.jpg)
រូបភាព អគ្គនាយកដ្ឋានអន្តោប្រវេសន៍
ភ្នំពេញៈ ក្រុមការងារមួយបាននិងកំពុងធ្វើការស្រាវជ្រាវ និងប្រមូលព័ត៌មានពាក់ព័ន្ធ ដើម្បីរៀបចំចងក្រងសៀវភៅមួយ ដែលមានចំណងជើងថា «សម្តេចក្រឡាហោម ស ខេង ការងារគ្រប់គ្រងសន្តិសុខ សណ្តាប់ធ្នាប់សាធារណៈ និងកំណែទម្រង់រយៈពេល ២៧ ឆ្នាំ»។
ក្រុមការងារដែលដឹកនាំដោយលោកសាស្ត្រាចារ្យ នួន វិទ្យាស័ក អនុប្រធានក្រុមប្រឹក្សាគ្រូនគរបាលជាតិនៃបណ្ឌិត្យសភានគរបាលកម្ពុជា និងជាប្រធានក្រុមស្រាវជ្រាវ រួមជាមួយនឹងសហការីកាលពីថ្ងៃទី ៤ ខែឧសភានេះជួបសម្តែងការគួរសម និងសម្ភាសអំពីកម្រងសំនួរដែលពាក់ព័ន្ធជាមួយការងារចងក្រងសៀវភៅ ជាមួយនឹងលោក គៀត ច័ន្ទថារិទ្ធ អគ្គនាយកនៃអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ។ នេះបើយោងតាមអគ្គនាយកដ្ឋានអន្តោប្រវេសន៍។
ប្រភពដដែលបានឱ្យដឹងថា គោលបំណងសំខាន់របស់ក្រុមការងាររៀបចំចងក្រងសៀវភៅដែលបានជួបសម្ភាសន៍នេះគឺ ផ្តោតសំខាន់ ដើម្បីទទួលបានព័ត៌មានមួយចំនួនពាក់ព័ន្ធដល់ការដឹកនាំគ្រប់គ្រងលើការងារអន្តោប្រវេសន៍ក្នុងរយៈពេលកន្លងមកការទទួលបានលទ្ធផល សមិទ្ធផល បញ្ហាប្រឈមក៏ដូចជាទស្សនវិស័យនៃការដឹកនាំការងារអន្តោប្រវេសន៍ក្នុងរយៈពេលបីឆ្នាំកន្លងមក ក៏ដូចជាទស្សនវិស័យក្នុងការដឹកនាំគ្រប់គ្រងកិច្ចការអន្តោប្រវេសន៍ សម្រាប់ទៅថ្ងៃខាងមុខបន្ត។
លោក គៀត ច័ន្ទថារិទ្ធ ក៏បានលើកឡើងអំពីប្រវត្តិសកម្មភាពការងារ ក៏ដូចជាការប្រែប្រួលនៃរចនាសម្ព័ន្ធនៃការដឹកនាំរបស់អគ្គនាយកដ្ឋានអន្តោប្រវេសន៍។ លើសពីនោះ លោកនាយឧត្តមសេនីយ៍ គៀត ច័ន្ទថារិទ្ធ ក៏បានលើកឡើងអំពីសមិទ្ធផលធំៗជាច្រើន ដែលអគ្គនាយកដ្ឋានអន្តោប្រវេសន៍បានខិតខំសម្រេចបាន និងបញ្ហាប្រឈម ព្រមទាំងដំណោះស្រាយនានាក្នុងការបញ្ជាដឹកនាំ និងការគ្រប់គ្រងការងារអន្តោប្រវេសន៍ក្នុងរយៈពេល ២៧ ឆ្នាំ កន្លងមកនេះ។ លោកក៏បានលើកឡើងនូវទស្សនវិស័យ និងផែនការយុទ្ធសាស្ត្រ សម្រាប់កិច្ចការគ្រប់គ្រងការងារអន្តោប្រវេសន៍នៅពេលអនាគតខាងមុខផងដែរ។
លោកសាស្ត្រាចារ្យ នួន វិទ្យាស័ក បានថ្លែងអំណរគុណយ៉ាងជ្រាលជ្រៅចំពោះលោកនាយឧត្តមសេនីយ៍ គៀត ច័ន្ទថារិទ្ធ ដែលបានអនុញ្ញាតឱ្យក្រុមការងារចូលជួបសម្តែងការគួរសម និងផ្តល់បទសម្ភាសផ្ទាល់ដោយបានផ្តល់នូវព័ត៌មានពាក់ព័ន្ធនឹងដំណើរការនៃការងារគ្រប់គ្រងកិច្ចការអន្តោប្រវេសន៍ក្នុងរយៈពេល ២៧ ឆ្នាំកន្លងមក និងទស្សនវិស័យសម្រាប់កំណែទម្រង់នៅពេលអនាគតផងដែរ៕
