ភ្នំពេញៈ អង្គការមូលនិធិបង្ការរបួសអាស៊ី (AIP Foundation) ដោយមានការគាំទ្រពីទីភ្នាក់ងារជំនួយអាមេរិក USAID តាមរយៈមជ្ឈមណ្ឌលសាមគ្គីភាពនៅថ្ងៃទី ៥ ខែឧសភា បានប្រកាសចាប់ផ្តើមអនុវត្ត «យុទ្ធនាការហ៊ាននិយាយ» ដើម្បីលើកកម្ពស់សុវត្ថិភាពចរាចរណ៍ សម្រាប់កម្មករនិយោជិត។
យោងតាមសេចក្ដីប្រកាសព័ត៌មានឱ្យដឹងថា ការប្រកាសអនុវត្តយុទ្ធនាការនេះ គឺដើម្បីលើកកម្ពស់សុវត្ថិភាពចរាចរណ៍ សម្រាប់កម្មករនិយោជិត ដើម្បីកៀរគរការយកចិត្តទុកដាក់ពីប្រព័ន្ធផ្សព្វផ្សាយ និងពង្រឹងទំនាក់ទំនង និងលើកម្ពស់កិច្ចសហការ និងសកម្មភាពរួមគ្នារវាងភាគីពាក់ព័ន្ធដែលខិតខំរួមចំណែកធ្វើឱ្យប្រសើរឡើងនូវសុវត្ថិភាពចរាចរណ៍ សម្រាប់កម្មករនិយោជិតក្នុងវិស័យកាត់ដេរសម្លៀកបំពាក់ និងផលិតស្បែក។
ដូច្នេះកម្មវិធី «លើកកម្ពស់សុវត្ថិភាពចរាចរណ៍សម្រាប់កម្មករនិយោជិតកម្ពុជា» គឺមានគោលបំណងលើកកម្ពស់ការយល់ដឹង និងផ្លាស់ប្តូរឥរិយាបថរបស់កម្មករ និយោជិត ក្នុងវិស័យកាត់ដេរសម្លៀកបំពាក់ និងផលិតស្បែកជើង និងអ្នកបើកបររថយន្តដឹកកម្មករ តាមរយៈសកម្មភាពនានា ដូចជាការផ្សព្វផ្សាយផ្តល់ព័ត៌មាននៅកម្រិតរោងចក្រ កិច្ចសន្ទនា និងការបង្កើត និងអនុវត្តគោលនយោបាយសុវត្ថិភាពចរាចរណ៍នៅកម្រិតរោងចក្រ។ នេះបើតាម អង្គការ AIP ។
សេចក្ដីប្រកាសឱ្យដឹងថា៖ «តាមរយៈយុទ្ធនាការនេះការធ្វើសកម្មភាពតាមរយៈប្រព័ន្ធបណ្តាញទំនាក់ទំនងសង្គមនឹងជួយពង្រឹង និងពង្រីកតម្រូវការសម្រាប់ការផ្លាស់ប្តូរនេះ ចំពោះកម្មករនិយោជិតដែលមានហានិភ័យខ្ពស់»។
លោក គឹម បញ្ញា នាយកអង្គការមូលនិធិបង្ការរបួសអាស៊ីប្រចាំនៅកម្ពុជាថ្លែងក្នុងសន្និសីទសារព័ត៌មានប្រកាសផ្តើមអនុវត្តយុទ្ធនាការនេះថា ការប្រកាសផ្តើមអនុវត្តយុទ្ធនាការនេះ គឺដើម្បីលើកកម្ពស់សុវត្ថិភាពចរាចរណ៍សម្រាប់កម្មករនិយោជិត ដើម្បីជូនដំណឹងឱ្យបានទូលំទូលាយដល់សាធារណជន និងប្រព័ន្ធផ្សព្វផ្សាយអំពី «យុទ្ធនាការហ៊ាននិយាយ» នេះ។ «យុទ្ធនាការនេះក៏ដើម្បីកៀរគរការយកចិត្តទុកដាក់ពីប្រព័ន្ធផ្សព្វផ្សាយ និងធានាថា ប្រព័ន្ធផ្សព្វផ្សាយជាយន្តការដ៏មានឥទ្ធិពលក្នុងការការគ្របដណ្តប់ការផ្សព្វផ្សាយព័ត៌មានអំពីយុទ្ធនាការហ៊ាននិយាយយ៉ាងទូលំទូលាយ។ ផ្សព្វផ្សាយអំពីកម្មវិធី និងលើកទឹកចិត្តឱ្យសំឡេងរបស់ជនបង្គោលសុវត្ថិភាពចរាចរណ៍ត្រូវបានឮ និងយកចិត្តទុកដាក់ឆ្លើយតប»។
តាមរយៈសន្និសីទនេះលោក បញ្ញា លើកទឹកចិត្តដល់អ្នកពាក់ព័ន្ធពិសេសអ្នកសារព័ត៌មានពិនិត្យលទ្ធភាពបង្កើនការផ្សព្វផ្សាយឱ្យបានទូលំទូលាយ ដើម្បីជំរុញឱ្យមានការចូលរួមពីកម្មករនិយោជិតនៅរោងចក្រផ្សេងទៀតលើការហ៊ាននិយាយ ដើម្បីសុវត្ថិភាពចរាចរណ៍,ហ៊ាននិយាយអំពីសុវត្ថិភាពចរាចរណ៍ ដើម្បីបង្ការខ្លួនឯង និងកម្មករនិយោជិតដទៃទៀតពីគ្រោះថ្នាក់ចរាចរណ៍ហ៊ាននិយាយ ដើម្បីទទួលបានមធ្យោបាយធ្វើដំណើរសមរម្យ និងមានសុវត្ថិភាពជាដើម។
លោកថា៖ «ការលើកកម្ពស់សុវត្ថិភាពចរាចរណ៍សម្រាប់កម្មករនិយោជិត ដែលជាអ្នករួមចំណែកយ៉ាងសំខាន់ (តាមរយៈការផ្តល់កម្លាំងពលកម្ម និងចំណូល) ចំពោះការរីកចម្រើនរបស់រោងចក្រ សហគ្រាសគ្រួសារ សហគមន៍ដែលគាត់រស់នៅ និងសេដ្ឋកិច្ចជាតិផងពីគ្រោះថ្នាក់ចរាចរណ៍ គឺជាការការពារការខាតបង់របស់រដ្ឋាភិបាល រោងចក្រ អ្នកពាក់ព័ន្ធក្នុងឧស្សាហកម្ម និងសង្គមទាំងមូល»។
បើតាមលោកបញ្ញាក្នុងចំណោមជនរងគ្រោះ ២ ១៥២ នាក់ ដែលបានស្លាប់ដោយសារគ្រោះថ្នាក់ចរាចរណ៍កាលពីឆ្នាំ ២០១៩ មានប្រមាណជិត ៣០% គឺជាកម្មករនិយោជិត (គ្រប់វិស័យ) ហើយបើយោងតាមរបាយការណ៍ស្តីពីលទ្ធផលការងារសម្រេចបាននៅក្នុងឆ្នាំ ២០២១ និងទិសដៅអនុវត្តបន្តឆ្នាំ ២០២២ របស់បេឡាជាតិសនិ្តសុខសង្គមបានបង្ហាញថាជាង ៤៩% នៃកម្មករនិយោជិត ដែលរងគ្រោះដោយសារហានិភ័យការងារដែលបានរាយការណ៍គឺជាគ្រោះថ្នាក់ពេលធ្វើដំណើរ (គ្រោះថ្នាក់ចរាចរណ៍)។ លោកបញ្ជាក់ថា៖ «ក្នុងចំណោមកម្មករនិយោជិតដែលទទួលរងគ្រោះថ្នាក់ប្រមាណពាក់កណ្តាលនៃពួកគេ គឺជាកម្មករនិយោជិតដែលបម្រើការងារក្នុងវិស័យកាត់ដេរសម្លៀកបំពាក់ និងផលិតស្បែកជើង»។
តាម ប.ស.ស ឱ្យដឹងថា ក្នុងឆ្នាំ ២០២១ ទោះបីកម្ពុជាកំពុងប្រឈមនឹងការរីករាលដាលនៃជំងឺកូវីដ ដែលធ្វើឱ្យលំហូរចរាចរណ៍នៅលើដងផ្លូវ មានការថយចុះក៏ដោយ ក៏គិតជាមធ្យមមានកម្មករនិយោជិតវិស័យកាត់ដេរសម្លៀកបំពាក់ និងផលិតស្បែកជើងដែលធ្វើដំណើរទៅមកបំពេញការងារប្រមាណ ២០៩ នាក់ទទួលរងគ្រោះ ដោយសារគ្រោះថ្នាក់ចរាចរណ៍ក្នុង ១ ខែៗ។
ចំណែកករណីជាច្រើនកម្មករនិយោជិតដែលរងគ្រោះត្រូវសម្រាកថែទាំនៅមន្ទីរពេទ្យ និងផ្ទះរបស់ខ្លួនជាច្រើនថ្ងៃខែ ឯខ្លះទៀតត្រូវធ្លាក់ខ្លួនពិការ បាត់បង់សមត្ថភាពបំពេញការងារ និងការងារសម្រាប់ទ្រទ្រង់ជីវភាពគ្រួសារតម្រូវឱ្យឪពុកម្តាយ ឬបងប្អូនសាច់ញាតិត្រូវទទួលបន្ទុកនៅមើលថែទាំជាប្រចាំ និងធ្វើឱ្យប៉ះពាល់ដល់ផលិតភាពរបស់រោងចក្រ។ល៕