.jpg)
ក្បួនដង្ហែសពលោក ហ៊ុន ណេង យកទៅបញ្ចុះនៅថ្ងៃទី ៩ ឧសភា។ រូប គណបក្សប្រជាជនកម្ពុជា
កំពង់ចាមៈ សពលោក ហ៊ុន ណេង ដែលជាបងប្រុសបង្កើតរបស់លោកនាយករដ្ឋមន្ត្រី ហ៊ុន សែន ត្រូវបានបញ្ចុះនាព្រឹកថ្ងៃទី ៩ ខែឧសភា នៅវត្តសុវណ្ណគិរីរតនៈភ្នំប្រុស ក្នុងស្រុកកំពង់សៀម ដោយមានការចូលរួមពីឥស្សរជនជាន់ខ្ពស់ជាតិ ថ្នាក់ដឹកនាំ សមាជិក-សមាជិការដ្ឋសភា ព្រឹទ្ធសភា រាជរដ្ឋាភិបាល មន្ត្រីរាជការ កងកម្លាំង អាជ្ញាធរខេត្ត ក្រសួង ស្ថាប័ន និងពលរដ្ឋជាច្រើនរយនាក់។
បន្ទាប់ពីបានតម្កល់ធ្វើបុណ្យទក្ខិណានុប្បទានតាមប្រពៃណីព្រះពុទ្ធសាសនាអស់រយៈពេល ៣ ថ្ងៃ រួចមក សពលោក ហ៊ុន ណេង ត្រូវបានក្រុមគ្រួសាររៀបចំពិធីដង្ហែចេញពីគេហដ្ឋាននៃសពក្នុងភូមិទី ៧ សង្កាត់កំពង់ចាម ក្រុងកំពង់ចាម ឆ្ពោះទៅបញ្ចុះនៅវត្តសុវណ្ណគិរីរតនៈ ភ្នំប្រុស។
មុន ១ ថ្ងៃនៃការបញ្ចុះសព លោក ហ៊ុន សែន បានលើកឡើងនៅលើបណ្តាញសង្គមហ្វេសប៊ុករបស់លោកនាយប់ថ្ងៃទី ៨ ខែឧសភាថា បងប្អូន [យើង] បែកគ្នាដោយមិនបានលាគ្នា និងនិយាយជាមួយគ្នាសូម្បី ១ ម៉ាត់ទោះបីជាលោកបានមកទាន់ដង្ហើមចុងក្រោយរបស់គាត់ ស្រែកហៅគាត់យកដៃទាញអង្រួនជើងរបស់គាត់ តែមិនមានលទ្ធផលក្រៅតែពីសម្រក់ទឹកភ្នែកទាំងអស់សង្ឃឹម។
លោកលើកឡើងថា៖ «នៅមានរឿងសោកសៅជាងនេះ សម្រាប់បងប្អូនប្រុសស្រីទាំង ៦ នាក់របស់យើងនោះ គឺអវត្តមានបងប្រុសទី ១ ក្នុងពិធីបញ្ចុះសពបងប្រុសទី ២។ បងប្រុសទី ១ មិនត្រឹមតែមិនបានចូលរួមក្នុងពិធីបញ្ចុះសពបងទី ២ ប៉ុណ្ណោះទេ តែមកដល់ពេលនេះ គាត់មិនទាន់ដឹងថា ប្អូនប្រុសរបស់គាត់បាត់បង់ជីវិតទៀតផង»។
លោកនាយករដ្ឋមន្ត្រីបន្តថា៖ «ខ្ញុំបានហាមកូនៗរបស់គាត់មិនឱ្យនិយាយប្រាប់គាត់ពីមរណភាពប្អូនរបស់គាត់ដោយបងទី ១ ទើបចេញពីបន្ទប់វះកាត់នៅក្រុងបាងកកប្រទេសថៃ សុខភាពគាត់នៅខ្សោយ។ ខ្ញុំមិនដឹងថា នឹងមានអ្វីកើតឡើង ក្រោយពេលគាត់ទទួលដំណឹងថា ប្អូនរបស់គាត់បាត់បង់ជីវិត ដោយគ្មានអ្នកណាផ្តល់ដំណឹងឱ្យគាត់? នេះហើយជារឿងសោកសៅនាប៉ុន្មានថ្ងៃខាងមុខ»។
លោកស្រី ហ៊ុន ស៊ីណាត ដែលជាប្អូនស្រីរបស់លោក ហ៊ុន ណេង ក៏បានសរសេរលើបណ្តាញសង្គមហ្វេសប៊ុករបស់លោកស្រីដែរថា ប្អូនប្រុសប្អូនស្រីក្មួយចៅៗក្រាបសំពះសូមបួងសួងសូមដួងវិញ្ញាណក្ខន្ធបងប្រុសអ៊ុំប្រុស លោកតា បានទៅកាន់សុគតិភពកុំបីឃ្លៀងឃ្លាតឡើយ។ បងប្រុសអ៊ុំប្រុស លោកតា លាប្អូនក្មួយចៅៗ រហូតហើយ។
លោកស្រីថា៖ «ថ្ងៃនេះជូនដំណើរបងប្រុសជាលើកចុងក្រោយ សូមវិញ្ញាណក្ខន្ធបងបានទៅកាន់សុគតិភពកុំបីឃ្លៀងឃ្លាតឡើយ»។
ចំណែក លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា (ស.ស.យ.ក) និងជាក្មួយបង្កើតរបស់លោក ហ៊ុន ណេង បានលើកឡើងនៅថ្ងៃបញ្ចុះសពអ៊ំប្រុសរបស់លោកដោយភ្ជាប់នូវរូបភាពខ្លះៗថា ៖ «ដោយក្តីអាឡោះអាល័យជាទីបំផុត...ក្មួយសូមឧទ្ទិសបួងសួង សូមឱ្យដួងវិញ្ញាណក្ខន្ធសម្តេចអ៊ំ ហ៊ុន ណេង ឆាប់បានយោនយកកំណើតក្នុងសុគតិភពកុំបីឃ្លៀងឃ្លាតឡើយ»។
លោក ហ៊ុន ណេង សមាជិកគណៈកម្មាធិការអចិន្រៃ្តយ៍រដ្ឋសភា ប្រធានគណៈកម្មការមហាផ្ទៃ ការពារជាតិ និងមុខងារសាធារណៈនៃរដ្ឋសភា និងជាតំណាងរាស្ត្រមណ្ឌលកំពង់ចាមបានទទួលអនិច្ចកម្ម ដោយរោគាពាធ (ជំងឺបេះដូង) នៅម៉ោង ៦ និង ២៥ នាទីល្ងាច ថ្ងៃទី ៥ ខែឧសភា ឆ្នាំ ២០២២ ក្នុងជន្មាយុ ៧២ ឆ្នាំ។
យោងតាមព្រះរាជក្រឹត្យចុះថ្ងៃទី ៧ ឧសភាឆ្នាំ ២០២២ ដែលឡាយព្រះហស្តលេខាដោយព្រះករុណា ព្រះបាទសម្តេចព្រះបរមនាថនរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជាបានត្រាស់បង្គាប់ផ្តល់គោរមងារដល់លោក ហ៊ុន ណេង ជា «សម្តេច ឧត្តមទេពញាណ ហ៊ុន ណេង»៕
