The Phnom Penh Post Search

Search form




Logo of Phnom Penh Post newspaper Phnom Penh Post - លោកស្រី​ ភឿង ស​កុ​ណា ជំរុញ​ឱ្យ​អ្នក​ផលិត​វីដេអូ​ ត្រូវខិតខំ​បន្ថែមទៀត ក្នុងការ​បញ្ចូល​ខ្លឹមសារ​អប់រំ ដើម្បី​ទប់ស្កាត់​អំពើហិង្សា​លើ​ស្ត្រី​ និង​កុមារ

លោកស្រី​ ភឿង ស​កុ​ណា ជំរុញ​ឱ្យ​អ្នក​ផលិត​វីដេអូ​ ត្រូវខិតខំ​បន្ថែមទៀត ក្នុងការ​បញ្ចូល​ខ្លឹមសារ​អប់រំ ដើម្បី​ទប់ស្កាត់​អំពើហិង្សា​លើ​ស្ត្រី​ និង​កុមារ

Content image - Phnom Penh Post
លោកស្រី ភឿង សកុណា រដ្ឋមន្ត្រីក្រសួង​វប្បធម៌ និង​វិចិត្រសិល្បៈ។ រូបថត ក្រសួង​វប្បធម៌

លោកស្រី​ ភឿង ស​កុ​ណា ជំរុញ​ឱ្យ​អ្នក​ផលិត​វីដេអូ​ ត្រូវខិតខំ​បន្ថែមទៀត ក្នុងការ​បញ្ចូល​ខ្លឹមសារ​អប់រំ ដើម្បី​ទប់ស្កាត់​អំពើហិង្សា​លើ​ស្ត្រី​ និង​កុមារ

ភ្នំពេញៈ​ លោកស្រី​ ភឿង ស​កុ​ណា រដ្ឋមន្ត្រីក្រសួង​វប្បធម៌ និង​វិចិត្រសិល្បៈ ជំរុញ​ដល់​គ្រប់ភាគី​​ពាក់ព័ន្ធ ក្នុង​វិស័យ​សិល្បៈផ្នែក​ផលិតវី​ដេ​អូ​អប់រំខ្លីៗ ត្រូវខិតខំ​បន្ថែមទៀត ក្នុងការ​បញ្ចូល​ខ្លឹមសារ​អប់រំ ដើម្បី​ទប់ស្កាត់​អំពើហិង្សា ​លើ​ស្ត្រី​និង​កុមារ ខណៈ​ដែល​លោក​ស្រី​លើក​ឡើង​ថា ភាពយន្ត ឬ​វីដេអូ​មួយចំនួន បាន​បង្កើតឱ្យមាន​វប្ប​ធម៌​ហិង្សា ការសង​សឹក ការប្រើប្រាស់​គ្រឿង​ស្រវឹង គ្រឿងញៀន និង​អំពើ​ហិ​ង្សា​ក្នុង​ទម្រង់​ធ្ងន់ធ្ងរ ដែលជា​វប្បធម៌​មួយ​មិនល្អ នាំឱ្យក្មេងៗជំនាន់​ក្រោយ​អនុវត្ត​តាម​ ។

លោកស្រី​ ភឿង ស​កុ​ណា បាន​ជំរុញ​បែបនេះ ក្នុង​សិក្ខាសាលា​ស្តីពី​តួនាទី​ផលិតករ សិល្បករ រួមចំណែក​ក្នុងការ​លើកកម្ពស់​សីល​ធម៌​សង្គម និង​ទប់ស្កាត់ អំពើ​ហិង្សា​លើ​ស្ត្រី និង​កុមារ​តាមរយៈ វីដេអូ​ខ្លី នៅ​ថ្ងៃទី១០ ខែឧសភា ឆ្នាំ២០២២។

លោកស្រី​បានលើកឡើង​ថា បច្ចុប្បន្ន​ វិស័យ​ភាពយន្ត​នៅ​កម្ពុជា មានការ​រីកលូតលាស់​ច្រើន គួរ​ជាទី​មោទនៈ ក្នុងនោះ​ការផលិត​វីដេអូ​កម្សាន្ត នៅលើ​បណ្តាញ​សង្គម​នានា ជា​លក្ខណៈ​បុគ្គល ឬ​ក្រុម​ក៏មាន​ច្រើន​គួរឱ្យកត់សម្គាល់ដែរ​។

ប៉ុន្តែ ការខិតខំ​ប្រឹងប្រែងរ​បស់​ផលិតករ អ្នកនិពន្ធ ម្ចាស់​ផលិតកម្ម និង​អ្នក​ផលិត​មាតិកា​កម្សាន្ត លើ​បណ្តាញ​សង្គម​ជាច្រើន ដែល​បាន​ផលិត​ជា​ភាពយន្ត​ ឬ​វីដេអូ​វែង​ឬ​ខ្លី ដែលមាន​ការបញ្ចូល​ខ្លឹមសារ​អប់រំ ស្តីពី​តម្លៃ​ស្ត្រី និង​ការទប់ស្កាត់​អំពើ​ហិង្សា​លើ​កុមារ​ជាដើម គឺ​នៅមាន​ចំនួន​តិចតួច​នៅឡើយ។

លោកស្រី​ថ្លែងថា៖«ភាពយន្ត ឬ​វីដេអូ​មួយចំនួន បាន​បង្កើតឱ្យមាន​វប្ប​ធម៌​ហិង្សា ការសង​សឹក ការប្រើប្រាស់​គ្រឿង​ស្រវឹង គ្រឿងញៀន និង​អំពើ​ហិ​ង្សា​ក្នុង​ទម្រង់​ធ្ងន់ធ្ងរ ដែលជា​វប្បធម៌​មួយ​មិនល្អ នាំឱ្យក្មេងៗជំនាន់​ក្រោយ បែរជា​យកមក​ចម្លង និង​អនុវត្តតាម» ។

ដូច្នេះ​ក្នុងនាម​ជា​ថ្នាក់ដឹកនាំ​ក្រសួង លោកស្រី​រដ្ឋមន្ត្រី​ បានស្នើ​សុំ​ដល់​គ្រប់ភាគី​ដែល​ពាក់ព័ន្ធ ត្រូវខិតខំ​បន្ថែមទៀត​ ក្នុងការ​បញ្ចូល​ខ្លឹមសារ​អប់រំ នៅក្នុង​បណ្តា​ភាពយន្ត ចម្រៀង និង​ជាពិសេស បុគ្គល​ឬ​ក្រុម​ដែល​ផលិត​មាតិកា​កម្សាន្ត​លើ​បណ្តាញ​សង្គម។

លោកស្រី ម៉ិ​ញ កុស​នី រដ្ឋលេខាធិការ និង​ជា​ប្រធាន​ក្រុមការងារ​យេនឌ័រ ក្រសួង​វប្បធម៌ និង​វិចិត្រសិល្បៈ បានធ្វើការ​វាយតម្លៃ​ខ្ពស់​ចំពោះ​លទ្ធផល​ ដែល​ក្រុមការងារ​ទទួលបាន នាពេល​កន្លងមក និង​បាន​លើកទឹកចិត្ត ក្រុមការងារ ក្នុងការ​រៀបចំ​ផែន​ការ​សកម្មភាព​យេនឌ័រ ក្នុង​វិស័យ​វប្បធម៌ និង​សិល្បៈ ដើម្បី​រួមចំណែក​ជាមួយ​ដៃគូ​ពាក់ព័ន្ធ​ទាំងអស់ ធ្វើយ៉ាងណា​សម្រេច​ឱ្យបាន​នូវ​គោលដៅ​អភិវឌ្ឍន៍​ប្រកបដោយ​ចីរភាព។

លោក ផាន់ រុង ជា​អ្នក​សម្តែង​មួយរូប តែង​បង្ហោះ​វីដេអូ​ខ្លី​តាមរយៈ​បណ្តាញ​សង្គម​ហ្វេ​ស​ប៊ុ​ក ថ្លែង​នៅ​ថ្ងៃទី ១០ ខែឧសភា​ថា ក្រុម​របស់លោក ធ្លាប់បាន​ធ្វើការ​សម្តែង និង​ផលិត​វីដេអូរ​ខ្លី​អប់រំ អំពី​ការលើកកម្ពស់​សិទ្ធិ​ស្ត្រី និង​កុមារ និង​ការ​សម្តែង​ជា​សកម្មភាព​ដែល​បង្ហាញ​ពី​ការទប់ស្កាត់​ការប្រើ​អំពើហិង្សា​លើ​ស្ត្រី​និង​កុមារ ជា​បន្តបន្ទាប់​​ផងដែរ។

តាមរយៈ​ការជំរុញ​បន្ថែម ពី​ក្រសួង​វប្បធម៌ និង​វិចិត្រសិល្បៈ លោក​ផាន់ រុង ប្តេជ្ញា​ថា នឹង​បង្កើត​វីដេអូរ ដោយ​ប​ញ្ចូ​ល​ខ្លឹមសារ ទប់ស្កាត់​អំពើហិង្សា​លើ​ស្ត្រី​និង​កុមារ​ឱ្យបាន​ច្រើន​ជា​បន្តបន្ទាប់​តាម​ដែល​អាចធ្វើ​ទៅបាន។

លោក ស៊ឹង សែន​ករុណា អ្នកនាំពាក្យ​សមាគម​អាដហុក ថ្លែង​នៅ​ថ្ងៃទី ១០ ខែ​ឧសភា​ថា ក្នុងសម័យ​បច្ចេកវិទ្យា​ថ្មី​នេះ ជា​ឱកាស​មួយ​សម្រាប់​អ្នកធ្វើ​ការអប់រំ​ផ្សព្វផ្សាយ អាចធ្វើ​ការអប់រំ​អំពី​សិទ្ធិ សេរីភាព ឬ​វប្បធម៌ ប្រពៃណីជាតិ​នៅតាម​បណ្តាញ​សង្គម ប៉ុន្តែ​អ្វីដែល​ជាការ​កត់សម្គាល់​ឃើញថា មានការ​ផុស វីដេអូរ​ជាច្រើន ដែល​បាន​រំលោភបំពាន​ទៅលើ​សិទ្ធិ​របស់​កុមារ និង​រំលោភ​ទៅដល់​វប្បធម៌​ប្រពៃណី​របស់ ប្រទេសជាតិ។

លោក​ថ្លែងថា ៖«ចំណុច​ទាំងអស់នេះ គួរតែមាន​កា​រ​ត្រួតពិនិត្យ​ឱ្យបាន​ច្បាស់លាស់ និង​មានការ​ហាមឃាត់​កុំឱ្យ​រូបភាព​ខ្លះ​ចេញទៅ​វា​ធ្វើឱ្យប៉ះពាល់​ដល់ សិទ្ធិ​កុមារ សិទ្ធិ​ស្ត្រី ក៏ដូចជា​វប្បធម៌​ប្រពៃណី ដែល​យើង​ឃើញថា រូបភាព​ខ្លះ វា​មិន​សមរម្យ។ ខ្ញុំ​គិតថា គួរតែមាន​ការតាមដាន​បណ្តាញ​សង្គម លើ​វីដេអូរ​មួយចំនួន ដែល​មិន​សម​រម្យ​ នឹងមាន​ការ​ផុស» ។

លោក ឃុន ចាន់​ឌី អ្នកដឹកនាំ​សម្តែង​ម្នាក់ ប្រាប់​ភ្នំពេញ​ប៉ុស្តិ៍ នៅ​ថ្ងៃទី ១០ ខែ​ឧស​ថា លោក​គាំទ្រ​ចំពោះ​ការផលិត​រឿង​ដោយ​បញ្ចូល​ខ្លឹមសារ​អប់រំ ដែលមាន​ដូចជា ការទប់ស្កាត់​អំពើហិង្សា​លើ​ស្ត្រី និង​កុមារ។

អ្នក​ផលិត​ចាំបាច់​ត្រូវមាន​ចំណេះដឹង​ខាង​ផ្នែក​ផលិត​ ទើប​មិនសូវមាន​ការខ្វះចន្លោះ ហើយ​មួយវិញទៀត ការផលិត​កុំ​គិតតែ​រឿង​ឱ្យគេ​សប្បាយ គឺ​ត្រូវ​គិតពី​គុណភាព​សាច់រឿង​ផងដែរ។

លោក​បញ្ជាក់ថា បើ​ចង់បាន​គុណភាព​ល្អ អ្នកជំនាញ​ក្រសួង​វប្បធម៌ គួរតែមាន​ការតាមដាន​ពិនិត្យ​ឱ្យបាន​ល្អិតល្អន់ ទៅលើ​អ្នក​ផលិត។

លោក​ថ្លែងថា៖ «ទី១គុណភាព នៃ​ការផលិត​រឿង វា​អាស្រ័យទៅលើ​គុណភាព​នៃ​អ្នក​ផលិត​ដែរ បើសិនជា​ក្នុងករណី​ដែល​គាត់​គ្មាន​ធនធាន​ទេ ទោះបី​បើក​សិក្ខាសាលា ដប់​ម្ភៃ​ដង ក៏​មិនបាន​ដូច​ចិត្ត​ដែល​យើង​ចង់​​បាន​ដែរ» ។

លោក ឡុង ប៉ុណ្ណា​ស៊ី​រី​វត្ថ អ្នកនាំពាក្យ​ក្រសួង​វប្បធម៌ និង​វិចិត្រសិល្បៈ ថ្លែង​នៅ​ថ្ងៃទី ១០ ខែឧសភា​ថា ចំពោះ​គ្រប់​វីដេអូ​អប់រំ​ក្រសួង​វប្បធម៌​បាន​តាមដាន​ទាំងអស់ ហើយ​ក្រសួង​ក៏មាន​ក្រុមប្រឹក្សា​ពិន័យ​និង​លើកសរសើរ​ផងដែរ នៅពេល​ឃើញ​ស្នាដៃ​ណា​ល្អ​ក៏​សរសើរ​តាម​ការគួរ ចំណែក​ស្នាដៃ​ណា​មិន​សមរម្យ គឺមាន​ការពិន័យ។

លោក​ថ្លែងថា៖«យើង​តាមមើល​គ្រប់​រឿង​ទាំងអស់ បើ​អត់​តាម​យើង​ម៉េច​ដឹង ហើយ​យើង​ម៉េច​មានប្រតិកម្ម»៕

វីដេអូ៖

អត្ថបទគួរចាប់អារម្មណ៍