.jpg)
រូបភាព ក្រសួងសុខាភិបាលនៃព្រះរាជាណាចក្រកម្ពុជា
នាយកគ្រប់គ្រងប្រចាំតំបន់ និងជាអនុប្រធានដឹកនាំជាន់ខ្ពស់ US-ABC (ក្រុមប្រឹក្សាធុរៈកិច្ចអាស៊ាន-អាមេរិក) លោក Michael Michalak បានអបអរសាទរដោយក្តីកោតសរសើរប្រទេសកម្ពុជា ដែលបានទទួលជោគជ័យ ក្នុងការប្រយុទ្ធប្រឆាំងនឹងជំងឺរាតត្បាតជាសកលកូវីដ ១៩។
លោកលើកឡើងដូចនេះ ក្នុងជំនួបជាមួយលោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស នាថ្ងៃទី ០៥ ខែឧសភា ឆ្នាំ ២០២២។
លោក Michael Michalak នាយកគ្រប់គ្រងប្រចាំតំបន់ និងជាអនុប្រធានដឹកនាំជាន់ខ្ពស់ US-ABC បានលើកឡើងថា៖ «សូមអបអរកម្ពុជាក្នុងការធ្វើជាប្រធានអាស៊ាន និងអបអរសាទរដោយក្តីកោតសរសើរដល់ប្រទេសកម្ពុជា ដែលបានប្រយុទ្ធប្រឆាំងនឹងជំងឺកូវីដ ១៩ រហូតបានទទួលជោគជ័យ»។
នាឱកាសនោះដែរ លោកស្រី ឱ វណ្ណឌីន ក៏បានថ្លែងអំណរគុណដល់រដ្ឋាភិបាលសហរដ្ឋអាមេរិកដែលបានផ្តល់អំណោយវ៉ាក់សាំងកូវីដ ១៩ ប្រភេទ Pfizer ចំនួនជិត ២ លានដូសដល់ប្រជាជន និងរាជរដ្ឋាភិបាលកម្ពុជាក្នុងពេលថ្មីៗនេះ។
លោកស្រីមានប្រសាសន៍ថា៖ «ទោះបីយើងរស់ក្នុងបរិបទកូវីដ ១៩ តែវិស័យពាណិជ្ជកម្ម យើងនៅតែមានដំណើរការ និងសហការជាប្រចាំ។ ចំពោះលទ្ធផលនៃកិច្ចខិតខំប្រឹងប្រែងរបស់រាជរដ្ឋាភិបាល ក្រោមការដឹកនាំដ៏ឈ្លាសវៃប្រកបដោយគតិបណ្ឌិត របស់សម្តេចតេជោ ក្នុងការប្រយុទ្ធជាមួយជំងឺកូវីដ ១៩ និងជោគជ័យក្នុងការចាក់វ៉ាក់សាំងកូវីដ ១៩ ដល់ប្រជាពលរដ្ឋដែលមកដល់ថ្ងៃនេះយើងចាក់វ៉ាក់សាំងបាន ៩៣,៤៩% នេះ ជាលទ្ធផលនៃកិច្ចខិតខំប្រឹងប្រែងរបស់ក្រុមការងារ ក្រោមការចង្អុលបង្ហាញពីប្រមុខរាជរដ្ឋាភិបាល»។
ក្រសួងសុខាភិបាលតែងតែផ្តល់ការគាំទ្រដល់ក្រុមហ៊ុន ឧទាហរណ៍ ដូចជាក្រុមហ៊ុន Abbott ជាដើមដែលបានអនុញ្ញាតទទួលយកការចុះបញ្ជិលើឧបករណ៍តេស្តរហ័ស (Rapid Test) សម្រាប់កូវីដ ១៩ លឿនបំផុត ដើម្បីប្រជាជនមានឧបករណ៍ប្រើបានទាន់ពេលស្របជាមួយនឹងការដាក់ចេញវិធានការធ្វើតេស្តរហ័សរបស់រាជរដ្ឋាភិបាលកម្ពុជា។
ជាមួយគ្នានោះដែរ លោកស្រី ឱ វណ្ណឌីន ក៏បាន លើកឡើងផងដែរពីបញ្ហាគ្រឿងស្រវឹង ដោយលោកស្រីថា បញ្ហាការកំណត់អាយុពិសាគ្រឿងស្រវឹង លោកស្រីបានស្នើសូមឱ្យមានការចូលរួមទទួលខុសត្រូវលើបញ្ហាសុខភាពមនុស្ស ជាពិសេសការផ្សាយពាណិជ្ជកម្មដែលមិនសមស្រប ដែលមានលក្ខណ:ជំរុញបុគ្គលឱ្យទទួលទានច្រើនពេក។
លោកស្រីថា៖ «សូមឱ្យមានការចូលរួមក្នុងការលើកកម្ពស់ការទទួលខុសត្រូវរបស់បុគ្គលតាមសារអប់រំជាជាងប្រើប្រាស់វិធីសាស្ត្រជំរុញមនុស្សពិសាគ្រឿងស្រវឹងច្រើនហួសហេតុពេកសំដៅរួមគ្នា ដើម្បីកាត់បន្ថយនូវគ្រោះថ្នាក់ចរាចរផង និងកាត់បន្ថយនូវហានិភ័យនៃការកើត និងកើនឡើងនូវជំងឺរលាកបំពង់អាហារ ក្រពះ និងថ្លើម ហើយដែលអាចបង្កទៅជាជំងឺមហារីកថ្លើម និងក្រពះជាដើម»៕
