The Phnom Penh Post Search

Search form




Logo of Phnom Penh Post newspaper Phnom Penh Post - ផ្ទះ​ចំនួន​ ១៨ ខ្នង ​រង​ការខូចខាត​ ក្នុង​ហេតុការណ៍​អគ្គិភ័យ​កើតឡើង​ ដោយសារ​ឆ្លងចរន្ត​អគ្គិសនី ​នៅ​ខណ្ឌ​ឫស្សីកែវ ​រាជធានី​ភ្នំពេញ

ផ្ទះ​ចំនួន​ ១៨ ខ្នង ​រង​ការខូចខាត​ ក្នុង​ហេតុការណ៍​អគ្គិភ័យ​កើតឡើង​ ដោយសារ​ឆ្លងចរន្ត​អគ្គិសនី ​នៅ​ខណ្ឌ​ឫស្សីកែវ ​រាជធានី​ភ្នំពេញ

Content image - Phnom Penh Post
អគ្គិភ័យដែលកើតឡើងនៅសង្កាត់ច្រាំងចំរេះ ១ ខណ្ឌឫស្សីកែវ កាលពីយប់ថ្ងៃទី ៦ ឧសភា។ រូប​ថត នាយកដ្ឋាននគរបាលបង្ការ-ពន្លត់អគ្គិភ័យ

ផ្ទះ​ចំនួន​ ១៨ ខ្នង ​រង​ការខូចខាត​ ក្នុង​ហេតុការណ៍​អគ្គិភ័យ​កើតឡើង​ ដោយសារ​ឆ្លងចរន្ត​អគ្គិសនី ​នៅ​ខណ្ឌ​ឫស្សីកែវ ​រាជធានី​ភ្នំពេញ

ភ្នំពេញៈ អគ្គិភ័យ​បានកើត​ឡើង​នៅ​ចំណុច​ភូមិ ២ ​ក្រុម ៤ ​សង្កាត់​ច្រាំង​ចំរេះ ១ ​ខណ្ឌ​ឫស្សីកែវ ​រាជធានី​ភ្នំពេញ ​នៅ​វេលាម៉ោង ​២៣ យប់ ​ថ្ងៃទី ៦ ​ខែឧសភា​ ​បណ្តាលឱ្យ​ខូចខាត​ផ្ទះ​ថ្ម​ក្រោម​ ឈើ​លើ​ចំនួន ​១៨ ខ្នង​ ប៉ុន្តែ​មិនមាន​មនុស្ស​រងរបួស​ឬ​ស្លាប់​នោះ​ទេ។​ មន្ត្រី​ការិយាល័យ​បង្ការ​-ពន្លត់​អគ្គិភ័យ​ រាជ​ធានី​ភ្នំពេញ​អះអាង​ថា​មូលហេតុ​នៃ​ការឆេះ​នេះ​ដោយ​សារ​ឆ្លង​ចរន្ត​អគ្គិសនី។

នាយក​ដ្ឋាន​នគរបាល​បង្ការ​-ពន្លត់​អគ្គិភ័យ​និង​សង្គ្រោះ ​នៃ​អគ្គស្នងការដ្ឋាន​នគរបាល​ជាតិ ​បានសរសេរ​នៅលើ​ទំព័រ​ហ្វេសប៊ុក​ នៅ​ព្រឹក​ថ្ងៃទី ៧​ ខែឧសភា ​ថា ​ក្នុង​ការពន្លត់​អគ្គិភ័យ​នេះ ​កងកម្លាំង​អន្តរាគមន៍​បង្ការ​ពន្លត់​អគ្គិភ័យ ​និង​សង្គ្រោះ ​បានប្រើប្រាស់​រថយន្ត​ការិយា​ល័យ​អគ្គិភ័យ​ចំនួន​ ២១ គ្រឿង ​ប្រើប្រាស់​ទឹក​អស់​ចំនួន​ ៤២ រថយន្ត ​ស្មើនឹង​ ១៦៨ ម៉ែត្រ​គុប។

ប្រភព​ដដែល​ឱ្យដឹងថា ​ករណី​អគ្គិភ័យ​នេះ​បានពន្លត់​ចប់​នៅ​វេលា​ម៉ោង​១រំលង​អាធ្រាត្រ ​ថ្ងៃ​ទី ៧ ​ខែឆ្នាំ​ដដែល។ ក្នុង​នោះ​ រថយន្ត​ជំនួយ​អន្តរា​គមន៍​ក្នុង​ការពន្លត់ ​រួមមាន ​រថយន្ត​សាលា​ខណ្ឌ​ឫស្សីកែវ ​ចំនួន​ ១ គ្រឿង ​ប្រើប្រាស់​ទឹក​អស់​ចំនួន​ ២ រថយន្ត ​ស្មើនឹង ​៨ ម៉ែត្រ​គុប។ រថយន្ត​ក្រុម​ហ៊ុន ​OCIC ​ទីក្រុង​ជ្រោយ​ចង្វារ ​ចំនួន​ ៧ គ្រឿង ​ប្រើប្រាស់​អស់​ចំនួន ​៧ រថយន្ត ​ស្មើនឹង ​២៨ ម៉ែត្រ​គុប។ រថយន្ត​ក្រុមហ៊ុន​ស្រាបៀរ​កម្ពុជា​ចំនួន​ ១ គ្រឿង ​ប្រើប្រាស់​ទឹក​ចំនួន ​១ រថយន្ត ​ស្មើនឹង​៤ម៉ែត្រ​គុប។

លោក ​ពុង ថូ ​មន្ត្រី​ការិយាល័យ​នគរបាល​បង្ការ​-ពន្លត់​អគ្គិភ័យ ​និង​សង្គ្រោះ ​នៃ​ស្នងការដ្ឋាន​នគរបាល​រាជធានី​ភ្នំពេញ ​ប្រាប់​ភ្នំពេញ​ប៉ុស្តិ៍​នៅ​ថ្ងៃទី ៨ ​ឧសភា​ថា ​ហេតុការណ៍​អគ្គិភ័យ​នេះ ​មិនមាន​នរណា​ម្នាក់​រងរបួស​ឬ​ស្លាប់​នោះ​ទេ។ ​រីឯ​ការខូចខាត​មាន​ផ្ទះ​ថ្ម​ក្រោម ​ឈើ​លើ​ចំនួន ​១៨ ខ្នង។ មូលហេតុ​នៃ​ការឆេះ​នេះ ​គឺ​បណ្តាល​មកពី​ឆ្លង​ចរន្ត​អគ្គិសនី។ លោក​បា្រប់ថា ​ការឆាបឆេះ​ដំបូង​កើតឡើង​ចេញពី​ផ្ទះ​ឈ្មោះ​ សា អែល ​ដែល​មាន​ជីដូន​និង​ចៅ​ស្នាក់​នៅ​ជាមួយ​គ្នា។ ប៉ុន្តែ​ជីដូន​មិននៅ​ផ្ទះ ​ដោយ​ជាប់​រវល់​ចេញ​ទៅ​ខេត្ត​កំពង់ធំ​ ដើម្បី​យក​ត្រី​ទៅ​លក់​ ហើយ​បានទុក​ចៅ​ម្នាក់​នៅផ្ទះ ​ដែល​ចៅ​នោះ​ទៀត​សោត​មាន​សតិ​មិន​គ្រប់។

លោក​ថ្លែងថា​៖ «ក្មេង​ដែល​ជាចៅ​គាត់​នៅ​នឹង​ផ្ទះ​ហ្នឹង​ ប៉ុន្តែ​ជីដូន​គាត់​ចាក់សោ​ចំណុច​ណា​យើង​វា​មិនដឹង​ទេ ​ហើយ​គាត់​ទុកឱ្យ​គ្នា​ដេក​នៅ​ចំណុច​ណា​នោះ​ក៏យើង​មិនអាច​សន្និដ្ឋាន​បាន​ដែរ។ ព្រោះ​ក្រុម​គ្រួសារ​គេ ​គ្រាន់តែ​មាន​គេ​ប្រាប់​ថា​ ជីដូន​ហ្នឹង​ គឺ​គាត់​អត់​នៅ​ផ្ទះ​ទេ​ គាត់​ទៅ​រកស៊ី​ប្រហែល​ម្សិលមិញ​[ថ្ងៃ​ទី ៧ ​ឧសភា]​ ម៉ោង ១២ ម៉ោង ​១ ​បានគាត់​មក​ដល់​វិញ»។

លោក​ ពុង ថូ ​បន្តថា ​នៅ​យប់​ថ្ងៃ​កើតហេតុ ​ប្រជាពលរដ្ឋ​ដែល​នៅជិត​ខាង​បានឮ​សំឡេង​ផ្ទុះ ​ដូច​ការឆ្លង​ចរន្ត​អគ្គិសនី​ ផ្ទុះ​ដាច់​ខ្សែភ្លើង ​ក្រោយ​មក​មាន​អណ្តាត​ភ្លើង​ឆាបឆេះ​ឡើង​ទើប​ប្រជាពលរដ្ឋ​នៅ​ជិតខាង​ស្រែក​ហៅ​គ្នា​ដើម្បី​ជួយ​ពន្លត់​ និង​បាន​រាយការណ៍​មក ​កម្លាំង​សមត្ថកិច្ច​បង្ការ​-ពន្លត់​អគ្គិភ័យ។ ភ្លាមៗ​ក្រោយ​ពេល​ទទួល​ព័ត៌មាន​ពី​ប្រជាពលរដ្ឋ ​កម្លាំង​សមត្ថកិច្ច​ដុតដៃ​ដុតជើង ​ចេញ​រថយន្ត​ពន្លត់​អគ្គិភ័យ​ទៅ​ជួយ​ពន្លត់។

លោក​ថ្លែងថា​៖ «មាន​អ្នក​ជិតខាង​ហ្នឹង​គេ​ឮ​សំឡេង​ផ្ទុះ ​ដូច​ទុស្សេ​អ៊ីចឹង។ គ្នា​ក៏ស្រែក​ហៅ ​ប៉ុន្តែ​ម៉ោង​ហ្នឹង​វា​ចូល​លក្ខណៈ​ថា ​ទាំង​គេ​ទាំង​យើង​ បានលង់​លក់​ទៅ​ហើយ ​ព្រោះ​កណ្តាល​យប់​ហើយ ​ទម្រាំ​ឆ្លើយ​ឆ្លង​បាន ​វា​ទំហំ​នៃ​ការឆេះ​ហ្នឹង ​បាន​រាលដាល​បាត់​ទៅ​ហើយ»។

មន្ត្រី​នគរបាល​រូបនេះ ​បានឱ្យ​ដឹងថា ​ការខូច​ខាត​សម្ភារ​ប្រើប្រាស់​ក្នុង​ផ្ទះ​ប្រចាំ​ថ្ងៃ​ក្នុង​ចំនួន​ខ្នង​ផ្ទះ​ដែល​បាន​ឆេះ​ចំនួន ​១៨ ខ្នង​នោះ​ សមត្ថកិច្ច​មិន​អាច​ធ្វើការ​សរុប​បាន​ទេ៕

អត្ថបទគួរចាប់អារម្មណ៍