ភ្នំពេញៈ ជនសង្ស័យចំនួន ៣៣ នាក់ត្រូវបានសមត្ថកិច្ចឃាត់ខ្លួន ក្នុងប្រតិបត្តិការបង្ក្រាបបទល្មើសគ្រឿងញៀនចំនួន ១១ ករណីទូទាំងប្រទេសនៅថ្ងៃទី ០៥ ខែឧសភា ក្នុងនោះមានជនសង្ស័យម្នាក់នៅស្រុកមោងឫស្សី ខេត្តបាត់ដំបង ត្រូវបានសមត្ថកិច្ចចាប់ឃាត់ខ្លួនជាមួយនឹងគ្រឿងញៀនមួយចំនួន។
បើតាមអគ្គស្នងការដ្ឋាននគរបាលជាតិក្នុងចំណោមជនសង្ស័យទាំងចំនួន ៣៣ នាក់ ដែលត្រូវបានសមត្ថកិច្ចចាប់ឃាត់ខ្លួនរួមមាន ជួញដូរ ៤ ករណី ឃាត់ខ្លួន ៥ នាក់ ដឹកជញ្ជូន រក្សាទុក ១ ករណី ឃាត់ខ្លួន ១ នាក់ និងប្រើប្រាស់ចំនួន ៦ ករណី ឃាត់ខ្លួន ២៧ នាក់។
វត្ថុតាងដែលចាប់យកបានសរុបក្នុងថ្ងៃទី ០៥ ខែឧសភា រួមមាន មេតំហ្វេតាមីន(Ice) ចំនួន ១១១,៥៦ ក្រាម។
លទ្ធផលទាំងនេះត្រូវបានធ្វើឡើងដោយកងកម្លាំងមន្ទីរប្រយុទ្ធប្រឆាំងគ្រឿងញៀន កងកម្លាំងនគរបាលខេត្តបន្ទាយមានជ័យ កំពង់ឆ្នាំង រាជធានីភ្នំពេញ ព្រៃវែង ពោធិ៍សាត់ និងសៀមរាប។
នៅថ្ងៃដដែលនេះដែរ កងកម្លាំងនគរបាលខេត្តបាត់ដំបងបានចាប់ឃាត់ខ្លួនជនសង្ស័យម្នាក់ឈ្មោះ រ័ត្ន ណាក់រីន ភេទប្រុស អាយុ ២៤ ឆ្នាំរស់នៅភូមិម្រះព្រៅ ឃុំជ្រៃ ស្រុកមោងឫស្សី។
ការចាប់ឃាត់ខ្លួននេះបានធ្វើឡើងនៅវេលាម៉ោង ១០ និង ២៥ នាទី នៅវាលស្រែ ចំណុចក្រុមទី ០២ ភូមិត្រស់ ឃុំតាលាស់ ស្រុកមោងឫស្សី។
វត្ថុតាងចាប់យកបាន មានម្សៅក្រាមពណ៌សថ្លាច្រកក្នុងថង់ប្លាស្ទិកសថ្លាចំនួន ០១ កូន បំពង់ជក់ថ្នាំញៀនចំនួន ០១ ដែកកេះចំនួន ០១ ទូរសព្ទដៃចំនួន ០១ គ្រឿង ម៉ូតូចំនួន ០១ គ្រឿង ។
បច្ចុប្បន្ន ជនសង្ស័យខាងលើត្រូវបានឃាត់ខ្លួនជាបណ្តោះអាសន្ននៅអធិការដ្ឋាននគរបាលស្រុកមោងឫស្សី ដើម្បីកសាងសំណុំរឿងបញ្ជូនទៅការិយាល័យជំនាញអនុវត្តតាមនីតិវិធី៕