.jpg)
ភ្នំពេញៈ រថយន្តដឹកសំរាម សំណល់រឹងចំនួន១៩គ្រឿងត្រូវបានក្រសួងបរិស្ថានប្រគល់ជូនមន្ទីរបរិស្ថានក្នុងខេត្តចំនួន១២កាលពីថ្ងៃទី៦ខែ ឧសភានេះសម្រាប់គាំទ្រដល់អាជ្ញាធរមូលដ្ឋានក្នុងការគ្រប់គ្រងសំរាមក្នុងទីប្រជុំជនប្រកបដោយប្រសិទ្ធភាព និងមាននិរន្តរភាពបន្ថែមទៀត។
លោកផៃ ប៊ុនឈឿន រដ្ឋលេខាធិការប្រចាំការក្រសួងបរិស្ថានបានធ្វើជាអធិបតីភាពក្នុងការប្រគល់រថយន្តដឹកសំរាម សំណល់រឹងទាំង១៩គ្រឿង ដល់មន្ទីរបរិស្ថាន សម្រាប់គាំទ្រដល់រដ្ឋបាលក្រុង ស្រុក ចំនួន១៨ មកពីខេត្ត ចំនួន១២។
លោកបានថ្លែងក្នុងឱកាសនោះថា៖«ការប្រគល់រថយន្តរបស់ក្រសួងបរិស្ថាននេះបានធ្វើឡើង ក្នុងគោលបំណងផ្តល់ការគាំទ្រ ជំរុញលើកទឹកចិត្តឱ្យមានភាពជាម្ចាស់ក្នុងការគ្រប់គ្រងសំរាមសំណល់រឹង ព្រមទាំងធ្វើការពង្រីកសេវាសម្អាត ប្រមូល ដឹកជញ្ជូន និងទុកដាក់សំរាមឱ្យបានគ្រប់ទីប្រជុំជន ដើម្បីរួមចំណែកធ្វើឱ្យភូមិ ឃុំ សង្កាត់កាន់តែមានអនាម័យ សោភ័ណភាពល្អ និងបរិស្ថានស្អាត ការរស់នៅប្រកបដោយផាសុកភាព និងភាពទាក់ទាញ»។
យោងតាមក្រសួងបរិស្ថានបានឱ្យដឹងថា រដ្ឋបាលក្រុងស្រុកចំនួន១៨ មកពីខេត្តចំនួន១២ ដែលបានទទួលរថយន្តដឹកសំរាមសំណល់រឹង ពីក្រសួងបរិស្ថានរួមមាន៖ខេត្តកំពតចំនួន១គ្រឿង(ក្រុងបូកគោ), ខេត្តកោះកុង ចំនួន ២គ្រឿង (ស្រុកមណ្ឌលសីមា), ខេត្តក្រចះ ចំនួន ១គ្រឿង (ស្រុកស្នួល), ខេត្តមណ្ឌលគិរី ចំនួន ២គ្រឿង(ក្រុងសែនមនោរម្យ និងស្រុកពេជ្រាដា), ខេត្តព្រះវិហារ ចំនួន ១គ្រឿង (ក្រុងព្រះវិហារ), ខេត្តពោធិ៍សាត់ ចំនួន ១គ្រឿង (ក្រុងពោធិ៍សាត់), ខេត្តរតនគិរី ចំនួន ១គ្រឿង (ស្រុកបរកែវ), ខេត្តសៀមរាប ចំនួន ១គ្រឿង (ស្រុកក្រឡាញ់), ខេត្តស្វាយរៀង ចំនួន ២គ្រឿង (ក្រុងស្វាយរៀង និងស្រុករមាសហែក), ខេត្តត្បូងឃ្មុំ ចំនួន ២គ្រឿង (ស្រុកត្បូងឃ្មុំ និងស្រុកពញាក្រែក), ខេត្តកំពង់ស្ពឺ ចំនួន ៣គ្រឿង (ស្រុកភ្នំស្រួច ស្រុកសំរោងទង និងស្រុកបរសេដ្ឋ) និងខេត្តព្រះសីហនុ ចំនួន ២គ្រឿង (ក្រុងកោះរ៉ុង និងស្រុកព្រៃនប់)៕
