.jpg)
រូបថត SPM
លោកនាយករដ្ឋមន្ត្រី ហ៊ុន សែន បានបង្ហាញពីការអាលោះអាល័យយ៉ាងពន់ពេកចំពោះការបាត់បង់បងប្រុសបង្កើតរបស់លោក គឺលោក ហ៊ុន ណេង ដែលជាប្រធានគណៈកម្មការទី៤ នៃរដ្ឋសភា ដោយសារជំងឺគាំងបេះដូង កាលពីយប់ថ្ងៃទី០៥ ខែឧសភា។
លោក ហ៊ុន សែន បានសរសេរលើបណ្តាញសង្គមហ្វេសប៊ុករបស់លោកនាថ្ងៃទី០៦ ខែឧសភា ដោយភ្ជាប់ជាមួយនឹងរូបថតដែលលោកថតជាមួយនឹងបងប្រុសថា ៖ «បងប្អូនយើងបែកគ្នាដោយពុំបានលាគ្នា និងនិយាយជាមួយគ្នាសូម្បីមួយម៉ាត់។ បែកគ្នាលើកនេះបែកជារៀងរហូតហើយ មិនអាចជួបគ្នាវិញបានទេ»។
ក្រុមគ្រួសាររបស់លោក ហ៊ុន ណេង បានចេញសេចក្តីជូនដំណឹងជាផ្លូវការ ពីមរណភាព របស់លោក ដោយ «ជំងឺបេះដូង» នៅម៉ោង ៦និង ២៥ នាទីល្ងាច។ សេចក្តីជូនដំណឹងបានបន្តថា ៖ «សពរបស់ឯកឧត្តម ហ៊ុន ណេង នឹងត្រូវតម្កល់ធ្វើបុណ្យនៅគេហដ្ឋាន ភូមិទី៧ សង្កាត់កំពង់ចាម ក្រុងកំពង់ចាម ខេត្តកំពង់ចាម ទៅតាមប្រពៃណីព្រះពុទ្ធសាសនា»។
សេចក្តីជូនដំណឹងរបស់ក្រុមគ្រួសារ បានបន្តទៀតថា នៅថ្ងៃទី៩ ខែឧសភា ឆ្នាំ ២០២២ សពលោក ហ៊ុន ណេង នឹងត្រូវដង្ហែទៅបញ្ចុះនៅវត្តសុវណ្ណគិរីរតនៈ ភ្នំប្រុស ភូមិត្រពាំងចារ ឃុំក្រឡា ស្រុកកំពង់សៀម ខេត្តកំពង់ចាម។
នៅយប់ថ្ងៃទី០៥ ខែឧសភា លោក កឹម សុខា អតីតប្រធាន នៃអតីតគណបក្សសង្គ្រោះជាតិ បានផ្ញើសារជូនលោកនាយករដ្ឋមន្ត្រី ហ៊ុន សែន ដោយចូលរួមរំលែកទុក្ខចំពោះមរណភាព លោក ហ៊ុន ណេង។
លោក កឹម សុខា បានលើកឡើងថា ៖ «ខ្ញុំនិងភរិយា មានសេចក្តីសោកស្តាយក្រៃលែង ដោយបានទទួលដំណឹងថា ឯកឧត្តម ហ៊ុន ណេង ជាបងប្រុសរបស់សម្តេចតេជោ បានទទួលមរណភាពដោយជំងឺគាំងបេះដូង នៅរសៀលថ្ងៃទី៥ ខែឧសភា ឆ្នាំ២០២២នេះ ក្នុងជន្មាយុ៧២ឆ្នាំ»។
លោកបានបន្តថា លោកនិងភរិយា សូមចូលរួមរំលែកមរណៈទុក្ខដ៏ធំធេងជាមួយលោក ហ៊ុន សែន និងក្រុមគ្រួសារ និងសូមឧទ្ទិសបួងសួងសូមឱ្យដួងវិញ្ញាណក្ខន្ធ លោក ហ៊ុន ណេង បានទៅកាន់សុគតិភពកុំបីឃ្លៀងឃ្លាតឡើយ។
ជាមួយគ្នានេះដែរ លោកនាយករដ្ឋមន្ត្រី ហ៊ុន សែន ក៏បានថ្លែងអំណរគុណយ៉ាងជ្រាលជ្រៅបំផុត ចំពោះសាររំលែកទុក្ខ ដែលលោក កឹម សុខា និងភរិយា ផ្ញើជូនលោកនិងក្រុមគ្រួសារក្នុងការបាត់បង់ដ៏ធំធេងសម្រាប់លោកនិងគ្រួសារ៕
