.jpg)
លោក សាយ ឈុំ និងលោក អ៊ីវ៉ាន វឺលីមៀរ ស្តាសឺវ៉ិច នៅក្នុងជំនួបកាលពីថ្ងៃទី ៥ ខែឧសភា។ រូបថត ព្រឹទ្ធសភា
ភ្នំពេញៈ ឯកអគ្គរាជទូតថ្មីក្រូអាស៊ី និងព្រឹទ្ធសភាកម្ពុជា ប្តេជ្ញាចិត្តរួមគ្នាដើម្បីពង្រឹង និងពង្រីកទំនាក់ទំនងរវាងប្រទេសទាំង ២ ឱ្យកាន់តែជិតស្និទ្ធបន្ថែមទៀត ដើម្បីនាំមកនូវផលប្រយោជន៍ទៅវិញទៅមកជូនប្រជាជន និងប្រទេសទាំង ២។
កាលពីថ្ងៃទី ៥ ខែឧសភា លោក អ៊ីវ៉ាន វឺលីមៀរ ស្តាសឺវ៉ិច (Ivan Velimir Starčević) ឯកអគ្គរាជទូតតែងតាំងថ្មីនៃប្រទេសក្រូអាស៊ីប្រចាំកម្ពុជា បានជួបពិភាក្សាការងារជាមួយលោក សាយ ឈុំ ប្រធានព្រឹទ្ធសភាកម្ពុជានៅវិមានព្រឹទ្ធសភា។
ព្រឹទ្ធសភាកម្ពុជាបញ្ជាក់ក្នុងសេចក្តីប្រកាសព័ត៌មាន នាថ្ងៃទី ៦ ខែឧសភាថា នៅក្នុងជំនួបនោះលោក Starčević បានរំឭកពីជំនួបជាប្រវត្តិសាស្ត្រារវាងអតីតថ្នាក់ដឹកនាំក្រូអាស៊ី និងព្រះករុណា ព្រះបាទសម្តេចព្រះ នរោត្តម សីហនុ ព្រះបរមរតនកោដ្ឋ ដែលបានរួមចំណែកដ៏សំខាន់ ដើម្បីបង្កើត និងរឹតចំណងមិត្តភាព និងកិច្ចសហប្រតិបត្តិការរវាងប្រទេសទាំង ២ តាំងពីទសវត្សរ៍ទី ៥០។
លោក Starčević ជឿជាក់ថា ទំនាក់ទំនងមិត្តភាព និងកិច្ចសហប្រតិបត្តិការរវាងប្រទេសទាំង ២ នឹងកាន់តែរីកចម្រើនថែមទៀតតាមរយៈបេសកកម្មការទូតរបស់លោកនៅកម្ពុជា។
សេចក្តីប្រកាសព័ត៌មានបានបញ្ជាក់ថា៖ «ឯកឧត្តម ឯកអគ្គរាជទូតត្រៀមខ្លួនជាស្រេចដើម្បីខិតខំប្រឹងប្រែងអស់ពីកម្លាំងកាយចិត្ត ក្នុងការពង្រឹងពង្រីកទំនាក់ទំនង និងកិច្ចសហប្រតិបត្តិការរវាងប្រទេសទាំង ២ បន្ថែមទៀត»។
លោក សាយ ឈុំ បានសម្តែងការជឿជាក់ថា ក្នុងអាណត្តិបេសកកម្មការទូតនៅកម្ពុជាលោក Starčević នឹងខិតខំលើកកម្ពស់ ទំនាក់ទំនង និងកិច្ចសហប្រតិបត្តិការរវាងប្រទេសទាំង ២ ឱ្យកាន់តែល្អថែមទៀត ដើម្បីប្រយោជន៍ប្រជាជនកម្ពុជា និងប្រជាជនក្រូអាស៊ី។
សេចក្តីប្រកាសព័ត៌មានបញ្ជាក់ថា៖ «ក្នុងនាមព្រឹទ្ធសភា សម្តេចប្រធានព្រឹទ្ធសភាបានត្រៀមខ្លួនជានិច្ច ដើម្បីធ្វើកិច្ចសហប្រតិបត្តិការដ៏ជិតស្និទ្ធជាមួយនឹងឯកឧត្តម ឯកអគ្គរាជទូត ដើម្បីរួមចំណែកពង្រឹងពង្រីកចំណងមិត្តភាព និងកិច្ចសហប្រតិបត្តិការនាំមកនូវផលប្រយោជន៍ទៅវិញទៅមកជូនប្រជាជន និងប្រទេសទាំង ២»។
កាលពីថ្ងៃទី ៤ ខែឧសភា លោក ចែម វីឌ្យ៉ា រដ្ឋលេខាធិការក្រសួងការបរទេសកម្ពុជា និងលោក Starčević បានចុះហត្ថលេខា លើអនុស្សរណៈនៃការយោគយល់គ្នាស្តីពីការបង្កើតកិច្ចពិគ្រោះយោបល់ទ្វេភាគី ដើម្បីពង្រឹងកិច្ចសហប្រតិបត្តិការជិតស្និទ្ធរវាងប្រទេសទាំង ២ បន្ថែមទៀត។
លោក លុយ ដាវីត រដ្ឋលេខាធិការ ក្រសួងការបរទេសកម្ពុជាសរសេរនៅលើទំព័រហ្វេសប៊ុកថា ក្នុងជំនួបនាថ្ងៃទី ៤ ខែឧសភា លោក និងលោក Starčević បានជជែកគ្នាអំពីបញ្ហាដែលជាផលប្រយោជន៍រួម។ លោក Starčević ដែលបានចូលរួមក្នុងដំណើរការកិច្ចប្រជុំកំពូលអាស៊ី-អឺរ៉ុប (ASEM) កន្លងមកនេះ បានអបអរសាទរ «យ៉ាងកក់ក្តៅ» ចំពោះប្រទេសកម្ពុជាដែលទទួលបានជោគជ័យជាប្រធាន ASEM លើកទី ១៣ កាលពីឆ្នាំ ២០២១។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជាថ្លែងថា កន្លងមកទំនាក់ទំនងការទូតរវាងកម្ពុជា និងក្រូអាស៊ី គឺមានលក្ខណៈធម្មតា ដូចជាមិនមានលក្ខណពិសេសអ្វីនោះទេ។ ទោះយ៉ាងណាវាកាន់តែប្រសើរដែលរដ្ឋាភិបាលកម្ពុជាធ្វើការពង្រីកទំនាក់ទំនងកាន់តែច្រើនជាមួយបណ្តាប្រទេសផ្សេងៗដើម្បីឱ្យកម្ពុជាមានពិពិធកម្មការទូតរបស់ខ្លួន៕
