.jpg)
លោក ប្រាក់ សុខុន (ស្ដាំ) ក្នុងជំនួបជាមួយអគ្គលេខាធិការអាស៊ានកាលពីខែមករាឆ្នាំនេះ។ រូបថត ក្រសួងការបរទេស
ភ្នំពេញៈ កម្ពុជា ឥណ្ឌូនេស៊ី និងថៃទទួលបានឯកសិទ្ធិធ្វើជាម្ចាស់ផ្ទះកិច្ចប្រជុំមេដឹកនាំសំខាន់ៗចំនួន ៣ នៅក្នុងតំបន់អាស៊ីអាគ្នេយ៍នៅឆ្នាំនេះរួមមាន កិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ, កិច្ចប្រជុំកំពូលក្រុម G20 និងកិច្ចប្រជុំមេដឹកនាំសេដ្ឋកិច្ច APEC។ នេះបើយោងតាមសេចក្ដីប្រកាសព័ត៌មានរួម។
យោងតាមសេចក្តីប្រកាសព័ត៌មានរួមរបស់ក្រសួងការបរទេសនៃប្រទេសទាំង៣ កាលពីថ្ងៃទី ៤ ខែឧសភាបានឱ្យដឹងថា ដំណើរការអាស៊ាន G20 និង APEC មានចរិតលក្ខណៈរួមដែលផ្តល់ឱកាសមួយពិសេសសម្រាប់បណ្តាប្រទេស/សេដ្ឋកិច្ចសមាជិក រួមគ្នាជំរុញរបៀបវារៈតំបន់ និងក្នុងពិភពលោកក៏ដូចជាកិច្ចប្រឹងប្រែង ដើម្បីនាំមកនូវសន្តិភាព វិបុលភាព និងការអភិវឌ្ឍប្រកបដោយចីរភាព និងបរិយាប័ន្នដល់ប្រជាជនទាំងអស់។
«កម្ពុជា ឥណ្ឌូនេស៊ី និងថៃទទួលបានឯកសិទ្ធិធ្វើជាម្ចាស់ផ្ទះកិច្ចប្រជុំមេដឹកនាំសំខាន់ៗចំនួន ៣ នៅក្នុងតំបន់អាស៊ីអាគ្នេយ៍ក្នុងឆ្នាំនេះ គឺកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធនៅថ្ងៃទី ១១-១៣ វិច្ឆិកា កិច្ចប្រជុំកំពូលក្រុម G20 នៅថ្ងៃទី ១៥-១៦ វិច្ឆិកា និងកិច្ចប្រជុំមេដឹកនាំសេដ្ឋកិច្ច APEC នៅថ្ងៃទី ១៨-១ វិច្ឆិកា ឆ្នាំ ២០២២»។ នេះបើតាមសេចក្ដីប្រកាសរួម។
បើតាមប្រភពដដែលក្នុងគោលដៅនេះ អាស៊ានប្តេជ្ញាដោះស្រាយបញ្ហាប្រឈមរួមចំពោះមុខ និងរក្សានិរន្តរភាពថាមវន្តនៃការកសាងសហគមន៍អាស៊ានដោយឈរលើស្មារតីរួបរួមគ្នារឹងមាំ ក្រោមបាវចនា «អាស៊ានរួមគ្នាធ្វើ៖ ដោះស្រាយបញ្ហាប្រឈមរួមគ្នា»។
កម្ពុជា ឥណ្ឌូនេស៊ី និងថៃ ប្រកាសថា៖ «យើងប្តេជ្ញាពង្រឹងភាពធន់របស់អាស៊ានក្នុងការប្រឈមនឹងភាពមិនច្បាស់លាស់ជាសកល និងដើម្បីរក្សាតួនាទីស្នូលរបស់អាស៊ានក្នុងនិម្មាបនកម្មតំបន់ដែលសង្កត់ធ្ងន់ទៅលើការចូលរួមទំនាក់ទំនងក្នុងន័យស្ថាបនាដោយផ្អែកលើគោលការណ៍នៃការគោរពគ្នាទៅវិញទៅមក និងផលប្រយោជន៍ស្មើគ្នា»។
កម្ពុជា ឥណ្ឌូនេស៊ី និងថៃ ប្រកាសរួមគ្នាថា ការពន្លឿនកិច្ចប្រឹងប្រែងស្តារឡើងវិញពីផលប៉ះពាល់នៃជំងឺកូវីដ ១៩ ការលើកកម្ពស់សមាហរណកម្មអាស៊ាន និងសមត្ថភាពប្រកួតប្រជែងសម្រាប់កំណើនរយៈពេលវែងក្នុងបរិបទនៃបដិវត្តន៍ឧស្សាហកម្មទី ៤ ការលើកកម្ពស់សន្តិសុខផ្នែកសុខភាព និងការគាំពារសង្គមសម្រាប់ប្រជាជនគឺជារបៀបវារៈក្នុងចំណោមអាទិភាពចម្បងៗ។
រីឯវេទិកាក្រុម G20 ជាមួយនឹងប្រធានបទ «ងើបឡើងវិញទាំងអស់គ្នា ងើបឡើងវិញកាន់តែរឹងមាំ» មានគោលបំណងជួយសម្រួលដល់ការងើបឡើងវិញដ៏រឹងមាំ និងប្រកបដោយបរិយាប័ន្នសម្រាប់ទាំងអស់គ្នា។
តាមរយៈសេចក្ដីប្រកាសរួមនេះ ប្រធានាធិបតីឥណ្ឌូនេស៊ីប្តេជ្ញាថា ក្រុម G20 មានសារៈសំខាន់មិនមែនត្រឹមតែសម្រាប់សមាជិករបស់ខ្លួនប៉ុណ្ណោះទេ ប៉ុន្តែសម្រាប់ពិភពលោកទាំងមូលផងដែរ ជាពិសេសប្រទេសកំពុងអភិវឌ្ឍន៍។
បើតាមសេចក្ដីប្រកាសរួមនេះ ក្រុម G20 បានកំណត់អាទិភាពលើវិស័យចំនួន ៣ ពោលគឺការពង្រឹងនិម្មាបនកម្មសុខភាពសកល ការផ្លាស់ប្តូរបែបឌីជីថល និងការផ្លាស់ប្តូរថាមពលក្នុងគោលដៅធ្វើយ៉ាងណាឱ្យ G20 អាចដើរតួជាកាតាលីករ សម្រាប់ការងើបឡើងវិញជាសកលដ៏រឹងមាំ និងប្រកបដោយបរិយាប័ន្ន។
ចំណែក APEC ដែលជាវេទិកាពិសេសមានសមាសភាពជាសេដ្ឋកិច្ចជាជាងជាបណ្តារដ្ឋនៅអាស៊ីប៉ាស៊ីហ្វិក ដែលការងារកំពុងបន្តធ្វើ គឺវិធីពន្លឿនសមាហរណកម្មសេដ្ឋកិច្ចក្នុងតំបន់ ដើម្បីសម្រេចបានវិបុលភាពរួម។
មូលបទ APEC ឆ្នាំ ២០២២ គឺ«បើកចំហ តភ្ជាប់ តុល្យភាព» ឆ្លុះបញ្ចាំងអំពីគោលដៅ និងការប្តេជ្ញាចិត្តរួមរបស់សេដ្ឋកិច្ចនៃសមាជិកវេទិកានេះក្នុងការដោះស្រាយបញ្ហាប្រឈមដ៏ធំសម្បើមដែលកើតចេញពីជំងឺរាតត្បាត និងជម្លោះដែលបានជះផលប៉ះពាល់អវិជ្ជមាននៅទូទាំងពិភពលោក។ មូលបទនេះមានគោលបំណងជំរុញនូវចក្ខុវិស័យសហគមន៍អាស៊ី-ប៉ាស៊ីហ្វិកបើកចំហ ស្វាហាប់ ធន់ និងសន្តិភាព។ នេះបើតាមសេចក្ដីប្រកាសរួម។
ក្នុងនាមជាម្ចាស់ផ្ទះ ប្រទេសថៃអំពាវនាវឱ្យមានការសន្ទនាឡើងវិញអំពីតំបន់ពាណិជ្ជកម្មសេរីអាស៊ីប៉ាស៊ីហ្វិក គាំទ្រការវិលត្រឡប់ទៅកាន់ការធ្វើដំណើរប្រកបដោយសុវត្ថិភាព និងរលូន ហើយសង្កត់ធ្ងន់លើបរិយាប័ន្ន និងនិរន្តរភាព តាមរយៈការអនុវត្តគំរូសេដ្ឋកិច្ចជីវៈវិលជុំ-បៃតង ដែលជាធាតុផ្សំដ៏សំខាន់ក្នុងការជួយស្តារតំបន់ និងពិភពលោកពីបញ្ហាជំងឺរាតត្បាតកូវីដ ១៩។
កម្ពុជា ឥណ្ឌូនេស៊ី និងថៃ ប្រកាសថា៖ «ក្នុងនាមជាប្រធាននៃកិច្ចប្រជុំសំខាន់ៗដូចខាងលើនៅក្នុងឆ្នាំនេះយើងប្តេជ្ញាធ្វើការជាមួយដៃគូ និងអ្នកពាក់ព័ន្ធទាំងអស់ ដើម្បីធានាស្មារតីកិច្ចសហប្រតិបត្តិការ ខណៈដែលយើងនៅក្នុងតំបន់អាស៊ីអាគ្នេយ៍បន្តពង្រឹងភាពមជ្ឈភាព ភាពជឿជាក់ និងសារៈសំខាន់របស់អាស៊ានក្នុងការរក្សាសន្តិភាព និងស្ថិរភាពនៅក្នុងរបស់យើងក៏ដូចជាកិច្ចប្រឹងប្រែងនានាក្នុងតំបន់ និងពិភពលោក»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជា បានលើកឡើងថា ការទទួលបានឯកសិទ្ធិធ្វើជាម្ចាស់ផ្ទះកិច្ចប្រជុំមេដឹកនាំសំខាន់ៗចំនួន ៣ នេះបានបង្ហាញថា កម្ពុជារឹតតែមានភាពសំខាន់ឡើងថែមទៀតក្នុងតួនាទីនៃកិច្ចការតំបន់ និងអន្តរជាតិដែលតួនាទីទាំងនេះត្រូវបានឆ្លុះបញ្ចាំងតាមរយៈសកម្មភាពផ្សេងៗដែលកម្ពុជាមាននៅក្នុងក្របខ័ណ្ឌកិច្ចការតំបន់ និងពិភពលោក។
លោកថ្លែងថា៖ «ការទទួលបានឯកសិទ្ធិធ្វើជាម្ចាស់ផ្ទះកិច្ចប្រជុំមេដឹកនាំសំខាន់ៗចំនួន៣ នេះក៏បង្ហាញពីការយកចិត្ដទុកដាក់របស់រាជរដ្ឋាភិបាលកម្ពុជាក្នុងការប្រកាន់ភ្ជាប់ក្នុងគោលការណ៍ពហុភាគីដែលកម្ពុជាតែងតែប្រកាន់ខ្ជាប់នូវគោលការណ៍ពហុភាគីនិយមក្នុងការដោះស្រាយបញ្ហាផ្សេងៗដែលជាកង្វល់រួមទាំងក្របខ័ណ្ឌតំបន់ និងអន្តរជាតិចំពោះបញ្ហាជាច្រើនដែលមិនអាចត្រូវបានដោះស្រាយបានដោយរដ្ឋ ឬប្រទេសណាមួយដាច់តែឯងបាន»៕
