ភ្នំពេញៈ ​លោកស្រី ឱ វណ្ណឌីន រដ្ឋលេខាធិការ​ក្រសួង​សុខាភិបាល និង​ជា​ប្រធាន​គណៈកម្មការ​​ចំពោះ​កិច្ចចាក់​វ៉ាក់សាំង​កូវីដ​ ១៩ ​ក្នុង​ក្របខ័ណ្ឌ​ទូទាំងប្រទេស​ (​គ.វ.ក-១៩) បានបញ្ជាក់​ឱ្យ​​ដឹងថា ការចាក់​វ៉ាក់សាំង​កូវីដ ១៩ ជាច្រើន​ដូស មិនមាន​បញ្ហា​ណាមួយ​ធ្វើឱ្យប៉ះពាល់​ដល់​សុខភាព​ឡើយ ដោយសារ​គ្រប់​វ៉ាក់សាំង​ដែល​បាន​ប្រើប្រាស់​ក្នុងប្រទេស​កម្ពុជា​ត្រូវបាន​ទទួលស្គាល់​ដោយ​អង្គការ​សុខភាព​ពិភពលោក​ (WHO)​។

លោកស្រី​បាន​ថ្លែង​ដូចនេះ​ក្នុងពេល​ចុះ​ពិនិត្យ​ទីតាំង​ចាក់​វ៉ាក់សាំង​កូវីដ​ ១៩ និង​ចុះសួរ​សុខទុក្ខ​​ប្រជាពលរដ្ឋ​ពី​ដំណើរការ​ចាក់​វ៉ាក់សាំង​នៅតាម​ខ្នង​ផ្ទះ សាលារៀន ផ្សារ និង​មន្ទីរពេទ្យ​នៅ​ខេត្តកោះកុង​ដែលមាន​ការចូលរួម​ដោយ​លោកស្រី លី អៃឡែន តំណាង​អង្គការ​សុខភាព​ពិភពលោក​ប្រចាំ​កម្ពុជា​ផងដែរ​។

ប្រធាន​ គ.វ.ក-១៩ បាន​បញ្ជាក់ថា​៖ «​ការចាក់​វ៉ាក់សាំង​នេះ​មិនមែន​ចាក់​ទៅ​ធ្វើឱ្យ​ខូចសុខភាព​ទេ​​គឺ​ចាក់​ដើម្បី​ការពារ​បងប្អូន​ពី​ការវាយលុក​ធ្ងន់ធ្ងរ​ពី​វីរុស​កូវីដ​ ១៩ ​ហើយ​វ៉ាក់សាំង​ដែល​យើង​ប្រើប្រាស់​នេះ សុទ្ធតែជា​វ៉ាក់សាំង​ដែលមាន​សុវត្ថិភាព ប្រសិទ្ធភាព និង​សុទ្ធតែជា​វ៉ាក់សាំង​ដែល​ស្ថិតក្នុង​បញ្ជី​ប្រើប្រាស់​បន្ទាន់​របស់​អង្គការ​សុខភាព​ពិភពលោក​»​។

វ៉ាក់សាំង​កូវីដ ​១៩ ​ដែល​កម្ពុជា​បាននិង​កំពុង​ប្រើប្រាស់​នាពេល​បច្ចុប្បន្ននេះ​មាន​ប្រភេទ ស៊ីណូវ៉ាក់ (Sinovac), ​ស៊ីណូហ្វាម​ (Sinopharm), ​អាស្ត្រាហ្សេនីកា​ (AstraZeneca), ​ចនស៊ុន​&​ចន់ស៊ុន​ (Johnson & Johnson), ភីហ្វាយហ្ស៊ឺ​ (Pfizer),​ម៉ូឌឺណា ​(Moderna) ​និង​វ៉ាក់សាំ​ប្រភេទ​កូវីស្សែល ​(Covi-shield)​ ដែល​វ៉ាក់សាំង​ទាំងនេះ​ត្រូវបាន​ទទួលស្គាល់​ដោយ​អង្គការ​សុខភាព​ពិភពលោក​។

លោកស្រី ឱ វណ្ណឌីន មានប្រសាសន៍​ថា​៖ «​វ៉ាក់សាំង​ទាំងនេះ សុទ្ធតែ​មាន​ប្រសិទ្ធភាព​ និង​គុណភាព​សម្រាប់​ប្រើប្រាស់​លើ​សរីរាង្គ​របស់​មនុស្ស​។ ​អ៊ីចឹង​! ​ការចាក់​វ៉ាក់សាំង​នេះ​ច្រើនដង​​ក៏​មិនមាន​ការប៉ះពាល់​សុខភាព​ដែរ ព្រោះ​វ៉ាក់សាំង​នេះ​ត្រូវបាន​សិក្សា​រួចហើយ ហើយ​ការចាក់​នេះ​ក៏មាន​ថិរវេលា​ត្រឹមត្រូវ​ផងដែរ មិនមែន​យើង​ចេះតែ​ចាក់​ ឬ​ធ្វើតាម​ការនឹកឃើញ​របស់​យើង​នោះទេ​»​។

លទ្ធផល​នៃ​ការចាក់​វ៉ាក់សាំង​កូវីដ​ ១៩ ​នៅ​កម្ពុជា​បានបង្ហាញ​ឱ្យឃើញ​នូវ​តថភាព​ជាក់ស្តែង​ផងដែរ​ថា ប្រសិនបើ​ការ​ស្រោចស្រព​វ៉ាក់សាំង​មិនទាន់​ពេល​ទេ​​នោះ ប្រហែលជា​ប្រជាពលរដ្ឋ​ទាំងអស់​មិនអាច​ចូលរួម​សប្បាយ​រីករាយ​ក្នុង​ពិធីបុណ្យ​ចូលឆ្នាំ​​នាពេល​កន្លងទៅនេះ​បានដែរ ហើយក៏​អាច​កំពុងស្ថិត​នៅក្នុង​ការអនុវត្ត​វិធានការ​សុខាភិបាល​យ៉ាង​តឹងតែង​ទៀតផង​។ នេះ​ជា​ការបញ្ជាក់បន្ថែម​របស់​លោកស្រី ឱ វណ្ណឌីន​។

លោកស្រី ឱ វណ្ណឌីន បាន​ថ្លែងថា​៖ «​យើង​មិន​ចង់​រស់នៅក្នុង​ប្រអប់​កូវីដ ​១៩​ ទេ យើង​ចង់​ដើរ​ចេញពី​ប្រអប់​កូវីដ ​១៩ ដូចនេះ​ដើម្បីឱ្យ​យើង​បាន​ដើរ​ចេញពី​ប្រអប់​កូវីដ​ ១៩ ​នេះ បាន​និរន្តរភាព​យូរ យើង​ត្រូវ​ប្រើប្រាស់​យុទ្ធសាស្ត្រ​មួយ​ក្នុងចំណោម​យុទ្ធសាស្ត្រ​ជាច្រើន ហើយ​ដែល​សំខាន់បំផុត​នោះ​គឺ​ការ​ស្រោចស្រព​វ៉ាក់សាំង​នេះ​តែម្តង​»​។

លោកនាយក​រដ្ឋមន្ត្រី ហ៊ុន សែន កាលពី​ថ្ងៃទី​ ២៦ ខែមេសា កន្លងទៅ​បានសម្រេច​លើកលែង​នូវ​កាតព្វកិច្ច​ពាក់​ម៉ាស់​សម្រាប់​ប្រជាពលរដ្ឋ​នៅ​ទូទាំងប្រទេស​នៅតាម​ទីសាធារណៈ​ និង​ទីកន្លែង​លម្ហ ដោយសារ​តែ​កម្ពុជា​មាន​ភាពស៊ាំ​សហគមន៍ បន្ទាប់ពី​លទ្ធផល​នៃ​ការចាក់​វ៉ាក់សាំង​កូវីដ​ ១៩​ បាន​គ្របដណ្តប់​ស្ទើរ​គ្រប់​ ១០០%​ នៅ​ទូទាំង​ប្រទេស​។

ដើម្បី​ធានា​នូវ​ភាពរឹងមាំ សម្រាប់​បន្ត​និរន្តរភាព​នៃ​ការមិន​ពាក់​ម៉ាស់ និង​មិនមាន​ជំងឺឆ្លង​បន្តទៀត លោក ហ៊ុន សែន បាន​អំពាវនាវ​ដល់​ប្រជាពលរដ្ឋ​ទាំងអស់​ត្រូវ​ទៅ​ចាក់​វ៉ាក់សាំង​ដូស​ទី​ ៣ ដែល​លោក​ចាត់ទុក​ដាក់​វា​ជា​ដូស​អប្បបរមា​កម្រិត​ទាប​បំផុត​របស់​ប្រទេស​កម្ពុជា​។

លោក លឹម វេហាស៍ អាយុ​ ២៥ ​ឆ្នាំ​រស់នៅក្នុង​ក្រុង​តាខ្មៅ ខេត្ត​កណ្តាល​បាន​ប្រាប់​ភ្នំពេញ​-​ប៉ុស្តិ៍​ថា លោក​បាន​ចាក់​វ៉ាក់សាំង​កូវីដ​ ១៩ បាន​ ៤​ ដង​ហើយ ហើយ​សុខភាព​របស់​លោក​ធម្មតា មិនមាន​អ្វី​ប៉ះពាល់​នោះទេ​។

លោក​បានឱ្យ​ដឹងថា​៖ «​ខ្ញុំ​ចាក់​វ៉ាក់សាំង​បាន​ ៤ ​ដង​ហើយ ហើយ​​និយាយ​ទៅ​ខ្ញុំ​ព្រួយ​តាំងពី​ដំបូង​ឯណោះ ពេល​បើក​ឱ្យ​ចាក់​ភ្លាមៗ​កាលពី​អំឡុង​ខែកុម្ភៈ ២០២១ ដោយ​ខ្ញុំ​ខ្លាច​ចាក់​ហើយ​ឈឺ​ដូច​ការនិយាយ​តៗ​គ្នា​ និង​ការផ្សាយ​តាម​បណ្តាញ​សង្គម​មួយចំនួន​»​។

លោក​បាន​បន្ថែមថា​៖ «​លុះ​ក្រោយមក​ឃើញថា គេ​ចាក់​ច្រើនដង​ហើយ​អត់​អី ខ្ញុំ​ក៏​ទៅ​ចាក់​ដែរ ហើយ​បន្ត​ចាក់​រហូត​មកដល់​​ដូស​ទី​ ៤​ នេះ​តែម្តង​។ ​ពេល​ចាក់​មកដល់​ដូស​ទី​ ៤​ នេះ​ខ្ញុំ​ហាក់ដូច​មិនបាន​គិតដល់​រឿងក្ដី​បារម្ភ​ពី​វ៉ាក់សាំង​ច្រើន​ដូស​នេះ​ទេ​»​។

លោក​ លឹម វេហាស៍ បាន​បន្ត​​ថា លោក​គិតថា​សរីរាង្គ​លោក​អាច​នឹងមាន​ភាពស៊ាំ​ខ្លាំង​ជាង​មុន ដោយសារ​តាំងពី​កូវីដ ​១៩ ​ផ្ទុះ​ខ្លាំង​​នៅ​ដើមឆ្នាំ​ ២០២០ ​មកដល់​ពេល​​នេះ លោក​អត់​ទាន់​ឆ្លង​កូវីដ​ទេ ដែល​លោក​គិតថា មកពី​វ៉ាក់សាំង​មាន​ប្រសិទ្ធភាព​។

យោងតាម​របាយការណ៍​របស់​ក្រសួង​សុខាភិបាល​បានឱ្យដឹងថា គិត​ត្រឹម​ថ្ងៃទី ​៣ ខែឧសភា ឆ្នាំ​ ២០២២ លទ្ធផល​ចាក់​វ៉ាក់សាំង​ធៀប​នឹង​ចំនួន​ប្រជាជន​សរុប ១៦ ​លាន​នាក់ មាន​ ៩៣,៤៦ ​ភាគរយ ខណៈ​ចំនួន​អ្នក​ដែល​បាន​ចាក់​ដូស​ទី​ ៣ មាន​ចំនួន​ជាង ៨,៦ ​លាន​នាក់ និង​​ដូស​ទី​ ៤ បាន​ចំនួន​ជាង​ ១,៧​ លាន​នាក់​៕

វីដេអូ៖