.jpg)
សមត្ថកិច្ចចុះត្រួតពិនិត្យ ហាងលក់វិទ្យុទាក់ទងមួយ ពីថ្ងៃទី ២ ខែឧសភា។ រូបថត ហ្វេសប៊ុក
ភ្នំពេញៈ នាយកដ្ឋានវិទ្យុទាក់ទងនៃអគ្គស្នងការដ្ឋាននគរបាលជាតិ និងនិយតករទូរគមនាគមន៍កម្ពុជា កំពុងចុះត្រួតពិនិត្យកន្លែងលក់វិទ្យុទាក់ទង (អាយកូម) ដែលជាផ្នែកនៃការបង្ក្រាបការធ្វើអាជីវកម្មខុសច្បាប់នៅតាមតំបន់មួយចំនួន ក្នុងរាជធានីភ្នំពេញ និងតម្រូវឱ្យម្ចាស់អាជីវកម្មលក់វិទ្យុទាក់ទងត្រូវសុំច្បាប់ឱ្យបានត្រឹមត្រូវ។
លោកឧត្តមសេនីយ៍ឯក ឆាយ គឹមឃឿន អ្នកនាំពាក្យអគ្គស្នងការនគរបាលជាតិ ប្រាប់ភ្នំពេញប៉ុស្តិ៍នៅថ្ងៃទី ៤ ឧសភា ថា នាយកដ្ឋានវិទ្យុទាក់ទងកំពុងតែបន្តចុះត្រួតពិនិត្យទីតាំងធ្វើអាជីវកម្មលក់វិទ្យុទាក់ទង ដែលជាប្រតិបត្តិការលើកដំបូងដែលមានទាំងការសម្របសម្រួលផ្នែកផ្លូវច្បាប់ និងមានកិច្ចសហការពីខាងនិយតករទូរគមនាគមន៍កម្ពុជា។
លោកពន្យល់ថា តាមពិតទៅកិច្ចការនេះ មិនមែនជាកិច្ចការរបស់នាយកដ្ឋានវិទ្យុទាក់ទងទេ តែជាកិច្ចការ របស់និយតករទូរគមនាគមន៍កម្ពុជា ដែលបានស្នើសុំកិច្ចសហការជាមួយអគ្គស្នងការដ្ឋាននគរបាលជាតិដែលមាននាយកដ្ឋានវិទ្យុទាក់ទង ដើម្បីចូលរួមប្រតិបត្តិការ។ កិច្ចសហការនេះគឺដើម្បីបង្ក្រាបការធ្វើអាជីវកម្មវិទ្យុទាក់ទងខុសច្បាប់ ឬគ្មានច្បាប់អនុញ្ញាត។ ទន្ទឹមនឹងនេះកម្លាំងចម្រុះ ក៏នឹងធ្វើការណែនាំដល់ម្ចាស់អាជីវកម្មលក់វិទ្យុទាក់ទងខុសច្បាប់ទាំងនោះឱ្យពួកគាត់ទៅសុំច្បាប់ឱ្យបានត្រឹមត្រូវ។
លោកថ្លែងថា៖ «ករណីនេះ ខ្ញុំក៏មិនទាន់បានទទួលរបាយការណ៍លម្អិតដែរ ព្រោះបងប្អូនយើងកំពុងតែធ្វើការ ប៉ុន្តែប្រតិបត្តិការនេះ កម្លាំងនគរបាលវិទ្យុទាក់ទងយើងបានកំពុងធ្វើហើយ។ តែគោលការណ៍នេះគេចុះពិនិត្យណែនាំសិន លើកលែងតែគាត់រឹងទទឹងគឺត្រូវអនុវត្តតាមច្បាប់»។
លោក ឈឿន ប៊ុនឆន ប្រធាននាយកដ្ឋានវិទ្យុទាក់ទងនៃអគ្គស្នងការដ្ឋាននគរបាលជាតិឱ្យដឹងនៅថ្ងៃទី ៤ ឧសភា ថា កាលពីថ្ងៃទី ២ ឧសភា កម្លាំងនាយកដ្ឋានវិទ្យុទាក់ទងបានចុះប្រតិបត្តិការនៅម្តុំផ្សារទួលទំពូងហើយប្រតិបត្តិការនេះក៏កំពុងនៅតែបន្តដែរ។ ទីតាំងលក់វិទ្យុទាក់ទងក៏មានច្រើនទីតាំងដែរដែលគ្មានច្បាប់អនុញ្ញាត ហើយលោកក៏មិនអាចបញ្ជាក់ប្រាប់ពីចំនួនពិតប្រាកដបានដែរ ព្រោះសមត្ថកិច្ចកំពុងតែបន្តធ្វើការងារនេះនៅឡើយ។
លោកថ្លែងថា៖ «យើងបានកំណត់គោលដៅបានអស់ហើយ ហើយបើគិតដល់ថ្ងៃនេះ (ថ្ងៃទី ៤ ឧសភា) យើងអនុវត្តការងារបានប្រហែលជាពី ៥០ ទៅ ៦០ ភាគរយហើយ ហើយយើងធ្វើទាល់តែអស់នៅក្នុងរាជធានីភ្នំពេញ និងឈានទៅទូទាំងប្រទេសតែម្តង»។
ភ្នំពេញ ប៉ុស្តិ៍ បានព្យាយាមទាក់ទងទៅនិយតករទូរគមនាគមន៍កម្ពុជាតាមសារអេឡិចត្រូនិកអ៊ីមែល ដើម្បីសុំការពន្យល់បន្ថែម ប៉ុន្តែមិនទាន់ទទួលបានការឆ្លើយតបនៅឡើយ៕
វីដេអូ៖
