ភ្នំពេញៈ អភិបាលខេត្តពោធិ៍សាត់លោក ជាវ តាយ ស្នើអាជ្ញាធរក្រុង និងស្រុកទាំងអស់ឱ្យបង្កើតក្រុមព័ត៌មាន ដើម្បីផ្សព្វផ្សាយពីសម្មភាពថ្នាក់ដឹកនាំ ការអភិវឌ្ឍនៅក្នុងមូលដ្ឋាន និងសក្តានុពលរបស់ខេត្តនេះឱ្យបានទូលំទូលាយ។
លោកស្នើបែបនេះក្នុងកិច្ចប្រជុំឆ្លងរបាយការណ៍ប្រចាំខែមេសា ឆ្នាំ ២០២២ របស់រដ្ឋបាលខេត្តពោធិ៍សាត់ នាថ្ងៃទី ៥ ខែឧសភា។
សាលាខេត្តពោធិ៍សាត់បញ្ជាក់ក្នុងសេចក្តីប្រកាសព័ត៌មាននាថ្ងៃទី ៦ ខែឧសភា ថា៖ [លោក ជាវ តាយ] បានស្នើដល់រដ្ឋបាលក្រុងស្រុកទាំងអស់ទូទាំងខេត្ត ត្រូវបង្កើតឱ្យមានក្រុមព័ត៌មាន និងរៀបចំសេចក្តីសម្រេចផ្ញើមករដ្ឋបាលខេត្ត ដើម្បីធ្វើការផ្សព្វផ្សាយ គាំទ្រអំពីសកម្មភាពសំខាន់ៗរបស់ថ្នាក់ដឹកនាំ ការអភិវឌ្ឍនៅក្នុងមូលដ្ឋាន និងសក្តានុពលដែលមាននៅក្នុងខេត្តឱ្យបានទូលំទូលាយ»។
លោក ជាវ តាយ បានថ្លែងថា មន្ទីរព័ត៌មានត្រូវខិតខំជំរុញការផ្សព្វផ្សាយ និងផលិតព័ត៌មានអំពីសក្តានុពលអភិវឌ្ឍន៍ដែលមាននៅក្នុងខេត្ត កិច្ចការងារទេសចរណ៍ សកម្មភាពថ្នាក់ដឹកនាំខេត្ត និងសកម្មភាពសំខាន់ៗផ្សេងៗទៀត ឱ្យបានដល់មហាជន ពិសេសជំរុញការចាក់វ៉ាក់សាំងកូវីដ ១៩ ជូនប្រជាពលរដ្ឋឱ្យបានគ្រប់ៗគ្នា៕