ភ្នំពេញៈ ក្រសួងកសិកម្ម រុក្ខាប្រមាញ់ និងនេសាទ និងសាធារណរដ្ឋឆែកបានឯកភាពគ្នារៀបចំឯកសារអនុស្សរណ:នៃការយោគយល់គ្នាស្តីពី "កិច្ចសហប្រតិបត្តិការលើវិស័យកសិកម្ម" រវាងប្រទេសទាំងពីរ បន្ទាប់ពីបានពិភាក្សាគ្នាស៊ីជម្រៅរួចមក។
កិច្ចពិភាក្សានេះត្រូវបានធ្វើឡើងរវាងរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន និងឯកអគ្គរដ្ឋទូតនៃសាធារណរដ្ឋឆែកប្រចាំកម្ពុជា នៅទីស្តីការក្រសួងកាលពីថ្ងៃព្រហស្បតិ៍ទី ៥ ខែឧសភា ឆ្នាំ ២០២២ នេះ។
ភាគីទាំងពីរបានលើកយកប្រធានបទសំខាន់ៗមកពិភាក្សាគ្នា ដែលជាជំហានបឋមក្នុងការធ្វើកិច្ចសហប្រតិបត្តិការរវាងប្រទេសទាំងពីរទាក់ទងនឹងការអភិវឌ្ឍវិស័យកសិកម្ម រុក្ខាប្រមាញ់ និងនេសាទនាពេលអនាគត។ ក្នុងនោះរួមមានការងារបណ្តុះបណ្តាលធនធានមនុស្សទាំងរយ:ពេលខ្លី និងពេលវែង ការផ្លាស់ប្តូរមន្ត្រីជំនាញឱ្យទៅធ្វើទស្សនកិច្ចសិក្សា ដើម្បីដកស្រង់បទពិសោធលើការងារអនុវត្តបច្ចេកទេសផ្ទាល់, ការអភិវឌ្ឍវិស័យវារីវប្បកម្មទាំងទឹកសាប និងសមុទ្រ, ការធ្វើទំនើបកម្មកសិកម្ម និងការពង្រឹងសមត្ថភាពលើការកែច្នៃកសិផល។
ហ្វេសប៊ុកលោករដ្ឋមន្ត្រីបានសរសេរថា៖ «បន្ទាប់ពីបានពិភាក្សាគ្នាស៊ីជម្រៅរួចមក ភាគីទាំងពីរបានឯកភាពគ្នារៀបចំឯកសារអនុស្សរណ:នៃការយោគយល់គ្នា (MOU) ស្តីពី "កិច្ចសហប្រតិបត្តិការលើវិស័យកសិកម្ម" រវាងប្រទេសទាំងពីរ បន្ទាប់មកនឹងឈានទៅអនុវត្តលើខ្លឹមសារ MOU នេះឱ្យចេញជាផ្លែផ្កា ដើម្បីជាប្រយោជន៍សម្រាប់ប្រទេសទាំងពីរ»។
លោករដ្ឋមន្ត្រីមានក្តីសង្ឃឹម និងការជឿជាក់យ៉ាងមុតមាំថា នាពេលអនាគតដ៏ខ្លីកិច្ចសហប្រតិបត្តិការនេះនឹងលេចចេញជារូបរាង និងទទួលបានជោគជ័យ ជាពិសេសគឺភាគីកម្ពុជាផ្ទាល់ដែលកំពុងត្រូវការកសាងធនធានមនុស្សតាមរយ:ការបណ្តុះបណ្តាល ការលើកកម្ពស់គុណភាព និងផលិតភាពផលិតកម្មកសិកម្ម ដើម្បីឆ្លើយតបតាមតម្រូវការទីផ្សារនាំចេញ និងជាពិសេសទៅកាន់ទីផ្សារអឺរ៉ុប។
ឆ្លៀតឱកាសនេះ លោករដ្ឋមន្ត្រីក៏បានថ្លែងអំណរគុណផងដែរជូនចំពោះរដ្ឋាភិបាលឆេក ដែលបានទិញអង្ករពីកម្ពុជាចំនួនជាង ៧០០០ តោនក្នុងឆ្នាំ ២០២១ ហើយសង្ឃឹមថាបរិមាណនេះនឹងកើនឡើងនាពេលអនាគត។
ជំនួបបានបញ្ចប់ក្នុងបរិយាកាសមិត្តភាព និងឆន្ទ:រួមគ្នាថានឹងរឹតចំណងកិច្ចសហប្រតិបត្តិការរវាងប្រទេសទាំងពីរឱ្យកាន់តែល្អប្រសើរលើវិស័យកសិកម្មនាពេលអនាគត៕