ព្រះវិហារៈ សិក្ខាសាលាពិគ្រោះយោបល់មួយត្រូវបានរៀបចំឡើងនាថ្ងៃទី ៥ ខែឧសភានេះនៅសាលប្រជុំសាលាខេត្តព្រះវិហារក្នុងខេត្តព្រះវិហារ ដើម្បីប្រមូលធាតុចូលស្តីពីការកាន់កាប់អាស្រ័យផលរបស់សហគមន៍ សម្រាប់វិសោធនកម្មច្បាប់ស្តីពីព្រៃឈើ និងច្បាប់ស្តីពីតំបន់ការពារធម្មជាតិ។
សិក្ខាសាលានេះត្រូវបានរៀបចំឡើងដោយអង្គការមិនមែនរដ្ឋាភិបាលស្តីពីកម្ពុជា (NGOF) ក្រោមកិច្ចសហការជាមួយគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) ដែល គាំទ្រថវិកាដោយអង្គការ MRLG, UNDP, Client Earth, Oxfam, NPA, Diakonia, HEKS/EP, ILC និងមានអ្នកចូលរួមសរុប ៩៥ នាក់ ក្រោមអធិបតីភាពលោក ចាន់ សុធា អនុរដ្ឋលេខាធិការក្រសួងមហាផ្ទៃ។ សិក្ខាសាលានេះមានការចូលរួមពីស្ថាប័នពាក់ព័ន្ធ និងសហគមន៍ក្នុងខេត្តចំនួន ៥ រួមមាន ព្រះវិហារ កំពង់ធំ បាត់ដំបង ឧត្តរមានជ័យ និងខេត្តសៀមរាប។ នេះបើយោងតាម NGOF កាលពីថ្ងៃទី ៥ ខែឧសភា។
លោក តឹក វណ្ណារ៉ា នាយកប្រតិបត្តិ NGOF បានថ្លែងថាចាប់តាំងពីឆ្នាំ ២០១៨ មកបណ្តាញអភិបាលកិច្ចព្រៃឈើនៃអង្គការសង្គមស៊ីវិលបានចូលរួមចំណែកយ៉ាងសកម្មជាមួយក្រសួងពាក់ព័ន្ធ និងដៃគូអភិវឌ្ឍន៍ក្នុងការពិគ្រោះយោបល់ និងប្រមូលធាតុចូលពីប្រជាសហគមន៍ សង្គមស៊ីវិល ស្ថាប័នសិក្សាស្រាវជ្រាវ និងអ្នកពាក់ព័ន្ធនានា ដើម្បីរួមចំណែកក្នុងដំណើរការធ្វើវិសោធនកម្មច្បាប់ស្តីពីព្រៃឈើ និងច្បាប់ស្តីពីតំបន់ការពារធម្មជាតិ ឬធ្វើសេចក្តីព្រាងច្បាប់ថ្មី។ ច្បាប់ទាំង ២ នេះមានសារៈសំខាន់ណាស់ក្នុងការធានាដល់ចីរភាពនៃធនធានធម្មជាតិ ធនធានព្រៃឈើ និងការធានាបាននូវប្រព័ន្ធចិញ្ចឹមជីវិតរបស់ប្រជាជនប្រកបដោយចីរភាព ទាំងផែ្នកអភិរក្ស បរិស្ថាន សង្គម និងការអភិវឌ្ឍសេដ្ឋកិច្ច។
NGOF បានបញ្ជាក់ថា សិក្ខាសាលានេះមានគោលបំណងសំខាន់ៗចំនួន ៣ រួមមាន៖ ស្វែងយល់អំពីសេចក្តីព្រាងច្បាប់ព្រៃឈើ និងច្បាប់តំបន់ការពារធម្មជាតិ និងការសិក្សាអំពីបទដ្ឋានពាក់ព័ន្ធនឹងការកាន់កាប់អាស្រ័យផលរបស់សហគមន៍ក្នុងតំបន់ព្រៃឈើ រួមទាំង បទដ្ឋានពាក់ព័ន្ធសហគមន៍តំបន់ការពារធម្មជាតិ, លទ្ធផលផ្តល់ឱកាសឱ្យមានការពិភាក្សាប្រមូលធាតុចូលពីរដ្ឋបាលថ្នាក់ក្រោមជាតិ សង្គមស៊ីវិល និងសហគមន៍មូលដ្ឋាន សម្រាប់ដំណើរការវិសោធនកម្មច្បាប់ស្ដីពីព្រៃឈើ និងច្បាប់ស្ដីពីតំបន់ការពារធម្មជាតិ និងចុងក្រោយគឺរៀបចំកិច្ចប្រជុំពិគ្រោះយោបល់ថ្នាក់ជាតិជាមួយអន្តរក្រសួង អង្គការសង្គមស៊ីវិល ដៃគូអភិវឌ្ឍ និងតំណាងសហគមន៍មូលដ្ឋាន ដើម្បីពិភាក្សាលម្អិតអំពីធាតុចូល ដែលទទួលបានពីថ្នាក់ក្រោមជាតិ៕