.jpg)
រូបភាព ស្នងការដ្ឋាននគរបាលខេត្តបាត់ដំបង
បាត់ដំបងៈ លោក សុខ សារិន អធិការ នគរបាលស្រុកបវេលបានដឹកនាំកម្លាំងជំនាញប្រឆាំងគ្រឿងញៀន កម្លាំងអន្តរាគមន៍ និងកម្លាំងប៉ុស្តិ៍នគរបាលរដ្ឋបាលខ្នាចរមាសចុះល្បាតក្នុងភូមិសាស្ត្រ ហើយបានធ្វើការឃាត់ខ្លួនមនុស្ស ២ នាក់ ក្រោយពីបានរកឃើញថ្នាំញៀនចំនួន ៣០៦ គ្រាប់ និងវត្ថុតាងផ្សេងៗទៀតកាលពីថ្ងៃព្រហស្បតិ៍ទី ៥ ខែឧសភានេះ។ នេះបើយោងតាមស្នងការដ្ឋាននគរបាលខេត្តបាត់ដំបង។
ក្នុងកិច្ចប្រតិបត្តិនេះ សមត្ថកិច្ចបានឃាត់ខ្លួនជនសង្ស័យទី ១ ជាបុរសមានអាយុ ២៣ ឆ្នាំរស់នៅភូមិកោះរាម ឃុំខ្នាចរមាស ស្រុកបវេល ខេត្តបាត់ដំបង។ វត្ថុតាងដែលចាប់យកបានរួមមាន៖ ម្សៅក្រាមពណ៌សថ្លាច្រកក្នុងថង់ប្លាស្ទិកថ្លាចំនួន ៣ ថង់ ដែលសង្ស័យមានសារធាតុញៀន និងទូរស័ព្ទដៃចំនួន ១ គ្រឿងផងដែរ។
ឆ្លងតាមការស្រាវជ្រាវ និងដោយបានការអនុញ្ញាតពីសាលាដំបូងខេត្តបាត់ដំបង សមត្ថកិច្ចបានបន្តកិច្ចប្រតិបត្តិការរហូតឈានដល់ការចាប់ខ្លួនជនសង្ស័យចំនួន ១ នាក់ទៀតក្នុងភូមិកោះរាម ឃុំខ្នាចរមាស ស្រុកបវេល នៅថ្ងៃខែឆ្នាំដដែល។ ជនសង្ស័យជាស្ត្រីអាយុ ៣៦ ឆ្នាំ រស់នៅភូមិកោះរាម ឃុំខ្នាចរមាស ស្រុកបវេល។ ក្នុងនោះវត្ថុតាងចាប់យកបានរួមមាន៖ ម្សៅក្រាមពណ៌សថ្លាច្រកក្នុងថង់ប្លាស្ទិកថ្លាចំនួន ១៣ ថង់ ដែលសង្ស័យមានសារធាតុញៀន, ថ្នាំគ្រាប់រាងមូលសំប៉ែតពណ៌ផ្កាឈូកមានអក្សរបរទេស WY លើ ចំហៀងគ្រាប់ថ្នាំនីមួយៗចំនួន ៣០៦ គ្រាប់ដែលសង្ស័យមានសារធាតុញៀន, ជញ្ជីងសម្រាប់ថ្លឹងចំនួន ០១ គ្រឿង, ទូរសព្ទដៃចំនួន ២ គ្រឿង និងថង់សម្រាប់រំលែកថ្នាំញៀនមួយចំនួន។
ទាំងវត្ថុតាង និងជនសង្ស័យត្រូវបាននគរបាលបានកសាងសំណុំរឿងបញ្ចូនទៅការិយាល័យជំនាញនៅស្នងការដ្ឋាន ដើម្បីអនុវត្តបន្តតាមនីតិវិធីច្បាប់៕
