.jpg)
រូបភាព Ministry of Environment
ភ្នំពេញៈ ក្រសួងបរិស្ថានគ្រោងនឹងរៀបចំវេទិកាកេសរកូលជាតិលើកទី ២ នៅថ្ងៃទី ១១ ខែឧសភាសប្តាហ៍ក្រោយនេះ ដើម្បីធ្វើការផ្សព្វផ្សាយឱ្យសាធារណជនបានស្គាល់ពីប្រភេទកេសរកូលព្រៃរបស់កម្ពុជា។
យោងតាមសេចក្ដីប្រកាសព័ត៌មានរបស់ក្រសួងស្តីពី វេទិកាកេសរកូលជាតិលើកទី ២ បានឱដឹងថាវេទិកានេះនឹងចាប់ផ្តើមពីម៉ោង ៨:៣០ នាទី ដល់ម៉ោង ១៧:០០ នាទី នៅអគារខេមរានី សហភាពសហព័ន្ធយុវជនកម្ពុជា (ស.ស.យ.ក.) ក្នុងរាជធានីភ្នំពេញ ក្រោមអធិបតីភាពលោក សាយ សំអាល់ រដ្ឋមន្ត្រីក្រសួងបរិស្ថាន និងជាប្រធានក្រុមប្រឹក្សាជាតិ អភិវឌ្ឍន៍ដោយចីរភាព (ក.ជ.អ.ច.) ។ វេទិកានេះនឹងមានការអញ្ជើញចូលរួមពីតំណាងក្រសួង ស្ថាប័ន ស្ថានទូត អង្គការ ដៃគូ វិស័យឯកជន អ្នកជំនាញជាតិ និងអន្តរជាតិ សិស្ស និស្សិត និងអ្នកពាក់ព័ន្ធផងដែរ។
វេទិកានេះរៀបចំឡើងក្នុងគោលបំណង ដើម្បីផ្សព្វផ្សាយឱ្យសាធារណជនបានស្គាល់ពីប្រភេទ កេសរកូលព្រៃរបស់កម្ពុជា, ចែករំលែកព័ត៌មានស្ដីពីវឌ្ឍនភាពនៃការរៀបចំមជ្ឈមណ្ឌលស្រាវជ្រាវ និង អភិរក្សកេសរកូល សុខ អាន ភ្នំគូលែន, ចូលរួមចំណែកលើកកម្ពស់វិស័យទេសចរណ៍ធម្មជាតិ និង ដើម្បីផ្សារភ្ជាប់បណ្តាញអ្នកសិក្សាស្រាវជ្រាវ និងពង្រឹងការអភិរក្សកេសរកូលព្រៃនៅកម្ពុជា។
នៅក្នុងវេទិកានេះ ក៏នឹងមានការតាំងបង្ហាញពីប្រភេទកេសរកូលព្រៃ កេសរកូលពូជបង្កាត់ រុក្ខជាតិកម្រ រុក្ខជាតិ លម្អ និងផលិតផលធម្មជាតិជាច្រើនប្រភេទ ដែលអនុញ្ញាតឱ្យសិស្ស និស្សិត ភ្ញៀវជាតិ-អន្តរជាតិ និងសាធារណជនអាចចូលទស្សនាដោយសេរី ចាប់ពីម៉ោង ១៣:៣០ នាទី ដល់ម៉ោង ១៧:០០ នាទី៕
