.jpg)
ភ្នំពេញៈ មូលនិធិសហប្រជាជាតិសម្រាប់ប្រជាជន (UNFPA) និងរាជរដ្ឋាភិបាលជប៉ុន នៅថ្ងៃទី ៦ ខែឧសភា បានប្រកាសដាក់ឱ្យដំណើរការគម្រោងថ្មីដែលគាំទ្រដល់រាជរដ្ឋាភិបាលកម្ពុជាក្នុងការកសាងប្រព័ន្ធសុខាភិបាលដែលមានភាពធន់ និងឆ្លើយតបទៅតាមតម្រូវការដើម្បីធានាថា ប្រជាជនដែលងាយរងគ្រោះក្នុងតំបន់គោលដៅនៅតែបន្តទទួលបានសេវាសុខភាពផ្លូវភេទ សុខភាពបន្តពូជ សុខភាពមាតានិងទារក ប្រកបដោយគុណភាព និងព័ត៌មានចាំបាច់ក្នុងអំឡុងពេលរាតត្បាតនៃជំងឺកូវីដ ១៩។
UNFPA បញ្ជាក់តាមរយៈទំព័រហ្វេសប៊ុកនាថ្ងៃទី៧ ខែឧសភា ថា ជាមួយនឹងមូលនិធិប្រមាណ ១,១៧ លានដុល្លារពីរាជរដ្ឋាភិបាលជប៉ុនតាមរយៈ UNFPA ប្រចាំនៅកម្ពុជា គម្រោងនេះបង្កើតឱកាសទាន់ពេលវេលា ដើម្បីបន្តធ្វើការយ៉ាងជិតស្និទ្ធជាមួយក្រសួងពាក់ព័ន្ធមួយចំនួន រួមមាន ក្រសួងសុខាភិបាល ក្រសួងកិច្ចការនារី និងក្រសួងអប់រំ យុវជន និងកីឡា។
គម្រោងនេះផ្ដោតជាសំខាន់លើការលើកកម្ពស់សេវាសង្គ្រោះបន្ទាន់ផ្នែកសម្ភពនិងការថែទាំទារកទើបនឹងកើត នៅក្នុងខេត្តភាគឦសាន តាមរយៈការផ្តល់ឧបករណ៍សង្គ្រោះជីវិត និងមធ្យោបាយបញ្ជូនដែលមានដូចជា រថយន្តសង្គ្រោះបន្ទាន់ ជាដើម។
គម្រោងនេះផ្តោតផងដែរលើការពង្រឹងសមត្ថភាពអ្នកផ្តល់សេវាសុខាភិបាល និងការលើកកម្ពស់ការផ្ដល់សេវាសុខភាពផ្លូវភេទ សុខភាពបន្តពូជ សុខភាពមាតានិងទារក សំខាន់ៗតាមរយៈការពង្រីកវេទិកាសិក្សាតាមប្រព័ន្ធអេឡិចត្រូនិក និងសេវាថែទាំសុខភាពពីចម្ងាយ។
គម្រោងនេះថែមទាំងផ្តោតលើការធ្វើឱ្យកាន់តែប្រសើរឡើងនូវលទ្ធភាពទទួលបានព័ត៌មានចាំបាច់ និងសេវាសុខភាពផ្លូវភេទ សុខភាពបន្តពូជ សុខភាពមាតានិងទារកសម្រាប់ប្រជាជនងាយរងគ្រោះរួមទាំង យុវជន និងជនរងគ្រោះដោយសារអំពើហិង្សាផ្អែកលើយេនឌ័រ តាមរយៈការប្រើប្រាស់វេទិកាឌីជីថលនវានុវត្ត។
UNFPA បញ្ជាក់ថា៖ «UNFPA បានគាំទ្រ និងពង្រឹងប្រព័ន្ធសុខាភិបាលដែលធន់នឹងរោគរាតត្បាតដែលកំពុងបន្តកើតមាន និងត្រៀមខ្លួនឱ្យកាន់តែប្រសើរឡើងសម្រាប់គ្រោះមហន្តរាយនាពេលខាងមុខ»៕
