ៍ សំណុំរឿងរក្សាការពារការរឹបអូសទ្រព្យសម្បត្តិរបស់ជនល្មើស ដើម្បីធានាសំណងរដ្ឋប្បវេណីចំពោះជនរងគ្រោះ ខណៈប្រភេទរឿងក្តីខ្លះមិនទាន់មាននិយមន័យច្បាស់លាស់។ ឧទាហរណ៍ រឿងក្តីដែលពាក់ព័ន្ធនឹងអំពើបំពានដល់សិទ្ធិ កិត្តិយស និងសេចក្តីថ្លៃថ្នូររបស់ស្ត្រី និងក្មេងស្រី។ លោកបន្តថា ចំណែកកិច្ចសហប្រតិបត្តិការរវាងអង្គការអយ្យការជាមួយមេធាវីការពារក្តីជូនជនរងគ្រោះនៅមានកម្រិត និងបញ្ហាប្រឈមមួយចំនួនទៀត។
លោក លី ច័ន្ទុតុលា សង្ឃឹមថា តាមរយៈកិច្ចប្រជុំថ្ងៃនេះនឹងលើកយកបញ្ហាប្រឈមទាំងនេះ មកពិភាក្សា និងស្វែងរកដំណោះស្រាយប្រកបដោយប្រសិទ្ធភាព។
ជាមួយគ្នានេះដែរលោកបានស្នើដល់ថ្នាក់ដឹកនាំនៃនាយកដ្ឋានការពារក្តីជូនជនក្រីក្រ គណៈមេធាវី និងប្រតិភូគណៈមេធាវីប្រចាំរាជធានី-ខេត្តប្រចាំសាលាឧទ្ធរណ៍តំបន់ និងសាលាឧទ្ធរណ៍ ភ្នំពេញ និងប្រចាំតុលាការកំពូលត្រូវចូលរួមផ្តល់យោបល់ ចែករំលែកបទពិសោធល្អៗ និងលើកយកបញ្ហាប្រឈមដែលខ្លួនជួបប្រទះដាក់ជូនអង្គប្រជុំដើម្បីពិភាក្សារកដំណោះស្រាយ។
បន្ថែមពីនេះ ត្រូវផ្ដល់ការសហការ និងផ្ដល់ព័ត៌មានទៅវិញទៅមករវាងប្រតិភូគណៈមេធាវីប្រចាំរាជធានី ខេត្តជាមួយមន្ទីរកិច្ចការនារីរាជធានី ខេត្ត និងជាមួយនាយកដ្ឋានការពារក្ដី ជូនជនក្រីក្រគណៈមេធាវី និងយកចិត្តទុកដាក់ចំពោះការការពារក្តី ជូនស្ត្រី និងក្មេងស្រីក្រីក្ររងគ្រោះ ដោយអំពើហិង្សា ឱ្យមានគុណភាព ប្រសិទ្ធភាព និងឱ្យដូចអតិថិជនដទៃទៀត។
លោកស្រី អ៊ឹង កន្ថាផាវី មានប្រសាសន៍ថា កិច្ចប្រជុំឆ្នាំនេះរៀបចំឡើងដើម្បីឆ្លុះបញ្ចាំងរួមគ្នាអំពីការអនុវត្តល្អៗការដោះស្រាយបញ្ហាសេសសល់ និងពង្រឹងកិច្ចសហការជាមួយសមត្ថកិច្ចពាក់ព័ន្ធក្នុងការជួយស្ត្រី និងក្មេងស្រីរងគ្រោះដោយអំពើហិង្សា ដើម្បីឱ្យពួកគេទទួលបានយុត្តិធម៌តាមផ្លូវច្បាប់ ឆ្លើយតបទៅនឹងអនុសាសន៍ដ៏ខ្ពង់ខ្ពស់របស់លោកនាយករដ្ឋមន្ត្រី ហ៊ុន សែន។
លោកស្រីបញ្ជាក់ថា៖ «ខ្ញុំសូមវាយតម្លៃខ្ពស់លើលទ្ធផលនៃការផ្តល់សេវាការពារសិទ្ធិជនរងគ្រោះជាស្ត្រី និងក្មេងស្រីដែលសម្រេចបានក្នុងឆ្នាំ ២០២១ តាមរយៈកិច្ចសហការរវាង ក.ជ.ក.ស និងគណៈមេធាវីកម្ពុជា ដែលកិច្ចសហការនេះនឹងរួមចំណែកកសាងភាពជឿជាក់របស់ប្រជាពលរដ្ឋចំពោះប្រព័ន្ធតុលាការ និងពង្រឹងនីតិរដ្ឋនៅកម្ពុជា តាមគោលដៅរបស់រាជរដ្ឋាភិបាល»។
លោកស្រីបានកត់សម្គាល់ថា ពីឆ្នាំ ២០១៩-២០២០ ការផ្តល់សេវាជូនជនរងគ្រោះមានភាពរអាក់រអួលខ្លះៗក្នុងការអនុវត្ត។ ប៉ុន្តែនៅក្នុងឆ្នាំ ២០២១ កន្លងទៅនេះ ក្រសួងកិច្ចការនារីបានធ្វើការកែសម្រួលនីតិវិធីមួយចំនួន ដើម្បីពន្លឿនការងារនេះ ទោះបីជាជួបវិបត្តិជំងឺកូវីដ ១៩ ក្តី ក៏ស្ថាប័នទាំង ២ បានខិតខំអនុវត្តគម្រោងការពារក្តីជូនស្ត្រី និងក្មេងស្រីរងគ្រោះទទួលបានលទ្ធផលល្អតាមការរំពឹងទុក៕
