.jpg)
លោក ហ៊ុន ណេង និងលិខិតជូនដំណឹងរបស់ក្រុមគ្រួសារ ពីមរណភាពរបស់លោក នៅល្ងាចថ្ងៃទី ៥ ខែឧសភា។ រូបថត សហការី
កំពង់ចាមៈ លោក ហ៊ុន ណេង ប្រធានគណៈកម្មការទី៤ នៃរដ្ឋសភា ដែលជាបងប្រុសបង្កើតរបស់លោកនាយករដ្ឋមន្រ្តី ហ៊ុន សែន បានទទួលមរណភាព ដោយសារជំងឺគាំងបេះដូង នៅល្ងាចថ្ងៃទី ០៥ ខែ ឧសភា ឆ្នាំ ២០២២ នេះ ក្នុងជន្មាយុ ៧២ ឆ្នាំ។
នៅយប់ថ្ងៃទី ៥ ខែ ឧសភា ឆ្នាំ ២០២២ នេះ ក្រុមគ្រួសារ បានចេញសេចក្តីជូនដំណឹងជាផ្លូវការ ពីមរណភាព របស់លោក ហ៊ុន ណេង ដែលបានទទួលមរណភាព ដោយ«ជំងឺបេះដូង» នៅម៉ោង ៦និង ២៥ នាទីល្ងាច។
សេចក្តីជូនដំណឹងបានបន្តថា៖ «សពរបស់ឯកឧត្តម ហ៊ុន ណេង នឹងត្រូវតម្កល់ធ្វើបុណ្យនៅគេហដ្ឋាន ភូមិទី៧ សង្កាត់កំពង់ចាម ក្រុងកំពង់ចាម ខេត្តកំពង់ចាម ទៅតាមប្រពៃណីព្រះពុទ្ធសាសនា»។
សេចក្តីជូនដំណឹងរបស់ក្រុមគ្រួសារ បានបន្តទៀតថា នៅថ្ងៃទី ៩ ខែ ឧសភា ឆ្នាំ ២០២២ សពលោក ហ៊ុន ណេង នឹងត្រូវដង្ហែទៅបញ្ចុះនៅវត្តសុវណ្ណគិរីរតនៈ ភ្នំប្រុស ភូមិត្រពាំងចារ ឃុំក្រឡា ស្រុកកំពង់សៀម ខេត្តកំពង់ចាម៕
