.jpg)
រូបភាព ព្រឹទ្ធសភាកម្ពុជា
ភ្នំពេញៈ ឯកអគ្គរាជទូតថ្មីក្រូអាស៊ី និង ព្រឹទ្ធសភាកម្ពុជាប្តេជ្ញាចិត្តរួមគ្នា ដើម្បីពង្រឹង និងពង្រីកទំនាក់ទំនងរវាងប្រទេសទាំង ២ ឱ្យកាន់តែជិតស្និទ្ធបន្ថែមទៀត ដើម្បីនាំមកនូវផលប្រយោជន៍ទៅវិញទៅមកជូនប្រជាជន និងប្រទេសទាំង ២។
កាលពីថ្ងៃទី ៥ ខែឧសភា លោក អ៊ីវ៉ាន វឺលីមៀរ ស្តាសឺវ៉ិច (Ivan Velimir Starčević) ឯកអគ្គរាជទូតតែងតាំងថ្មីនៃប្រទេសក្រូអាស៊ីប្រចាំកម្ពុជាបានជួបពិភាក្សាការងារជាមួយលោក សាយ ឈុំ ប្រធានព្រឹទ្ធសភាកម្ពុជានៅវិមានព្រឹទ្ធសភា។
ព្រឹទ្ធសភាកម្ពុជាបញ្ជាក់ក្នុងសេចក្តីប្រកាសព័ត៌មាននាថ្ងៃទី ៦ ខែឧសភាថា នៅក្នុងជំនួបនោះ លោក Starčević បានរំឭកពីជំនួបជាប្រវត្តិសាស្ត្រារវាងអតីតថ្នាក់ដឹកនាំក្រូអាស៊ី និង ព្រះករុណា ព្រះបាទសម្តេចព្រះនរោត្តម សីហនុ ព្រះបរមរតនកោដ ដែលបានរួមចំណែកដ៏សំខាន់ ដើម្បីបង្កើត និងរឹតចំណង មិត្តភាព និងកិច្ចសហប្រតិបត្តិការរវាងប្រទេសទាំង ២ តាំងពីទស្សវត្សរ៍ទី ៥០។
លោក Starčević ជឿជាក់ថា ទំនាក់ទំនងមិត្តភាព និងកិច្ចសហប្រតិបត្តិការរវាងប្រទេសទាំង ២ នឹងកាន់តែរីកចម្រើនថែមទៀតតាមរយៈបេសសកម្មការទូតរបស់លោកនៅកម្ពុជា។
សេចក្តីប្រកាសព័ត៌មានបញ្ជាក់ថា៖ «ឯកឧត្តមឯកអគ្គរាជទូតត្រៀមខ្លួនជាស្រេចដើម្បីខិតខំប្រឹងប្រែងអស់ពីកម្លាំងកាយចិត្ត ក្នុងការពង្រឹងពង្រីកទំនាក់ទំនង និងកិច្ចសហប្រតិបត្តិការរវាងប្រទេសទាំង ២ បន្ថែមទៀត»។
លោក សាយ ឈុំ បានបង្ហាញការជឿជាក់ថា ក្នុងអាណត្តិបេសកកម្មការទូតនៅកម្ពុជា លោក Starčević នឹងខិតខំលើកកម្ពស់ ទំនាក់ទំនង និងកិច្ចសហប្រតិបត្តិការរវាងប្រទេសទាំង ២ ឱ្យកាន់តែល្អថែមទៀត ដើម្បីប្រយោជន៍ប្រជាជនកម្ពុជា និងប្រជាជនក្រូអាស៊ី។
សេចក្តីប្រកាសព័ត៌មានបញ្ជាក់ថា៖ «ក្នុងនាមព្រឹទ្ធសភា សម្តេច ប្រធានព្រឹទ្ធសភាបានត្រៀមខ្លួនជានិច្ច ដើម្បីធ្វើកិច្ចសហប្រតិបត្តិការដ៏ជិតស្និទ្ធជាមួយនឹងឯកឧត្តមឯកអគ្គរាជទូត ដើម្បីរួមចំណែកពង្រឹងពង្រីកចំណងមិត្តភាព និងកិច្ចសហប្រតិបត្តិការនាំមកនូវផលប្រយោជន៍ទៅវិញទៅមកជូនប្រជាជន និងប្រទេសទាំង ២»៕
