មណ្ឌលគិរីៈ លោកឧត្តមសេនីយ៍ឯក ឆាយ គឹមខឿន អគ្គស្នងការរងនគរបាលជាតិតំណាងលោកនាយឧត្តមសេនីយ៍ នេត វឿន អគ្គស្នងការនគរបាលជាតិកាលពីថ្ងៃសុក្រទី ៦ ខែឧសភានេះបានណែនាំដល់មន្ត្រីនគរបាលខេត្តមណ្ឌលគិរីឱ្យពង្រឹងសមត្ថភាពលើការងារជំនាញ និងចូលរួមការពារសន្តិសុខ សណ្តាប់ធ្នាប់ក្នុងពេលបោះឆ្នោតខាងមុខឱ្យប្រព្រឹត្តទៅដោយរលូន ត្រឹមត្រូវ តម្លាភាព យុត្តិធម៌ គ្មានអំពើហិង្សា និងគ្មានការគំរាមកំហែង។ នេះបើយោងតាមស្នងការដ្ឋាននគរបាលខេត្តមណ្ឌលគិរី។
លោកបានណែនាំឱ្យយកចិត្តទុកដាក់ និងជំរុញលើការងារនគរបាលប៉ុស្តិ៍រដ្ឋបាលត្រូវសិក្សាស្រាវជ្រាវ និងបង្កើនគុណភាពដល់នគរបាល ប៉ុស្តិ៍ រដ្ឋបាលធ្វើយ៉ាងណាកុំឱ្យប៉ុស្តិ៍នគរបាលរដ្ឋបាលខ្វះខាតកម្លាំងបន្តទៅទៀត។ បើមានការខ្វះខាត ត្រូវបំពេញបន្ថែមឱ្យបានគ្រប់គ្រាន់ ពីព្រោះប៉ុស្តិ៍រដ្ឋបាលជាកម្លាំង ស្នូលមួយដ៏សំខាន់ជាងគេក្នុងការការពារសន្តិសុខសណ្តាប់ធ្នាប់ សុវត្ថិភាព ជូនប្រជាពលរដ្ឋនៅតាមមូលដ្ឋាន។
លោក ឆាយ គឹមខឿន បានបញ្ជាក់ថា ស្នងការដ្ឋាននគរបាលខេត្តមណ្ឌលគិរី បានរៀបចំសន្តិសុខ និងសណ្តាប់ធ្នាប់ជូនប្រជាពលរដ្ឋបានល្អប្រសើរ។ ម្យ៉ាងវិញទៀតលោកពិនិត្យឃើញថា ដើមឆ្នាំ ២០២២ នេះ សភាពការណ៍បទល្មើសព្រហ្មទណ្ឌក៏មានការថយចុះ ដែលនេះគឺជាការបង្ហាញឱ្យឃើញពីការយកចិត្តទុកដាក់ប្រឹងប្រែងរបស់កងកម្លាំងនគរបាលទាំងអស់ ក្រោមការដឹកនាំរបស់លោកឧត្តមសនីយ៍ទោ ឡោ សុខា ស្នងការខេត្ត។
លោកក៏បានណែនាំដល់ថ្នាក់ដឹកនាំស្នងការដ្ឋាននគរបាលខេត្តផងដែរនូវកិច្ចការងារមួយចំនួនទាក់ទិននឹងដំណើរការបោះឆ្នោត ថ្ងៃទី ០៥ ខែមិថុនា ឆ្នាំ ២០២២ ខាងមុខនេះ។ ក្នុងនោះរួមមានរៀបចំប្រព័ន្ធសន្តិសុខ និងដាក់ពង្រាយកម្លាំងសម្រាប់ការពារដំណើរការបោះឆ្នោតក្រុមប្រឹក្សាឃុំ សង្កាត់ អាណត្តិទី ៥ ឆ្នាំ ២០២២ នាពេលខាងមុខនេះ។ បើខ្វះកម្លាំងនគរបាលត្រូវបញ្ចូលកម្លាំងប្រជាការពារបន្ថែម ដើម្បីរក្សាបានសន្តិសុខ សណ្តាប់ធ្នាប់ សុវត្ថិភាព ក្នុងដំណើរការបោះឆ្នោតនោះប្រព្រឹត្តទៅដោយរលូន ត្រឹមត្រូវ តម្លាភាព យុត្តិធម៌ គ្មានអំពើហិង្សាគ្មានការគំរាមកំហែង ចាប់ដំណើរការបោះឆ្នោតរហូតដល់រាប់សន្លឹកឆ្នោត និងដឹកជញ្ជូនសន្លឹកឆ្នោត។
ក្រៅពីនោះក៏ត្រូវពង្រឹងសមត្ថភាពបន្ថែម និងបង្កើនប្រសិទ្ធភាពការងារដល់ប៉ុស្តិ៍នគរបាលរដ្ឋបាលទាំង ២១ ឃុំ សង្កាត់នៅក្នុងខេត្តមណ្ឌលគិរី ហើយក៏ត្រូវបង្កើតក្រុមការងារប្រមូលព័ត៌មាន និងប្រតិកម្មរហ័ស ដើម្បីបកស្រាយ និងឆ្លើយតបនឹងការវាយប្រហារណាមួយដែលបានកើតឡើង។
លោកក៏មិនភ្លេចផ្តាំផ្ញើដល់ថ្នាក់ដឹកនាំនៃស្នងការដ្ឋាននគរបាលខេត្តមណ្ឌលគិរី ពង្រឹងនូវស្មារតីសាមគ្គីភាពផ្ទៃក្នុងឱ្យបានល្អប្រសើរ និងពិនិត្យពិច្ច័យឡើងវិញទៅតាមការងារជំនាញរបស់ខ្លួន ដើម្បីការពារសន្តិសុខសណ្តាប់ធ្នាប់សង្គមនៅក្នុងខេត្តមណ្ឌលគិរីឱ្យបានល្អប្រសើរបន្ថែមទៀតដើម្បីធានាបាននូវបរិយាកាសក្នុងការឃោសនាការបោះឆ្នោតជ្រើសរើស ឃុំសង្កាត់៕