យោងតាមច្បាប់ស្តីពីការការពាររុក្ខជាតិ និងភូតគាមអនាម័យ ដែលត្រូវបានព្រះមហាក្សត្រសម្តេចព្រះបាទនរោត្តម សីហមុនី ឡាយព្រះហស្ថលេខាដាក់ឱ្យប្រើប្រាស់កាលពីថ្ងៃទី ០៣ ខែឧសភា បានចែងក្នុងបទប្បញ្ញត្តិដាក់ទោសប្បញ្ញតិ្តនៃច្បាប់មានទណ្ឌកម្មរដ្ឋបាល និងទណ្ឌកម្មព្រហ្មទណ្ឌ ដែលអាចឈានដល់ពិន័យជាប្រាក់ និងដាក់ពន្ធនាគារផងដែរ។
យោងតាមមាត្រា ១០៦ ជំពូកទី ១៣ នៃច្បាប់ស្តីពីការការពាររុក្ខជាតិ និងភូតគាមអនាម័យបានចែងថា ចំពោះរូបវន្តបុគ្គល ឬនីតិបុគ្គលដែលគ្មានសៀវភៅកំណត់ត្រាសេវាកម្មការពាររុក្ខជាតិ និងភូតគាមអនាម័យ ឬគ្មានកំណត់ត្រាអំពីសកម្មភាព ឬទិន្នន័យពាក់ព័ន្ធនឹងប្រតិបត្តិការសេវាកម្មដែលតម្រូវដោយច្បាប់នេះ នឹងត្រូវពិន័យអន្តរការណ៍ពី ១ លានរៀនទៅ ៥ លានរៀល។
ពិន័យជាប្រាក់ដូចគ្នានេះដែរ ក៏ត្រូវអនុវត្តចំពោះជនណាដែលមិនអនុវត្តកាតព្វកិច្ចជាប្រតិបត្តិករដូចជា មិនអនុវត្តលក្ខខណ្ឌ បទបញ្ជា និងរយៈពេលសុពលភាពដែលកំណត់ក្នុងវិញ្ញាបនត្រ ឬលិខិតអនុញ្ញាត, មិនបានស្នើសុំការយល់ព្រមជាមុនចំពោះការផ្ទេរសិទ្ធិកាន់កាប់វិញ្ញាបនបត្រ ឬលិខិតអនុញ្ញាតពាក់ព័ន្ធ។
ក្នុងជំពូកដែលនិយាយពីការកំណត់ទោសប្បញ្ញតិ្តដដែលនេះបានបញ្ជាក់ថា៖ «ត្រូវពិន័យអន្តរការណ៍ពី ៥ លានរៀលទៅ ១០ លានរៀលចំពោះរូបវន្តបុគ្គល ឬនីតិបុគ្គលណាដែលធ្វើសេវាកម្មការពាររុក្ខជាតិ ឬសេវាកម្មភូតគាមអនាម័យដោយគ្មានលិខិតអនុញ្ញាតក្រោមបទប្បញ្ញត្តិនៃច្បាប់នេះ កាន់កាប់ផលិតផល ឬធ្វើសេវាកម្មដោយប្រើផលិតផលដែលមិនបានឆ្លងកាត់ដំណើរការសិក្សា វាយតម្លៃ ឬគ្មានសេចក្តីវាយតម្លៃរបស់អង្គភាពជំនាញ»។
ក្នុងមាត្រា ១០៨ នៃច្បាប់ដដែលនេះបានចែងថា ត្រូវពិន័យអន្តរការណ៍ពី ១០ លានរៀលទៅ ២០ លានរៀលចំពោះជនណាដែលជួល ប្រើសេវាកម្ម ឬធ្វើការផ្សព្វផ្សាយដោយផ្ទាល់នូវព័ត៌មានអំពីសមាសភាពចង្រៃគ្រប់ប្រភេទ, ធ្វើការនាំចូល នាំចេញរុក្ខជាតិ ផលិតផលរុក្ខជាតិ និងទំនិញជាកម្មវត្ថុនៃការត្រួតពិនិត្យភូតគាមអនាម័យ ដោយគ្មានវិញ្ញាបនបត្រ។
ទាក់ទងនឹងការដាក់ទោសទណ្ឌរហូតដល់ជាប់ពន្ធនាគារវិញនៅក្នុងមាត្រា ១០៩ បានចែងថា ត្រូវផ្តន្ទាទោសដាក់ពន្ធនាគារពី ១ ឆ្នាំដល់ ៥ ឆ្នាំ និងត្រូវពិន័យជាប្រាក់ចំនួនពី ២៥ លានរៀល ដល់ ៥០ លានរៀល ចំពោះរូបវន្តបុគ្គល ឬនីតិបុគ្គលណាដែលធ្វើការដាំដុះ ការនាំចូល ការកាន់កាប់ ឬការចែកចាយនូវសព៌ាង្គកាយបង្កគ្រោះថ្នាក់រុក្ខជាតិចង្រៃ និងប្រភេទចំណូលថ្មីឈ្លានពាននៃរុក្ខជាតិ ឬសត្វដែលបង្កហានិភ័យរាតត្បាតចំពោះរុក្ខជាតិ ផលិតផលរុក្ខជាតិ និងប្រព័ន្ធក្សេត្របរិស្ថាននៅក្នុងប្រទេសកម្ពុជា។
ច្បាប់ពីការការពាររុក្ខជាតិ និងភូតគាមអនាម័យនេះកំណត់ពីការគ្រប់គ្រងសុខភាពរុក្ខជាតិ ការអនុវត្តវិធានការការពាររុក្ខជាតិ និងវិធានការភូតគាមអនាម័យ ការការពារធនធានរុក្ខជាតិគ្រប់ប្រភេទ ការទប់ស្កាត់ការបង្ក ការរាលដាលឆ្លង និងការរាតត្បាតពីសំណាក់សមាសភាពចង្រៃ ការលើកកម្ពស់ផលិតភាពកសិកម្ម សន្តិសុខស្បៀង អនាម័យ គុណភាព និងសុវត្ថិភាពផលិតកសិកម្ម៕