ភ្នំពេញៈ ក្រសួងទេសចរណ៍ និងគណៈកម្មាធិការជាតិវាយតម្លៃទីក្រុងស្អាត បានសម្រេចបន្តកិច្ចសហការជាមួយអង្គការ River Ocean Cleanup និង Everwave ដោយបានចុះអនុស្សរណៈនៃការយោគយល់គ្នា ដើម្បីពង្រីកវិសាលភាពនៃយុទ្ធនាការសម្អាតទន្លេទៅតាមបណ្តាខេត្តនៅកម្ពុជា បន្ទាប់ពីទទួលបានលទ្ធផលល្អក្នុងយុទ្ធនាការសម្អាតទន្លេទាំង ៣ ក្នុងរាជធានីភ្នំពេញ។
ក្នុងសិក្ខាសាលាផ្សព្វផ្សាយពីយុទ្ធនាការសម្អាតទន្លេ ដោយប្រើប្រាស់ទូកប្រមូលសំរាមបំពាក់បច្ចេកវិទ្យាថ្មីរបស់អាល្លឺម៉ង់ CollectiX នៅថ្ងៃទី ១០ ខែឧសភា លោក ជា បូរ៉ា រដ្ឋលេខាធិការក្រសួងទេសចរណ៍ និងជាអនុប្រធានគណៈកម្មាធិការជាតិវាយតម្លៃទីក្រុងស្អាតបានថ្លែងថា សព្វថ្ងៃនេះ យុទ្ធនាការសម្អាតទន្លេនេះកំពុងអនុវត្តយ៉ាងសកម្មជាមួយដៃគូអនុវត្តន៍ក្នុងការប្រមូលសំរាមចេញពីដងទន្លេនៅរាជធានីភ្នំពេញ។
លោក ជា បូរ៉ា មានប្រសាសន៍ថា៖ «ដោយមើលឃើញពីលទ្ធផល និងសក្តានុពលនៃយុទ្ធនាការសម្អាតទន្លេនេះ ក្រសួងទេសចរណ៍ និងគណៈកម្មាធិការជាតិវាយតម្លៃទីក្រុងស្អាតបានអនុញ្ញាតជាគោលការណ៍ក្នុងការបន្តកិច្ចសហការជាមួយអង្គការ River Ocean Cleanup និង Everwave ដើម្បីពង្រីកវិសាលភាពនៃយុទ្ធនាការសម្អាតទន្លេនេះ ទៅតាមបណ្តាខេត្តនៅទូទាំងប្រទេសកម្ពុជា ក្នុងការសម្អាតទន្លេ បឹងបួ ដែលកំពុងជួបប្រទះបញ្ហាបំពុលដោយសំរាម»។
យោងតាមក្រសួងទេសចរណ៍បានឱ្យដឹងថា កាលពីថ្ងៃទី ១៨ ខែមីនា ឆ្នាំ ២០២២ គណៈកម្មាធិការជាតិវាយតម្លៃទីក្រុងស្អាត ក្រសួងទេសចរណ៍បានសហការជាមួយសហគ្រាសសង្គម, អង្គការ Everwave, អង្គការ River Ocean Cleanup និងសាលារាជធានីភ្នំពេញចាប់ផ្តើមអនុវត្តយុទ្ធនាការសម្អាតទន្លេមេគង្គ ទន្លេសាប និងទន្លេបាសាក់ ក្នុងភូមិសាស្ត្ររាជធានីភ្នំពេញ។
លោក ជា បូរ៉ា បានបញ្ជាក់ថា៖ «ដូចនេះជាសក្ខីភាពនៃកិច្ចសហការ គណៈកម្មាធិការជាតិវាយតម្លៃទីក្រុងស្អាតរួមនឹងក្រសួងទេសចរណ៍ ចុះអនុស្សរណៈយោគយល់គ្នា (MoU) ស្តីពីបេសកកម្មសម្អាតទន្លេជាប្រវត្តិសាស្ត្រ សំដៅលើកកម្ពស់ទីក្រុងស្អាត និងវិស័យទេសចរណ៍ជាមួយនឹងអង្គការ River Ocean Cleanup និង Everwave នៅថ្ងៃនេះ»។
ជាមួយគ្នានេះ លោក ជា បូរ៉ា បានអំពាវនាវដល់ប្រជាពលរដ្ឋទាំងអស់ឱ្យចូលរួមសម្អាតទន្លេ ដងស្ទឹងបឹងបួ និងបញ្ឈប់ការចោលសំរាមឥតសណ្តាប់ធ្នាប់ ដើម្បីចូលរួមថែរក្សាបរិស្ថានធម្មជាតិទាំងអស់គ្នា ដើម្បីសម្រេចបាននូវភាពស្អាតដែលមានសារៈសំខាន់បំផុតក្នុងការថែរក្សា និងបង្កើនទេសភាពស្រស់ត្រកាល បរិស្ថានល្អ អនាម័យ និងជាតម្រូវការចាំបាច់សម្រាប់ការជំរុញការស្តារវិស័យទេសចរណ៍ក្នុង និងក្រោយវិបត្តិជំងឺកូវីដ ១៩។
ប្រធាននាយកដ្ឋានសេវាគាំពារទីក្រុងស្អាត និងជំរុញការប្រឡងប្រណាំងនៃក្រសួងទេសចរណ៍លោក ហ៊ួត រិទ្ធី បានថ្លែងដែរថា យុទ្ធនាការសម្អាតទន្លេនេះ គ្រោងនឹងពង្រីកវិសាលភាពទៅទូទាំងប្រទេសកម្ពុជា ដើម្បីដោះស្រាយបញ្ហាបំពុលដោយសំរាមនៅក្នុងទឹក។
លោកបានបញ្ជាក់ថា៖ «ក្នុងន័យនេះ ក្រុមការងារស្នើសុំកិច្ចសហការពីអាជ្ញាធរមូលដ្ឋាននៅតាមបណ្តាខេត្តទាំងអស់ ដើម្បីជ្រើសរើសទីតាំង និងផ្តល់កិច្ចសហការដើម្បីការអនុវត្តយុទ្ធនាការនេះសម្រេចបានប្រកបដោយភាពជោគជ័យ»។
លោក ហ៊ួត រិទ្ធី បានបញ្ជាក់ទៀតថា ប្រសិនបើនៅតាមដងទន្លេ ឬកន្លែងណាមួយមានសំរាមនៅក្នុងទឹក អាជ្ញាធរខេត្តនីមួយៗ ឬអាជ្ញាធរមូលដ្ឋានអាចស្នើសុំទូកនេះ ដើម្បីចុះទៅប្រមូលសំរាមនៅក្នុងមូលដ្ឋានរបស់ខ្លួនបាន ហើយក្រុមការងារគណៈកម្មាធិការជាតិវាយតម្លៃទីក្រុងស្អាតនឹងផ្ដល់កិច្ចសហការជាមួយ។
លោក ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិវាយតម្លៃទីក្រុងស្អាតធ្លាប់បានលើកឡើងថា យុទ្ធនាការសម្អាតទន្លេមេគង្គទន្លេសាប និងទន្លេបាសាក់ក្នុងរាជធានីភ្នំពេញ ដោយប្រើប្រាស់ទូកប្រមូលសំរាមបំពាក់បច្ចេកវិទ្យាថ្មីរបស់អាល្លឺម៉ង់ជាបេសកកម្មដំបូងដ៏សំខាន់មួយសម្រាប់កម្ពុជាក្នុងការចូលរួមចំណែកធ្វើឱ្យទន្លេស្អាត ទីក្រុងស្អាត ពិសេសចូលរួមក្នុងយុទ្ធនាការប្រឡងប្រណាំងទីក្រុងស្អាតនៅកម្ពុជា។
លោកថ្លែងថា៖ «យើងមានការចូលរួមពីប្រជាពលរដ្ឋ ប៉ុន្តែបញ្ហាបច្ចេកទេស និងឧបករណ៍គឺជាបញ្ហាសំខាន់ដោយសារ ទោះបីយើងមានឆន្ទៈមានការចូលរួមរបស់ប្រជាពលរដ្ឋ តែយើងខ្វះបច្ចេកទេស ក៏មិនអាចទៅរួចដែរ»។
គួរបញ្ជាក់ផងដែរថា នៅតាមដងទន្លេ ឬកន្លែងណាមួយដែលមានសំរាមក្នុងទឹក ហើយចង់ប្រើប្រាស់ទូកប្រមូលសំរាមនេះអាជ្ញាធររាជធានី ខេត្ត អាចស្នើទៅគណៈកម្មាធិការជាតិវាយតម្លៃទីក្រុងស្អាត សុំទូកនេះចុះទៅប្រមូលសំរាមក្នុងមូលដ្ឋានរបស់ខ្លួនបាន៕