.jpg)
ភ្នំពេញៈ ក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា នៅថ្ងៃទី៩ ខែឧសភា ឆ្នាំ២០២២នេះ ក្រសួងនឹងចាប់ផ្តើមធ្វើការបន្តសុពលភាពប័ណ្ណពលករកម្ពុជាទៅធ្វើការនៅបរទេស (OCWC) និងលិខិតធ្វើដំណើរពលករកម្ពុជាធ្វើការនៅបរទេស (TD) ដល់ពលករកម្ពុជា ដែលកំពុងស្នាក់នៅ និងធ្វើការនៅប្រទេសថៃ។
លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងជាប្រធាន គណៈកម្មការផ្តល់ភាពស្របច្បាប់ដល់ពលករកម្ពុជា បានឱ្យដឹងថា សាធារណជន ជាពិសេសបងប្អូនពលករកម្ពុជាទាំងអស់ដែលមានប័ណ្ណពលករកម្ពុជាទៅធ្វើការនៅបរទេស (OCWC) និងលិខិតធ្វើដំណើរពលករកម្ពុជាធ្វើការនៅបរទេស (TD) ដែលបានផុតសុពលភាព ឬ សុពលភាពនៅសល់ក្រោមរយៈពេល ៦ខែ អាចមកបន្តសុពលភាពបាន ដោយដាក់ពាក្យស្នើសុំ និងទទួលឯកសារបន្តសុពលភាព OCWC និង TD តាមប្រព័ន្ធស្វ័យប្រវត្តិកម្ម របស់នាយកដ្ឋានមុខរបរនៃក្រសួងការងារនៃព្រះរាជាណាចក្រថៃឡង់ដ៍ តាមគេហទំព័រ https://cambodia-doe.com តែមួយគត់។
លិខិតជូនដំណឹងរបស់លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ចុះថ្ងៃទី ២១ ខែមេសា ឆ្នាំ ២០២២ បានឱ្យដឹងថា ការដាក់ពាក្យស្នើសុំបន្តសុពលភាព OCWC និង TD តម្រូវឱ្យភ្ជាប់ឯកសារមួយចំនួនដូចជា៖ ស្កែនរូបថតទំហំ ៤x៦ របស់ពលករកម្ពុជា ស្កែន OCWC ដែលផុតសុពលភាព ចូលក្នុងប្រព័ន្ធស្វ័យប្រវត្តិកម្ម ស្កែន TD ដែលបានផុតសុពលភាព ឬសុពលភាពនៅសល់ក្រោមរយៈពេល ៦ខែចូលក្នុងប្រព័ន្ធស្វ័យប្រវត្តិកម្ម។ និង ផ្តល់ឯកសារសំណៅដើម OCWC និង TD ដល់មន្ត្រីនាយកដ្ឋានមុខរបរនៃក្រសួងការងារ នៃព្រះរាជាណាចក្រថៃឡង់ដ៍តែមួយគត់ ដែលមានអាសយដ្ឋាន Mitmaitri Road, Dindaeng, Bangkok 10400, Thailand ។
ចំពោះការដំណើរការឯកសារ នាយកដ្ឋានមុខរបរនៃក្រសួងការងារនៃព្រះរាជាណាចក្រថៃឡង់ដ៍ នឹងបញ្ជូនទិន្នន័យពាក្យស្នើសុំបន្តសុពលភាពរបស់ពលករកម្ពុជា មកប្រព័ន្ធទិន្នន័យ OCWC និង TD របស់គណៈកម្មការផ្តល់ភាពស្របច្បាប់ តាមរយៈ API។ ព្រមទាំងប្រគល់ឯកសារសំណៅដើម OCWC និង TD មកការិយាល័យតំណាងរបស់អនុព័ន្ធការងារកម្ពុជាដែលមានទីតាំងនៅក្នុងនាយកដ្ឋានមុខរបរនៃក្រសួងការងារនៃព្រះរាជាណាចក្រថៃឡង់ដ៍ ដើម្បីបញ្ជូនបន្តទៅស្ថានទូតព្រះរាជាណាចក្រកម្ពុជាប្រចាំព្រះរាជាណាចក្រថៃឡង់ដ៍។
លោក រដ្ឋមន្ត្រីក្រសួងការងារបានឱ្យដឹងថា គណៈកម្មការផ្តល់ភាពស្របច្បាប់ នឹងផ្ទៀងផ្ទាត់ទិន្នន័យ និងអនុម័តបន្តសុពលភាព OCWC និង ID។ ទទួលឯកសារសំណៅដើម OCWC និង TD ពីនាយកដ្ឋានមុខរបរ នៅការិយាល័យ តំណាងរបស់អនុព័ន្ធការងារកម្ពុជា ដែលមានទីតាំងនៅក្នុងនាយកដ្ឋានមុខរបរនៃក្រសួងការងារនៃព្រះរាជាណាចក្រថៃឡង់ដ៍តែមួយគត់។
លោកបន្តថា គណៈកម្មការផ្តល់ភាពស្របច្បាប់ និងស្ថានទូតព្រះរាជាណាចក្រកម្ពុជាប្រចាំព្រះរាជាណាចក្រថៃឡង់ដ៍ សហការជាមួយនាយកដ្ឋានមុខរបរ និងមន្ទីរការងារ នៃក្រសួងការងារនៃព្រះរាជាណាចក្រថៃឡង់ដ៍ដើម្បីចែក OCWC និង TD ដែលបានបន្តសុពលភាពរួចរាល់ ជូនពលករកម្ពុជា/និយោជក នៅការិយាល័យតំណាង របស់អនុព័ន្ធការងារកម្ពុជា ដែលមានទីតាំងនៅក្នុងនាយកដ្ឋានមុខរបរនៃក្រសួងការងារនៃព្រះរាជាណាចក្រថៃឡង់ដ៍។
ការពិនិត្យពាក្យស្នើសុំបន្តសុពលភាព និងអនុម័ត OCWC និង TD មានរយៈពេល ៥ថ្ងៃនៃថ្ងៃធ្វើការក្នុងករណីឯកសារបញ្ជូនមកត្រឹមត្រូវ។ ចំណែកតម្លៃបន្តសុពលភាព OCWC និង TD ចំនួន ១ ៤០០ (មួយពាន់បួនរយ) បាត ក្នុងពលករម្នាក់។
លោកបញ្ជាក់ថា៖ «បងប្អូនពលករកម្ពុជា/និយោជកអាចមកទទួលឯកសារបន្តសុពលភាព OCWC និង TD ទៅតាមការណាត់នៅការិយាល័យតំណាងរបស់អនុព័ន្ធការងារកម្ពុជា ដែលមានទីតាំងនៅក្នុងនាយកដ្ឋានមុខរបរនៃក្រសួងការងារ នៃ ព្រះរាជាណាចក្រថៃឡង់ដ៍ដែលមានអាសយដ្ឋាន Mitmaitri Road, Dindaeng, Bangkok 10400, Thailand»៕
វីដេអូ៖
