.jpg)
លោក ហ៊ុន ម៉ានី (ស្តាំ) ពេលទៅបរិច្ចាគឈាម។ រូបថត សហការី
ភ្នំពេញៈ សហភាពសហព័ន្ធយុវជនកម្ពុជា (សសយក) វិស័យផែនការបានអំពាវនាវដល់ថ្នាក់ដឹកនាំ មន្ត្រីរាជការ និងសប្បុរសជនទាំងអស់ចូលរួមបរិច្ចាគឈាម នាថ្ងៃទី ១៣ ខែឧសភា ដោយមានកិច្ចសហការជាមួយសហភាពសហព័ន្ធយុវជនកម្ពុជា រាជធានីភ្នំពេញ និងមជ្ឈមណ្ឌលជាតិផ្តល់ឈាមផងដែរ។
សេចក្តីអំពាវនាវកាលពីថ្ងៃទី ៩ ខែឧសភា បានឱ្យដឹងថា សហភាពសហព័ន្ធយុវជនកម្ពុជា វិស័យផែនការ (ស.ស.យ.ក. វិស័យផែនការ) សហការជាមួយ ស.ស.យ.ក. រាជធានីភ្នំពេញ និងមជ្ឈមណ្ឌលជាតិផ្តល់ឈាមបានរៀបចំកម្មវិធីផ្តល់ឈាម ក្រោមប្រធានបទ «ផ្តល់ឈាមសង្គ្រោះជីវិតខ្ញុំ» ដែលនឹងធ្វើឡើងចាប់ពីព្រឹកថ្ងៃទី ១៣ ខែឧសភា ខាងមុខនេះ នាទីស្តីការក្រសួងផែនការ។
លោកស្រី មាសលីន មុនីរ័ត្ន ក្រុមការងារ ស.ស.យ.ក. វិស័យផែនការ ដែលមានឈ្មោះក្នុងសេចក្តីអំពាវនាវមិនអាចទាក់ទង ដើម្បីសុំអត្ថាធិប្បាយបានទេ នៅថ្ងៃទី ១០ ឧសភា ប៉ុន្តែលោកស្រី ដា ដែលជាក្រុមការងារ ស.ស.យ.ក. វិស័យផែនការនៃក្រសួងផែនការដែរនោះបានសរសេរនៅលើបណ្តាញសង្គមហ្វេសប៊ុករបស់លោកដោយធ្វើការអំពាវនាវទៅដល់ថ្នាក់ដឹកនាំ មន្ត្រីរាជការ សមាជិក សមាជិកានៃក្រុមការងារ និងសប្បុរសជនទាំងអស់ចូលរួមបរិច្ចាគឈាម។
លោកបានសរសេរថា៖ «សូមមេត្តាចូលរួមបរិច្ចាគឈាមដោយទឹកចិត្តចូលរួមធ្វើអំពើល្អ និងចែករំលែកដល់សង្គមជាតិ វាពិតជាអាចជួយជីវិតមនុស្សនៅជុំវិញខ្លួនយើងបាន ពេលដែលពួកគេត្រូវការ ឬមានបញ្ហាបានគ្រប់ពេល»។
បើយោងតាមរបាយការណ៍របស់មជ្ឈមណ្ឌលជាតិផ្ដល់ឈាមនាបច្ចុប្បន្ន កម្ពុជាមានតម្រូវការឈាមនៅទូទាំងព្រះរាជាណាចក្រកម្ពុជា សម្រាប់ជួយសង្គ្រោះជនរងគ្រោះមានការកើនឡើងពី ២៥០ ទៅ ៣០០ ប្លោក ក្នុង ១ ថ្ងៃ ខណៈដែលការបរិច្ចាគឈាមដោយស្ម័គ្រចិត្តមានត្រឹម ១០ ភាគរយតែប៉ុណ្ណោះ។
លោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្តល់ឈាមធ្លាប់បានប្រាប់ភ្នំពេញ-ប៉ុស្តិ៍ថា ឈាមមិនអាចផលិតនៅតាមរោងចក្រ សហគ្រាសផលិតឱសថ ឬនៅតាមគ្រឹះស្ថានបច្ចេកទេសវិទ្យាសាស្ត្រណាមួយបានឡើយ។ លោកបានបញ្ជាក់ថា ការទទួលបានឈាមសុវត្ថិភាព សម្រាប់ជួយសង្គ្រោះជីវិតជនរងគ្រោះ គឺបានមកអាស្រ័យដោយមានការបរិច្ចាគពីមនុស្សដែលមានសុខភាពល្អតែប៉ុណ្ណោះ៕
