.jpg)
មន្ត្រីជាន់ខ្ពស់នៃក្រសួងសុខាភិបាលបានជំរុញឱ្យមានការទប់ស្កាត់ និងប្រយុទ្ធប្រឆាំងជាមួយនឹងឱសថដែលអន់គុណភាព និងឱសថក្លែងក្លាយ និងគ្រឿងបរិក្ខារទាក់ទងនឹងផ្នែកសុខាភិបាល ខណៈដែលប្រជាពលរដ្ឋភាគច្រើនមិនមានការយល់ដឹងពីបញ្ហាឱសថនេះ។
លោកស្រី ឱ វណ្ណឌីន រដ្ឋលេខាធិការក្រសួងសុខាភិបាលបានថ្លែងឱ្យដឹងកាលពីថ្ងៃទី ០៥ ខែឧសភា ថា ក្រសួងសុខាភិបាលមិនដែលព្រងើយកន្តើយនោះឡើយទាក់ទងនឹងបញ្ហាឱសថក្លែងក្លាយ និងឱសថអន់គុណភាពនេះឡើយ ដោយក្រសួងតែងតែធ្វើការផ្សព្វផ្សាយនូវរាល់ព័ត៌មានដែលពាក់ព័ន្ធទៅនឹងវិស័យឱសថនេះ។
លោកស្រីមានប្រសាសន៍ថា៖ «យើងមានក្រុមការងារអធិការកិច្ច ក្រុមនគរបាលយុត្តិធម៌ដែលពួកគាត់បានបំពេញភារកិច្ចចុះត្រួតពិនិត្យនៅតាមទីផ្សារ ឬកន្លែងចែកចាយឱសថ គ្រឿងសំអាង និងបរិក្ខារពេទ្យរបស់យើងផងដែរ ហើយកន្លងមកនេះយើងក៏បានរកឃើញផងដែរនូវផលិតផលណាដែលមានបញ្ហាដល់សុខភាព»។
លោកស្រី ឱ វណ្ណឌីន បានបន្តថា ក្រសួងសុខាភិបាលបានស្នើ និងអំពាវនាវទៅដល់ប្រជាពលរដ្ឋឱ្យឈប់ប្រើប្រាស់ឱសថ ឬផលិតផលណាដែលមិនមានបញ្ជិកាត្រឹមត្រូវនិងមិនមានការទទួលស្គាល់ច្បាស់លាស់ពីក្រសួងសុខាភិបាល៕
វីដេអូ៖
