សៀមរាបៈ ក្មេងសង្ស័យម្នាក់ ក្នុងចំណោម ៦ នាក់ នឹងត្រូវកងរាជអាវុធហត្ថខេត្តសៀមរាប បញ្ជូនទៅសាលាដំបូងខេត្ត នៅថ្ងៃទី ៩ ឧសភា បន្ទាប់ពីចាប់ខ្លួនបាន ២ ថ្ងៃ ពាក់ព័ន្ធករីណីវាយសម្លាប់ក្មេងប្រុសសិស្សសាលាអាយុ ១៦ ឆ្នាំម្នាក់ ប្រព្រឹត្តនៅភូមិទ្រាក សង្កាត់-ក្រុងសៀមរាប។
លោក សៀក សោភា នាយការិយាល័យព្រហ្មទណ្ឌ កងរាជអាវុធហត្ថ ខេត្តសៀមរាប ឱ្យដឹងនៅថ្ងៃទី ៨ ឧសភា ថា ជនសង្ស័យឈ្មោះ សឿន ជីវ័ន អាយុ ១៦ ឆ្នាំ ជាកម្មករសំណង់ រស់នៅភូមិភ្នំក្រោម សង្កាត់-ក្រុងសៀមរាប។
រីឯជនរងគ្រោះឈ្មោះ ធរ សុធារិទ្ធ អាយុ ១៦ ឆ្នាំ ជាសិស្សរៀននៅថ្នាក់ទី ១១ J នៃវិទ្យាល័យអង្គរ រស់នៅភូមិ-សង្កាត់ សាលាកំរើក ក្រុង សៀមរាប។
ជនសង្ស័យនឹងត្រូវសមត្ថកិច្ចអាវុធហត្ថខេត្ត សៀមរាប បញ្ជូនទៅសាលាដំបូងនៅថ្ងៃទី ៩ ឧសភា។
លោកថ្លែងថា៖ « នៅថ្ងៃនេះ (ថ្ងៃទី ៨ ឧសភា) សមត្ថកិច្ចជំនាញរបស់ខ្ញុំ កំពុងធ្វើសំណុំរឿងហើយបញ្ជូនជនសង្ស័យនៅថ្ងៃស្អែកនេះហើយ (ថ្ងៃទី ៩ ឧសភា)។ ប៉ុន្តែយើងកំពុងស្វែងរកចាប់បក្ខពួកគេ ៥ នាក់ទៀត»។
លោកបានប្រាប់ថា បើតាមពាក្យបណ្តឹងរបស់ឪពុកក្មេងរងគ្រោះ បានរៀបរាប់ថា កាលពីវេលាម៉ោង១រសៀលថ្ងៃទី ៦ ឧសភា ឆ្នាំ ២០២២ ក្មេងរងគ្រោះ បានជិះកង់ទៅរៀន នៅសាលាវិទ្យាល័យអង្គរសៀមរាប។
ប៉ុន្តែនៅពេលល្ងាចមិនឃើញក្មេងរងគ្រោះត្រឡប់មកផ្ទះវិញ ក្រុមគ្រួសារបានទូរស័ព្ទចូលតែគ្មានអ្នកទទួល។ លុះព្រឹកឡើងថ្ងៃទី ៦ ឧសភា អ្នកភូមិប្រទះឃើញដេកស្លាប់ ហើយបានរាយការណ៍ប្រាប់សមត្ថកិច្ច។
លោក សៀក សោភា បន្តទៀតថា ក្រោយទទួលបានសេចក្តីរាយការណ៍ពីប្រជាពលរដ្ឋ និងក្រោយពីសមត្ថកិច្ចរបស់អាវុធហត្ថ ចុះប្រមូលព័ត៌មាននៅកន្លែងកើតហេតុ និងពីការបំភ្លឺរបស់សាក្សីមក សមត្ថកិច្ចបានបើកការស្រាវជ្រាវហើយបានចុះទៅភូមិដែលជនសង្ស័យរស់នៅ តែជនសង្ស័យបានជិះម៉ូតូ ១ គ្រឿង ឌុបគ្នា ២ នាក់គេចខ្លួនហើយត្រូវបានកម្លាំងសមត្ថកិច្ចរបស់លោកដេញតាមចាប់បានម្នាក់ ចំណែកម្នាក់ទៀតរត់គេចខ្លួនបាត់។
លោកបញ្ជាក់ថា ជនសង្ស័យបានឆ្លើយប្រាប់សមត្ថកិច្ចថា នៅវេលាម៉ោងប្រហែលជា ៩ ទៅ ១០ យប់ថ្ងៃទី ៦ ឧសភា ដែលពួកគេមានគ្នា ៦ នាក់ ជិះម៉ូតូ២គ្រឿង បានឃើញក្មេងរងគ្រោះ ជិះកង់មកពីភ្នំក្រោមសំដៅមក ក្រុង សៀមរាប។
តែត្រូវពួកគេស្ទាក់វាយ នឹងឈើជ្រុងស្លាប់ និងយកបានទូរស័ព្ទដៃម៉ាកអូប៉ូ១គ្រឿង នាំគ្នាគេចខ្លួន តែស្អែកឡើងរូបគេត្រូវបានកម្លាំងសមត្ថកិច្ចអាវុធហត្ថចាប់ខ្លួនបាន នៅម្តុំវត្តអាត់ទ្វារ ក្នុងភូមិទ្រាក សង្កាត់-ក្រុង សៀមរាប។
បើតាមលោក សោភា ជនសង្ស័យម្នាក់ដែលសមត្ថកិច្ច ចាប់បាននោះ ហាក់ឆ្លើយពង្វាងអំពីសាវតា និងឈ្មោះបក្ខពួករបស់គេ ដែលកំពុងរត់គេចខ្លួន។
ប៉ុន្តែយ៉ាងណាក្តី កម្លាំងជំនាញព្រហ្មទណ្ឌ នៃកងរាជអាវុធហត្ថខេត្តសៀមរាប កំពុងបន្តធ្វើការស្រាវជ្រាវបន្តទៀត ដើម្បីស្វែងរកចាប់ខ្លួនក្រុមជនសង្ស័យនៅសេសសល់៕