.jpg)
រូបភាព អគ្គ.ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ CCF
ភ្នំពេញៈ មន្ត្រីជំនាញបន្តរកឃើញដេប៉ូប្រេងឥន្ធនៈចំនួន ៩ ទីតាំងបន្ថែមទៀតដែលរកស៊ីមិនសុចរិត និងបានចាត់វិធានការលើម្ចាស់ដេប៉ូ ក្រោយចុះត្រួតពិនិត្យតាមស្ថានីយ និងដេប៉ូប្រេងឥន្ធនៈចំនួន ៣១ ទីតាំងក្នុងរាជធានី ខេត្តចំនួន ៥។
កាលពីថ្ងៃទី ៥ ខែឧសភា មន្ត្រីជំនាញនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) ប្រចាំសាខារាជធានី ខេត្តចំនួន ៥ គឺខេត្តកំពង់ចាម ខេត្តឧត្តរមានជ័យ ស្វាយរៀង កណ្ដាល និងរាជធានីភ្នំពេញបានចុះត្រួតពិនិត្យដើម្បីការពារផលប្រយោជន៍អ្នកប្រើប្រាស់ ក៏ដូចជាទប់ស្កាត់អំពើមិនសុចរិតក្នុងវិស័យប្រេងឥន្ធនៈ។
ក.ប.ប បញ្ជាក់តាមរយៈហ្វេសប៊ុកនាថ្ងៃទី ៦ ខែឧសភាថា៖ «ដេប៉ូប្រេងឥន្ធនៈចំនួន ៩ ទីតាំងត្រូវបានមន្ត្រីជំនាញធ្វើការពិន័យទៅតាមនីតិវិធីក្រោយរកឃើញថាមិនមានអនុលោមភាព។ ការចាត់វិធានការច្បាប់គឺធ្វើឡើងខណៈពេលដែលមន្ត្រីជំនាញ ក.ប.ប. ចុះត្រួតពិនិត្យប្រេងឥន្ធនៈនៅតាមបណ្ដាស្ថានីយ/ដេប៉ូ»។
ក.ប.ប នៃក្រសួងពាណិជ្ជកម្ម បន្តថា៖ «តាមលទ្ធផលត្រួតពិនិត្យរបស់មន្ត្រីជំនាញ គឺបានរកឃើញដេប៉ូប្រេងឥន្ធនៈចំនួន ៩ ទីតាំងមិនមានអនុលោមភាព ក្នុងចំណោមស្ថានីយ/ដេប៉ូចំនួន ៣១ ទីតាំងដែលបានត្រួតពិនិត្យសរុប»៕
