The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋមន្ត្រីក្រសួង​ព័ត៌មាន​ ស្នើ​ប្រព័ន្ធ​ផ្សព្វផ្សាយ​បំផុស​ពី​កីឡា​ឱ្យបាន​ច្រើន​ ខណៈ​កម្ពុជា​ត្រៀមខ្លួន​ធ្វើ​ម្ចាស់ផ្ទះ​កីឡា​ស៊ី​ហ្គេម​ ២០២៣

រដ្ឋមន្ត្រីក្រសួង​ព័ត៌មាន​ ស្នើ​ប្រព័ន្ធ​ផ្សព្វផ្សាយ​បំផុស​ពី​កីឡា​ឱ្យបាន​ច្រើន​ ខណៈ​កម្ពុជា​ត្រៀមខ្លួន​ធ្វើ​ម្ចាស់ផ្ទះ​កីឡា​ស៊ី​ហ្គេម​ ២០២៣

Content image - Phnom Penh Post

រដ្ឋមន្ត្រីក្រសួង​ព័ត៌មាន​ ស្នើ​ប្រព័ន្ធ​ផ្សព្វផ្សាយ​បំផុស​ពី​កីឡា​ឱ្យបាន​ច្រើន​ ខណៈ​កម្ពុជា​ត្រៀមខ្លួន​ធ្វើ​ម្ចាស់ផ្ទះ​កីឡា​ស៊ី​ហ្គេម​ ២០២៣

ភ្នំពេញៈ រដ្ឋមន្ត្រីក្រសួង​ព័ត៌មាន លោក ខៀវ កាញារីទ្ធ បាន​ថ្លែងថា អ្នកសារព័ត៌មាន​មាន​នាទី​សំខាន់​ណាស់​ក្នុងការ​ផ្សព្វផ្សាយ​កន្ត្រាក់​អារម្មណ៍ ឱ្យ​ប្រជាពលរដ្ឋ​បាន​យល់ដឹង​អំពី​សារៈសំខាន់​នៃ​ការរៀបចំ​ព្រឹត្តិការណ៍ SEA-Games & ASEANPARA-Games ឆ្នាំ​ ២០២៣ ហើយក៏​ជា​អ្នក​ដែល​ត្រូវ​តាមដាន និង​លើក​ពី​កីឡា​នេះ​ចាប់ពីពេលនេះ​តទៅ​ផងដែរ​។

​ក្នុង​សន្និសីទ​សារព័ត៌មាន ស្តីពី​ដំណើរ​ឆ្ពោះទៅ​ព្រឹត្តិការណ៍ SEA-Games & ASEANPARA-Games ឆ្នាំ​២០២៣ ដែល​ធ្វើឡើង​នៅ​សាលប្រជុំ​នៃ​ពហុ​កីឡដ្ឋាន​ជាតិ​មរតក​តេ​ជោ​នា​ថ្ងៃ ទី​៧ ខែឧសភា​នេះ​លោក ខៀវ កាញារីទ្ធ បានឱ្យដឹងថា ចាប់ពី​ថ្ងៃទី ៨ ខែឧសភា​នេះ​តទៅ ក្រុមមន្ត្រី​ក្រសួង​ព័ត៌មាន​នឹង​ចុះ​ទៅតាម​បណ្តា​ខេត្ត​ដើម្បី​ពិនិត្យមើល​អំពី​តម្រូវការ ព្រោះ​ព្រឹត្តិការណ៍ SEA-Games មិន​ធ្វើ​តែ​នៅ​រាជធានី​ភ្នំពេញ​នោះទេ គឺ​ធ្វើ​ទាំង​នៅតាម​បណ្តា​ខេត្ត​ផងដែរ​។

​លោក​ថ្លែងថា​៖«​យើង​នឹង​ទៅ​ពិ​ន្យិ​ដើម្បី ទី​១​យើង​ដឹងថា​តើ​យើង​នឹងត្រូវ​ការ​ផ្គុំ​កម្លាំង​ទូរទស្សន៍ វិទ្យុ​របស់​យើង​ទាំងអស់​យ៉ាងណា​ដើម្បី​ធ្វើការ​ជាមួយគ្នា​។ ប៉ុន្តែ​ទី​២ ចង់ឱ្យ​អស់លោក​ពិធីករ​ពិធី​ការិនី​ឧស្សាហ៍​លើក​អំពី​កីឡា​នេះ យើង​ហៅថា ប្រជាជន​ម្នាក់​កីឡា​ម្នាក់ ដូច​ច្នេះ​យើង​អាច​សរសេរ​អំពី​ការប្រឹងប្រែង​របស់​កីឡា​នេះ​ឬ​លើក​ពី​កីឡា​នោះ ដើម្បី​ប្រជាជន​យើង​យល់​»​។

​លោក​រដ្ឋមន្ត្រីក្រសួង​ព័ត៌មាន​បាន​គូសបញ្ជាក់ថា ការត្រៀមខ្លួន​ធ្វើជា​ម្ចាស់ផ្ទះ ក្នុងការ​រៀបចំ​ព្រឹត្តិការណ៍ SEA-Games & ASEANPARA-Games ឆ្នាំ​២០២៣ នេះ​គឺ​សំខាន់​ណាស់ ហើយ​ព្រឹត្តិការណ៍​នេះ​រយៈ​៦៤​ឆ្នាំ​ទើប​កម្ពុជា​បានធ្វើ​ម្តង​។ នេះ​អាច​និយាយបានថា មួយជីវិត​ស្គាល់​បានតែ​ម្តង​ប៉ុណ្ណោះ​នៅក្នុង​ប្រទេស​កម្ពុជា​ដូច​ច្នេះ​ព្រឹត្តិការណ៍​នេះ​ជា​ប្រវត្តិសាស្ត្រ​ប្រចាំជីវិត​ដែល​ទាមទារ​ធ្វើឱ្យ​បានល្អ​បំផុត​។

​លោក​ថ្លែងថា​៖«​បើ​អត់​មាន​ប្រព័ន្ធ​ផ្សព្វផ្សាយ​ទេ​ជោគជ័យ​បាន​ត្រឹម​៥០​ភាគរយ​ទេ ហើយ​បើ​ប្រព័ន្ធ​ផ្សព្វផ្សាយ​យើង​ផ្សាយ​មិនល្អ ជោគជ័យ​ក៏​វា​បាន​តិច ប៉ុន្តែ​បើ​យើង​ចេះ​ផ្សាយ​គឺ​វា​ល្អ​ទៅតាម​ហ្នឹង​។​អ៊ីចឹង​ការជួបជុំ​ថ្ងៃនេះ​គឺ​ចង់​ជម្រាប​អំពី​បញ្ហា​ដែល​ត្រូវ​លើក​គឺ​ទី​១ បំផុសប្រជាជន​ឱ្យ​យល់​អំពី​ទម្លាប់​ថ្មី ទី​២​បំផុស​កីឡា និង​ទី​៣​រើស​រកមើល​ពន្លក​ថ្មី​ដើម្បី​យើង​ដឹកនាំ​»​។​

​ក្នុង​សន្និសីទ​សារព័ត៌មាន​នោះ លោក​ខៀវ កាញារីទ្ធ​បានស្នើ​សុំឱ្យ​ប្រព័ន្ធ​ផ្សព្វផ្សាយ​ជួយ​បំផុស​ពី​កីឡា​ឱ្យបាន​កាន់តែ​ផុសផុល​ឡើង​ពីព្រោះ​កីឡា​ធ្វើឱ្យមាន​សុខភាព​ល្អ និង​ធ្វើឱ្យ​មនុស្ស​មួយចំនួន​ងាក​ចេញ​អំពី​រឿង​អបាយមុខ ដូចជា​គ្រឿងញៀន​ជាដើម​។ លោក​ថ្លែងថា​៖«​ប្រទេសមួយៗ​ប្រឹង​ណាស់ កីឡា​ហ្នឹងហើយ​វា​នាំមុខ លេចមុខ​លេច​មាត់​ជាងគេ អត់​គិត​ប្រទេស​តូច​ប្រទេស​ធំ​ទេ ហើយ​អ្នក​ដែលមាន​ភារកិច្ច​ធំ​គឺ​យើង ប្រព័ន្ធ​ផ្សព្វផ្សាយ​របស់​យើង យើង​លើកទឹកចិត្ត​គាត់​សប្បាយរីករាយ ហើយ​ជួនកាល​វា​ធ្វើឱ្យ​ជីវិត​មនុស្ស​និង​គ្រួសារ​ទាំងមូល​ប្រែប្រួល​» ៕

អត្ថបទគួរចាប់អារម្មណ៍