.jpg)
រូបភាព Ministry of Environment
កែបៈ ផ្លូវបេតុងប្រវែង ៦ គីឡូម៉ែត្រស្ថិតនៅភ្នំកែបធំនៃឧទ្យានជាតិកែបប្រសិទ្ធនាមថា «រុក្ខវិថីបុប្ជាប្រសិទ្ធ» ដែលជាការវិនិយោគទៅលើសេដ្ឋកិច្ចមូលដ្ឋាន និងទាក់ទាញភ្ញៀវទេសចរមកលម្ហែកម្សាន្តបែបធម្មជាតិផងនោះត្រូវបានសម្ពោធដាក់ឱ្យប្រើប្រាស់ជាផ្លូវការកាលពីថ្ងៃទី ៤ ខែឧសភានេះ។
ពិធីសម្ពោធដាក់ឱ្យប្រើប្រាស់ជាផ្លូវការនេះត្រូវបានធ្វើឡើងក្រោមអធិបតីភាពលោក សាយ សំអាល់ រដ្ឋមន្ត្រីក្រសួងបរិស្ថាន,លោកស្រី ចម និម្មល រដ្ឋលេខាធិការក្រសួងពាណិជ្ជកម្ម, លោក សោម ពិសិដ្ឋ អភិបាលខេត្តកែប ព្រមទាំងរដ្ឋលេខាធិការ អនុរដ្ឋលេខាធិការ អគ្គនាយក អគ្គនាយិកា ក្រុមប្រឹក្សាខេត្ត អភិបាលរងខេត្ត តំណាងកងកម្លាំងប្រដាប់អាវុធទាំងបី មន្ទីរ អង្គភាពជុំវិញខេត្ត រដ្ឋបាល ក្រុង ស្រុក បងប្អូនប្រជាពលរដ្ឋ និងសិស្សានុសិស្ស សរុប ៤៤០ នាក់។
លោករដ្ឋមន្ត្រីមិនត្រឹមតែបានចាត់ទុករុក្ខវិថីបុប្ជាប្រសិទ្ធថាជាមធ្យោបាយសម្រាប់ធ្វើដំណើរប៉ុណ្ណោះទេ តែផ្លូវនេះគឺជាការវិនិយោគទៅលើសេដ្ឋកិច្ចមូលដ្ឋានរបស់ខេត្តកែប ទាក់ទាញភ្ញៀវទេសចរមកលម្ហែកម្សាន្តបែបធម្មជាតិ ស្រូបខ្យល់អាកាសបរិសុទ្ធ គយគន់រុក្ខជាតិពណ៌បៃតងជាច្រើននៅក្នុងព្រៃឧទ្យានជាតិនេះ។
លោកបានមានប្រសាសន៍ថា រុក្ខវិថីនេះត្រូវបានស្តារ និងសាងសង់ឡើងដោយប្រើប្រាស់ថវិកាបានមកពីការលក់ឥណទានកាបូន និងទុកជាប្រយោជន៍សម្រាប់ការប្រើប្រាស់របស់ប្រជាពលរដ្ឋ។
លោកបានបញ្ជាក់ថា៖ «អ្វីដែលសំខាន់ យើងចង់ប្រែក្លាយផ្លូវ និងឧទ្យានជាតិនេះទៅជាផ្នែកមួយនៃសេដ្ឋកិច្ចរបស់ខេត្តកែប ជាផ្នែកមួយដែលចូលរួមលើកស្ទួយជីវភាពរបស់ប្រជាជន មន្ត្រីរាជការ កងកម្លាំងប្រដាប់អាវុធនៅខេត្តកែប។ រុក្ខវិថីនេះមិនត្រឹមតែជាមធ្យោបាយសម្រាប់ធ្វើដំណើរប៉ុណ្ណោះទេ តែផ្លូវនេះគឺជាការវិនិយោគទៅលើសេដ្ឋកិច្ចមូលដ្ឋានរបស់ខេត្តកែប»។
លោកបានបន្ថែមថា ការកសាងហេដ្ឋារចនាសម្ព័ន្ធនេះក៏ស្ថិតក្នុងគោលបំណងជំរុញការអភិវឌ្ឍវិស័យទេសចរណ៍នៅខេត្តកែប បង្កើតការងារ និងបង្កើនចំណូលជូនប្រជាពលរដ្ឋ។ អ្វីដែលក្រសួងបរិស្ថានធ្វើនៅទីនេះ មិនមែនជំរុញលើការការពារ និងអភិរក្ស ឧទ្យានជាតិនេះឱ្យមានសោភ័ណភាពស្អាតទេ តែដើម្បីទាក់ទាញភ្ញៀវទេសចរឱ្យមកទស្សនាខេត្តកែបឱ្យកាន់តែច្រើនបន្ថែមទៀត និងដើរកម្សាន្តនៅជុំវិញភ្នំកែបធំនេះ។
លើសពីនោះ លោករដ្ឋមន្ត្រីក៏បានគូសបញ្ជាក់ថា ទន្ទឹមនឹងការគ្រប់គ្រងអភិរក្សឱ្យបានល្អប្រសើរ ក្រសួងបរិស្ថានបានគិតគូរក្នុងការប្រែក្លាយតំបន់អភិរក្សធម្មជាតិមួយចំនួនដូចជាឧទ្យានជាតិ ដែនជម្រកសត្វព្រៃដែលមានសក្តានុពលទេសចរណ៍ មិនត្រឹមតែជាកន្លែងថែរក្សាអភិរក្សធនធានធម្មជាតិ សត្វព្រៃ និងជីវៈចម្រុះ តែក៏ជាកន្លែងទេសចរណ៍ធម្មជាតិសម្រាប់ប្រជាពលរដ្ឋ និងភ្ញៀវទេសចរដើរកម្សាន្ត។
ការរៀបចំនេះដើរទន្ទឹមគ្នានឹងការអភិវឌ្ឍសេដ្ឋកិច្ចមូលដ្ឋានរបស់ខេត្តនីមួយៗ។
លោករដ្ឋមន្ត្រីក៏បានអំពាវនាវដល់មន្ទីរអង្គភាពពាក់ព័ន្ធ ប្រជាពលរដ្ឋត្រូវរួមគ្នាជួយថែរក្សាផ្លូវមួយខ្សែនេះឱ្យបានយូរអង្វែង ព្រោះការកសាងសមិទ្ធផលនីមួយៗពិបាក ព្រមទាំងនឹងចំណាយពេលយូរណាស់ ទម្រាំលេចចេញជារូបរាង សម្រាប់ជាប្រយោជន៍ដល់កូនចៅជំនាន់ក្រោយៗទៀត។
លោក សោម ពិសិដ្ឋ អភិបាលខេត្តកែបបានមានប្រសាសន៍ក្នុងឱកាសនោះថា រដ្ឋបាលខេត្តបានខិតខំយកចិត្តទុកដាក់ចំពោះការគាំពារបរិស្ថាន ការអភិរក្សជីវៈចម្រុះប្រកបដោយចីរភាព ការកសាងហេដ្ឋារចនាសម្ព័ន្ធជារូបវន្តជាដើម។ ជាក់ស្តែងដូចថ្ងៃនេះ ខេត្តកែបបានជួសជុល ស្ថាបនាឡើងវិញ និងសម្ពោធឱ្យប្រើប្រាស់នូវផ្លូវបេតុងជុំវិញឧទ្យានជាតិកែប ដែលជាផ្លូវចាស់ក្នុងសម័យសង្គមរាស្ត្រនិយម។ ផ្លូវនេះត្រូវបានជួសជុលជាបន្តបន្ទាប់ ដែលលើកទី ១ ឆ្នាំ ១៩៩៨, លើកទី ២ ឆ្នាំ ២០០៤ , លើកទី ៣ ឆ្នាំ ២០០៩-២០១០ ជួសជុលពង្រីកឱ្យធំ និងលើកទី ៤ ជួសជុល ស្ថាបនា ចាក់បេតុង មានទទឹង ៣ ម៉ែត្រ បណ្តោយ ៦០០០ ម៉ែត្រ។
គម្រោងនេះប្រើប្រាស់ថវិការបស់ក្រសួងបរិស្ថានដោយចាប់ផ្តើមជួសជុល នៅថ្ងៃទី ២៧ ខែមករា និងបញ្ចប់នៅថ្ងៃទី ៣០ ខែមេសា ឆ្នាំ ២០២២។
ក្រៅពីការអភិវឌ្ឍហេដ្ឋារចនាសម្ព័ន្ធមានផ្លូវកៅស៊ូ ផ្លូវបេតុង កំពង់ផែកោះទន្សាយ ផ្លូវគ្រួសក្រហម រដ្ឋបាលខេត្តកែបក៏មានសមិទ្ធផលផ្សេងទៀតដែរ ក្នុងការថែរក្សាបរិស្ថាន មានដូចជា ទីលានចាក់សំរាម ទំហំ ១៣,៣៩ ហិកតា អាងប្រព្រឹត្តិកម្មចម្រោះទឹកកខ្វក់ និងឡដុតសំរាមតាមលក្ខណៈបច្ចេកទេស ផងដែរ៕
