កណ្ដាលៈ សម្ដេចព្រះឧត្តមមុនី ជា សំអាង សមាជិកថេរសភា ព្រះអគ្គារធិការង និងជាព្រះមេគណខេត្តកណ្ដាលបានអំពាវនាវដល់អាជ្ញាធរគ្រប់លំដាប់ថ្នាក់ សូមជួយបង្កលក្ខណៈងាយស្រួលដល់ព្រះសង្ឃ ជាពិសេសញាតិញោមពុទ្ធបរិស័ទ សូមបន្តចូលរួមចំណែកជួយឧបត្ថម្ភគាំទ្រដល់ព្រះសង្ឃដែលកំពុងសិក្សារៀនសូត្រទៅតាមសទ្ធាជ្រះថ្លា និងតាមលទ្ធភាពដែលអាចធ្វើទៅបាន ដើម្បីឱ្យព្រះសង្ឃមានលទ្ធភាពក្នុងការសិក្សារៀនសូត្រ។
ព្រះអង្គបន្តថា ការជួយឧបត្ថម្ភដល់ព្រះសង្ឃនេះ គឺជាបុណ្យកុសលដ៏ធំធេង ហើយនេះក៏ជាការឧបត្ថម្ភ និងផ្ដល់ឱកាសទៅដល់កូនកសិករ ខ្វះខាតដែលលោកបានបួស និងមករៀនដើម្បីមានសមត្ថភាពមានចំណេះដឹង ចូលរួមចំណែកក្នុងការអភិវឌ្ឍសង្គមជាតិផងដែរ។ នេះបើតាមរដ្ឋបាលខេត្តកណ្តាល។
សម្ដេចព្រះឧត្តមមុនី ជា សំអាង បានមានសង្ឃដីកាបែបនេះនៅព្រឹកថ្ងៃទី ៦ ខែឧសភា ឆ្នាំ ២០២២ ក្នុងពេលដែលព្រះអង្គបាននិមន្តជាអធិបតីក្នុងពិធីបើកបវេសនកាលនៃពុទ្ធិកវិទ្យាល័យ «ប៊ុន រ៉ានី ហ៊ុន សែន ក្រពើហា» ស្ថិតនៅសង្កាត់ព្រែកឫស្សី ក្រុងតាខ្មៅ ក្នុងឆ្នាំសិក្សាថ្មី ២០២២-២០២៣។
ពិធីនេះ ក៏មានការអញ្ជើញចូលរួមផងដែរពីសំណាក់ លោកស្រី ហ៊ុន កុសនី អភិបាលរងខេត្តកណ្ដាល និងមន្ត្រី សង្ឃ ព្រះថេរានុថេរៈ លោកគ្រូ សមណសិស្សជាង ៤០០ អង្គ-នាក់។
ជាមួយគ្នានេះ សម្ដេចព្រះឧត្តមមុនី ជា សំអាង បានណែនាំដល់សមណសិស្សទាំងអស់ត្រូវស្រឡាញ់ការសិក្សារៀនសូត្រ កុំបោះបង់ចោលការសិក្សា និងកុំខ្ជិលច្រអូស ត្រូវឧស្សាព្យាយាម ដើម្បីសម្រេចប្រយោជន៍ ដែលខ្លួនមានសេចក្តីប្រាថ្នាចង់ចេះចង់ដឹង ដើម្បីទទួលបានជោគជ័យក្នុងការសិក្សារៀនសូត្រ។
ជាងនេះទៅទៀតត្រូវគោរពឱ្យបានហ្មត់ចត់នូវម៉ោងបង្រៀន និងម៉ោងសិក្សារបស់ខ្លួន ក្នុងទិសដៅសម្រេចឱ្យបានចប់តាមកម្មវិធីសិក្សាប្រកបដោយគុណភាព និងមានចំណេះដឹងពិតប្រាកដ។
ថ្លែងក្នុងពិធីនេះដែរ លោកស្រី ហ៊ុន កុសនី បានចូលរួមអបអរសាទរចំពោះការបើកបវេសនកាលឆ្នាំសិក្សាថ្មី ២០២២- ២០២៣ ព្រមទាំងបានថ្លែងអំណរព្រះគុណ និងអរគុណដល់ថ្នាក់ដឹកនាំគ្រប់ លំដាប់ថ្នាក់ មន្ទីរធម្មការ និងសាសនា ក្រសួង ស្ថាប័ន មន្ទីរ-អង្គភាពពាក់ព័ន្ធ អាជ្ញាធរដែនដី គណៈគ្រប់គ្រងសាលា ពុទ្ធិកសិក្សាគ្រប់ភូមិសិក្សា ព្រះចៅអធិការ សប្បុរសជន ជាពិសេស សាស្ត្រាចារ្យ លោកគ្រូ អ្នកគ្រូ ដែលបានពុះពារ គ្រប់ឧបសគ្គ ប្រកបដោយស្មារតីទទួលខុសត្រូវខ្ពស់ និងមានសាមគ្គីភាពក្នុងការចូលរួមជាមួយរដ្ឋបាលខេត្ត ដើម្បីប្រយុទ្ធប្រឆាំងនឹងជំងឺកូវីដ ១៩ និងធានាបាននូវនិរន្តរភាពនៃការសិក្សារៀនសូត្ររបស់សមណនិស្សិត សមណសិស្ស និស្សិត សិស្ស តាមគ្រប់រូបភាពអស់រយៈកាលជាង ២ ឆ្នាំកន្លងមកនេះ។
ព្រះឃោសមុនីវង្ស វ័ន្ត វណ្ណោ ព្រះនាយកពុទ្ធិកវិទ្យាល័យ «ប៊ុន រ៉ានី ហ៊ុនសែន ក្រពើហា» និងជាព្រះចៅអធិការវត្តប្រជុំនទី ហៅវត្តក្រពើហា បានឱ្យដឹងថា ក្នុងឆ្នាំសិក្សា ២០២២-២០២៣ នេះ ពុទ្ធិកវិទ្យាល័យ «ប៊ុន រ៉ានី ហ៊ុនសែន ក្រពើហា» មានសមណសិស្សសរុបចំនួន ៣៤១ អង្គ។
ពុទ្ធិកវិទ្យាល័យមានចំនួន ១៥ មុខវិជ្ជាសម្រាប់សមណសិស្សសិក្សារៀនសូត្ររួមមាន ភាសាបាលី ភាសាសំស្ក្រឹត ព្រះធម៌ ពុទ្ធវិន័យ ពុទ្ធសាសនា ភាសាខ្មែរ ភាសាអង់គ្លេស គណិតវិទ្យា រូបវិទ្យា គីមីវិទ្យា ផែនដីវិទ្យា ប្រវត្តិវិទ្យា ភូមិវិទ្យា ពលរដ្ឋវិទ្យា និងជីវវិទ្យា៕