.jpg)
លោក ហ៊ុន ណេង កាលនៅមានជីវិត និងព្រះរាជសារផ្ដល់គោរមងារ «សម្ដេច»។ រូបថត សហការី
ភ្នំពេញៈ ព្រះមហាក្សត្រនៃព្រះរាជាណាចក្រកម្ពុជាបានត្រាស់បង្គាប់ផ្តល់គោរមងារដល់លោក ហ៊ុន ណេង ដែលជាបងប្រុសបង្កើតរបស់លោកនាយករដ្ឋមន្ត្រី ហ៊ុន សែន ជា «សម្តេច ឧត្តមទេពញាណ ហ៊ុន ណេង» ដែលលោកបានទទួលមរណភាព ដោយជំងឺបេះដូងកាលពីរសៀលថ្ងៃទី ៥ ខែឧសភា ក្នុងជន្មាយុ ៧២ ឆ្នាំ ខណៈដែលបណ្ដាអង្គទូតនានាបានផ្ញើសាររំលែកទុក្ខជាបន្តបន្ទាប់ចំពោះមរណភាពនេះ។
នេះបើយោងតាមព្រះរាជក្រឹត្យចុះថ្ងៃទី ៧ ខែឧសភា ឆ្នាំ ២០២២ ដែលឡាយព្រះហស្តលេខាដោយព្រះករុណាព្រះបាទសម្តេចព្រះបរមនាថនរោត្តម សីហមុនី។
បន្ទាប់ពីព្រះមហាក្សត្របានផ្តល់នូវគោរមងារជូនលោក ហ៊ុន ណេង, លោកនាយករដ្ឋមន្ត្រី ហ៊ុន សែន បានសរសេរសារលើបណ្តាញសង្គមហ្វេសប៊ុករបស់លោកនៅយប់ថ្ងៃទី ៧ ខែឧសភា ថា៖ «បងប្រុសទោះបីបងបានចែកឋានទៅហើយក្តី តែកេរ្តិ៍ឈ្មោះរបស់បងបានស្ថិតនៅជាមួយ ជាតិ សាសនា និងព្រះមហាក្សត្រ ជានិច្ច។ មុននេះបន្តិចព្រះមហាក្សត្រជាទីគោរពសក្ដារៈរបស់យើងបានប្រោសប្រទាននូវគោរមងារសម្រាប់បងគឺជាសម្តេចឧត្តមទេពញាណ ហ៊ុន ណេង»។
លោក ហ៊ុន សែន បានសរសេររៀបរាប់ពីរឿងរ៉ាវដែលលោក និងបងប្រុសរបស់លោកបានឆ្លងកាត់ ដោយលោកបានលើកឡើងថា នៅក្បែរកន្លែងសពរបស់បងប្រុសលោកតម្កល់ជាកន្លែងដែលលោក និងបងប្រុសលោកបានចូលរួមធ្វើបាតុកម្មប្រឆាំងពួកធ្វើរដ្ឋប្រហារ និងទាមទារប្រគល់តំណែងថ្វាយអតីតព្រះមហាក្សត្រ (សម្តេចឪ) វិញកាលពីថ្ងៃ ២៣ ខែមីនា ឆ្នាំ ១៩៧០ ដែលពេលនោះលោក ហ៊ុន ណេង មានអាយុ ២០ ឆ្នាំ ឯ លោក ហ៊ុន សែន មានអាយុ ១៨ ឆ្នាំ។
លោកនាយករដ្ឋមន្ត្រី ហ៊ុន សែន បានបន្ថែមថា៖ «ត្រកូលហ៊ុនរបស់យើងគ្រប់ជំនាន់តាំងពីជីដូនជីតា ឪពុកម្តាយយើងរហូតដល់ខ្លួនយើងតែងមានការស្មោះត្រង់ចំពោះព្រះមហាក្សត្រ ចំពោះរាជបល្ល័ង្ក និងរបបរាជានិយម។ ប្អូនជឿជាក់ថា កូនចៅយើងទាំងអស់នឹងដើរតាមផ្លូវដែលយើងបានដើរកន្លងមកដោយធានាដល់កិច្ចការពាររបបរាជានិយមការពារព្រះមហាក្សត្រ និងព្រះរាជបល្ល័ង្កដោយការស្មោះត្រង់»។
លោកស្រី លាង វួចឆេង ភរិយារបស់លោក ហ៊ុន ណេង បានក្រាបបង្គំទូលថ្វាយថ្លែងអំណរព្រះរាជគុណ ព្រះមហាក្សត្រដែលព្រះអង្គសព្វព្រះរាជហឫទ័យ ប្រោសព្រះរាជទាន គោរមងារដល់ស្វាមីលោកស្រី ជា «សម្ដេចឧត្តមទេពញាណ ហ៊ុន ណេង»។
លោកស្រីបានលើកឡើងថា៖ «ព្រះរាជគោរមងារ «សម្តេច ឧត្តមទេពញាណ ហ៊ុន ណេង» ដែលព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត ទ្រង់សព្វព្រះរាជហឫទ័យប្រោសប្រទានជូននាឱកាសនេះ ពិតជាស័ក្តិសមនឹងគុណបំណាច់ដ៏ឧត្តុង្គឧត្តមរបស់ សម្តេច ឧត្តមទេពញាណ ដែលបានធ្វើពលិកម្មគ្រប់បែបយ៉ាង ដើម្បីបម្រើឧត្តមប្រយោជន៍ ជាតិ សាសនា ព្រះមហាក្សត្រក្នុងបំណងសុខសន្តិភាពទាំងផ្លូវកាយ ទាំងផ្លូវចិត្តជានិច្ចនិរន្តរ៍តរៀងទៅ»។
សពរបស់លោក ហ៊ុន ណេង ប្រធានគណៈកម្មការទី ៤ នៃរដ្ឋសភា ត្រូវបានតម្កល់ធ្វើបុណ្យនៅគេហដ្ឋានរបស់លោកក្នុងភូមិទី ៧ សង្កាត់កំពង់ចាម ក្រុងកំពង់ចាម ខេត្តកំពង់ចាម ទៅតាមប្រពៃណីព្រះពុទ្ធសាសនា។ នៅថ្ងៃទី ៩ ខែឧសភានេះ សពលោក ហ៊ុន ណេង នឹងត្រូវដង្ហែទៅបញ្ចុះនៅវត្តសុវណ្ណគិរីរតនៈ ភ្នំប្រុស ភូមិត្រពាំងចារ ឃុំក្រឡា ស្រុកកំពង់សៀម។
នៅព្រឹកថ្ងៃទី ៧ ខែឧសភា លោកនាយករដ្ឋមន្ត្រី ហ៊ុន សែន បានចុះពិនិត្យទីតាំងបញ្ចុះសពរបស់បងប្រុសរបស់លោកដោយផ្ទាល់ផងដែរ។
ជាមួយគ្នានេះដែរ រដ្ឋបាលខេត្តកំពង់ចាមនឹងផ្អាកការធ្វើចរាចរណ៍ជាបណ្តោះអាសន្ននៅកំណាត់ផ្លូវជាតិលេខ ៧ ចាប់ពីរង្វង់មូលគល់ស្ពានគីហ្សូណា ដល់រង្វង់មូលព្រីង ឃុំអូរស្វាយ ស្រុកកំពង់សៀម នៅថ្ងៃទី ៩ ខែឧសភានេះចាប់ពីម៉ោង ៦ ព្រឹក ដល់ម៉ោង ១០ ព្រឹកដើម្បីសម្រួលដល់ក្បួនដង្ហែសពរបស់លោក ហ៊ុន ណេង។
នេះបើយោងតាមសេចក្តីជូនដំណឹងរបស់រដ្ឋបាលខេត្តកំពង់ចាមនៅថ្ងៃទី ៦ ទៅដល់ប្រជាពលរដ្ឋសាធារណជន និងម្ចាស់យានយន្តគ្រប់ប្រភេទ និងក្រុមហ៊ុនដឹកជញ្ជូនពីការផ្អាកចរាចរណ៍នេះ។ ការដង្ហែសពលោក ហ៊ុន ណេង ទៅបញ្ចុះនៅវត្តសុវណ្ណគិរីរតនៈភ្នំប្រុស នឹងមានវត្តមានលោក ហ៊ុន សែន,លោកស្រី ប៊ុន រ៉ានី, សាច់ញាតិ, កូនចៅ ក្មួយៗ រួមនឹងឥស្សរជនជាថ្នាក់ដឹកនាំព្រឹទ្ធសភា រដ្ឋសភា រាជរដ្ឋាភិបាល មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋជាច្រើនរូប។
នាព្រឹកថ្ងៃទី ៨ ខែឧសភា លោក កឹម សុខា អតីតប្រធាននៃអតីតគណបក្សសង្គ្រោះជាតិបានដឹកនាំគណៈប្រតិភូចូលរួមគោរពវិញ្ញាណក្ខន្ធ លោក ហ៊ុន ណេង និងបានចូលជួបសម្តែងការរំលែកមរណទុក្ខផ្ទាល់ជាមួយនឹងលោកនាយករដ្ឋមន្ត្រី ហ៊ុនសែន ផងដែរ។
ជាមួយគ្នានេះដែរ នាយករដ្ឋមន្ត្រីម៉ាឡេស៊ី លោក អ៊ីស្មាអែល សាប្រ៊ីយ៉ាកុប ក៏បានផ្ញើសាររំលែកមរណទុក្ខដ៏ក្រៀមក្រំជូនចំពោះលោក ហ៊ុន សែន ចំពោះមរណភាពរបស់លោក ហ៊ុន ណេង ដោយលោកបានបង្ហាញពីការសោកសង្រេងជាពន់ពេកចំពោះការបាត់បង់មួយនេះ។
លោកបានសរសេរថា «ក្រុមគ្រួសាររបស់គាត់ និងប្រជាជននៃខេត្តកំពង់ចាមបានបាត់បង់ថ្នាក់ដឹកនាំដ៏ល្អមួយរូប។ ភាពសោកសៅនៃការបាត់បង់ភ្លាមៗនូវសមាជិកគ្រួសារដ៏ជិតស្និទ្ធគឺជាការមួយដែលពិបាកទទួលយកបានបំផុត»។
ចំណែកនាយករដ្ឋមន្ត្រីវៀតណាម លោក ផាម មិញជិញ នៅថ្ងៃទី ៨ ខែឧសភា ក៏បានផ្ញើលិខិតចូលរួមរំលែកទុក្ខចំពោះមរណភាពរបស់លោក ហ៊ុន ណេង ផងដែរ ដោយលោកបានលើកឡើងថា ជំនួសមុខរដ្ឋាភិបាលនៃសាធារណរដ្ឋសង្គមនិយមវៀតណាម និងរូបលោកផ្ទាល់លោកសូមចូលរួមរំលែកទុក្ខដ៏សែនក្រៀមក្រំបំផុតជាមួយលោក ហ៊ុន សែន និងក្រុមគ្រួសារទាំងអស់នៃសព។
លោក ផាម មិញជិញ ថា៖ «ខ្ញុំសង្ឃឹមថា សម្តេចតេជោ នាយករដ្ឋមន្ត្រី និងក្រុមគ្រួសារ អាចជម្នះការបាត់បង់ដ៏ធំធេងនេះ»។
នារសៀលថ្ងៃទី ៨ លោក ថងឡន ស៊ីសូលីត ឯកអគ្គរដ្ឋទូតឡាវប្រចាំកម្ពុជាក៏បានអញ្ជើញគោរពវិញ្ញាណក្ខន្ធសព លោក ហ៊ុន ណេង និងបាននាំយកសារលិខិតរំលែកទុក្ខរបស់នាយករដ្ឋមន្ត្រីឡាវ ជូនដល់តំណាងក្រុមគ្រួសារសពផងដែរ។
រីឯអង្គទូតនៃបណ្តាប្រទេសមួយចំនួនប្រចាំនៅកម្ពុជាក៏បានផ្ញើសាររំលែកទុក្ខជាបន្តបន្ទាប់ជូនលោកនាយករដ្ឋមន្ត្រី ហ៊ុន សែន ផងដែរ ក្នុងការបាត់បង់លោក ហ៊ុន ណេង ដែលជាបងប្រុសបង្កើតរបស់លោក។ ឯកអគ្គរាជទូត និងឯកអគ្គរដ្ឋទូតទាំងនោះរួមមាន៖ ប្រទេសជប៉ុន សហរដ្ឋអាមេរិក ចិន រុស្ស៊ី និងវៀតណាម ដោយបានសម្តែងនូវសេចក្តីក្រៀមក្រំជាទីបំផុតជាមួយនឹងលោក ហ៊ុន សែន និងក្រុមគ្រួសារសព៕
