មណ្ឌលគិរីៈ លោកឧត្តមសេនីយ៍ឯក ឆាយ គឹមខឿន អគ្គស្នងការរងនគរបាលជាតិ បានជំរុញឱ្យនគរបាលការិយាល័យជំនាញនៅខេត្តមណ្ឌលគិរី ត្រូវសិក្សាស្រាវជ្រាវ និងបង្កើនគុណភាពដល់នគរបាលប៉ុស្តិ៍រដ្ឋបាល ធ្វើយ៉ាងណាកុំឱ្យប៉ុស្តិ៍នគរបាលរដ្ឋបាលរបស់ខ្លួនខ្វះខាតកម្លាំង ព្រោះប៉ុស្តិ៍រដ្ឋបាលជាកម្លាំងស្នូលមួយដ៏សំខាន់ក្នុងការការពារសន្តិសុខ សណ្តាប់ធ្នាប់ សុវត្ថិភាព ជូនប្រជាពលរដ្ឋ។
ការថ្លែងរបស់លោកឧត្តមសេនីយ៍ឯក ឆាយ គឹមខឿន បែបនេះធ្វើឡើង ក្នុងពេលជួបសំណេះសំណាល និងពង្រឹងសមត្ថភាពលើការងារជំនាញការិយាល័យទាំងបួននៅតាមបណ្តាផែននីមួយៗក្នុងស្នងការដ្ឋាននគរបាលខេត្តមណ្ឌលគិរី នៅថ្ងៃទី៦ ខែឧសភា។
លោកឆាយ គឹម ខឿន ថ្លែងថា៖«បើមានការខ្វះខាតកម្លាំងត្រូវបំពេញបន្ថែមឱ្យបានគ្រប់គ្រាន់ពីព្រោះប៉ុស្តិ៍រដ្ឋបាលជាកម្លាំងស្នូលមួយដ៏សំខាន់ជាងគេក្នុងការការពារសន្តិសុខ សណ្តាប់ធ្នាប់ សុវត្ថិភាព ជូនប្រជាពលរដ្ឋនៅតាមមូលដ្ឋាន»។
ជាមួយគ្នានោះលោកអគ្គស្នងការរងនគរបាលជាតិ បានណែនាំ ដល់ការិយាល័យជំនាញទាំងបួននៅខេត្តមណ្ឌលគិរី ត្រូវយកចិត្តទុកដាក់បង្កើនសម្ថភាពទៅតាមបណ្តាការិយាល័យជំនាញនីមួយៗ ជាពិសេសការងារព្រហ្មទណ្ឌ ត្រូវត្រួតពិនិត្យការងារ និងវាយតម្លៃការងារឡើងវិញឱ្យបានច្បាស់លាស់ និងស៊ីជម្រៅ។ ចំណែកការងារសន្តិសុខត្រូវក្តាប់ព័ត៌មាន ស្តីពីសន្តិសុខសណ្តាប់ធ្នាប់ នៅតាមបណ្តាមូលដ្ឋានក្នុងយុទ្ធនាការបោះឆ្នោតឃុំ សង្កាត់ អាណត្តិទី ៥ ដែលនឹងឈានចូលមកដល់នាពេលខាងមុខនេះ។
លោកបានលើកឡើងថា ស្នងការដ្ឋាននគរបាលខេត្តមណ្ឌលគិរី បានរៀបចំសន្តិសុខ និងសណ្តាប់ធ្នាប់ជូនប្រជាពលរដ្ឋបានល្អប្រសើរ ម្យ៉ាងវិញទៀតពិនិត្យឃើញថា ដើមឆ្នាំ ២០២២នេះ សភាពការណ៍បទល្មើសព្រហ្មទណ្ឌក៏មានការថយចុះ ផងដែរ។ នេះគឺជាការបង្ហាញឱ្យឃើញពីការយកចិត្តទុកដាក់ប្រឹងប្រែងរបស់កងកម្លាំងនគរបាលទាំងអស់ ដែលបានខិតខំយកចិត្តទុកដាក់បំពេញតួនាទីរបស់ខ្លួនក្នុងកិច្ចការការពារសន្តិសុខ សណ្តាប់ធ្នាប់ សុវត្ថិភាព ជូនប្រជាពលរដ្ឋក្នុងខេត្ត បានល្អប្រសើរគួរជាទីមោទនភាព។
លោកអគ្គស្នងការរង ក៏បានណែនាំដល់ថ្នាក់ដឹកនាំស្នងការដ្ឋាននគរបាលខេត្តមណ្ឌលគិរី ត្រូវរៀបចំប្រព័ន្ធសន្តិសុខ និងដាក់ពង្រាយកម្លាំងសម្រាប់ការពារដំណើរការបោះឆ្នោតក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ នាពេលខាងមុខនេះ បើខ្វះកម្លាំងនគរបាលត្រូវបញ្ចូលកម្លាំងប្រជាការពារបន្ថែម ដើម្បីរក្សាបានសន្តិសុខ សណ្តាប់ធ្នាប់ សុវត្ថិភាព ក្នុងដំណើរការបោះឆ្នោតនោះ ប្រព្រឹត្តទៅដោយរលូន ត្រឹមត្រូវ តម្លាភាព យុត្តិធម៌ គ្មានអំពើហិង្សា គ្មានការគំរាមកំហែង ចាប់ដំណើរការបោះឆ្នោតរហូតដល់រាប់សន្លឹកឆ្នោត និងដឹកជញ្ជូនសន្លឹកឆ្នោត។ ជាមួយគ្នានោះ ត្រូវបង្កើតក្រុមការងារប្រមូលព័ត៌មាន និងប្រតិកម្មរហ័សដើម្បីបកស្រាយ និងឆ្លើយតបនឹងការវាយប្រហារណាមួយដែលបានកើតឡើងផងដែរ៕