សៀមរាបៈ សួនរុក្ខជាតិអង្គរដែលត្រូវបានបង្កើតឡើងនៅលើផ្ទៃដីទំហំប្រមាណជិត ១៥ ហិកតា និងបានដាំកូនឈើ ចម្រុះជាង ៥០០ ប្រភេទដើម្បីធ្វើឱ្យកាន់តែមានភាពទាក់ទាញដល់ភ្ញៀវទេសចរនឹងត្រូវបើកសម្ពោធដាក់ឱ្យដំណើរការជាផ្លូវការនៅថ្ងៃទី ៩ ខែឧសភា។
បើតាមអាជ្ញាធរជាតិអប្សរានាព្រឹកថ្ងៃទី ០៥ ខែឧសភា ឆ្នាំ ២០២២ លោកស្រីភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបាលអាជ្ញាធរជាតិអប្សរាបានអញ្ជើញចុះពិនិត្យមើលស្ថានភាពទូទៅនៅសួនរុក្ខជាតិអង្គរ មុនពេលសម្ពោធដាក់ឱ្យដំណើរការជាផ្លូវការ នាថ្ងៃទី ០៩ ខែឧសភា ឆ្នាំ ២០២២។
អមដំណើរលោកស្រីរដ្ឋមន្ត្រីនាឱកាសនោះមាន លោក ហង់ ពៅ អគ្គនាយកអាជ្ញាធរជាតិអប្សរាអគ្គនាយករង មន្ត្រី និងបុគ្គលិកអាជ្ញាធរជាតិអប្សរាមួយចំនួនទៀត។
សូមបញ្ជាក់ថា ដើម្បីបង្កើនកិច្ចអភិវឌ្ឍក្នុងតំបន់រមណីយដ្ឋានអង្គរ និងដើម្បីឱ្យកាន់តែមានភាពទាក់ទាញភ្ញៀវទេសចរផងនោះ អាជ្ញាធរជាតិអប្សរាបានបង្កើតសួនរុក្ខជាតិអង្គរ ក្រោមទំហំផ្ទៃដីប្រមាណជិត ១៥ ហិកតា ដោយមានរៀបចំជាសួនសំខាន់ៗជាច្រើន។
ក្នុងនោះអាជ្ញាធរជាតិអប្សរាបានដាំកូនឈើ និងប្រភេទរុក្ខជាតិផ្សេងៗរាប់ម៉ឺនដើមមានប្រភេទរុក្ខជាតិសរុបជាង ៥០០ ប្រភេទផ្សេងៗគ្នា។
នៅទីនោះក៏មានសួនសត្វ និងសួនរុក្ខជាតិសំខាន់ៗ ចំនួន ៥ សួនបានបង្កើតឡើងក្នុងរចនាប័ទ្មបែបខ្មែរ រួមមាន សួនឱសថ និងគ្រឿងទេស សួនផ្កាស្មៅ និងផ្កាចម្រុះ សួនអំបូរត្នោត សួនខ្មែរ សួនព្រៃឈើ និងសត្វព្រៃអង្គរជាដើម។
សួនទាំងនោះ មានភាពទាក់ទាញខុសប្លែកពីគ្នា ជាពិសេសមានដើមឈើ និងរុក្ខជាតិកម្រៗជាច្រើនប្រភេទ បម្រើផលប្រយោជន៍ខុសប្លែកពីគ្នា សម្រាប់មនុស្សជំនាន់ក្រោយបានស្គាល់ និងការងារសិក្សាស្រាវជ្រាវ៕