.jpg)
លោកនាយករដ្ឋមន្ត្រី ហ៊ុន សែន នៅលើយន្តហោះក្នុងដំណើរទៅចូលរួមប្រជុំអាស៊ាន-អាមេរិក នាថ្ងៃទី ១០ ឧសភា។ រូបថត SPM
ភ្នំពេញៈ លោកនាយករដ្ឋមន្ត្រីអំពាវនាវដល់កាកបាទក្រហមកម្ពុជា ក្រសួង ស្ថាប័នពាក់ព័ន្ធអាជ្ញាធរមូលដ្ឋានគ្រប់លំដាប់ថ្នាក់ និងសប្បុរសជននានាបន្តជំរុញចលនាលើកកម្ពស់សុខុមាលភាពគ្រួសារ និងលើកកម្ពស់ភាពរឹងមាំរបស់គ្រួសារទាំងអស់នៅកម្ពុជា ទោះបីក្នុងដំណាក់កាល ដែលពិភពលោកកំពុងជួបប្រទះបញ្ហាថវិកា ដើម្បីឆ្លើយតបនឹងជំងឺកូវីដ ១៩ ក៏ដោយ។
លោកនាយករដ្ឋមន្ត្រី ហ៊ុន សែន លើកឡើងដូចនេះនាថ្ងៃទី ១០ ឧសភា ក្នុងសារលិខិតនៃទិវាអន្តរជាតិស្តីពីគ្រួសារ ខួបលើកទី ២៨ ឆ្នាំ ២០២២ ក្រោមប្រធានបទ «គ្រួសារជាមូលដ្ឋានគ្រឹះនៃការថែរក្សា និងការពារសន្តិភាព»។ ប្រមុខរដ្ឋាភិបាលក៏បានប្រាប់ឱ្យបណ្តាក្រសួង ស្ថាប័ន រាជធានី-ខេត្ត ត្រូវបន្តសហការជាមួយក្រសួងសង្គមកិច្ច អតីតយុទ្ធជន និងយុវនីតិសម្បទារៀបចំឱ្យបានទូលំទូលាយ និងផុសផុល ដើម្បីជាការរួមចំណែកក្នុងការលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរក្នុងបរិបទកូវីដ ១៩។
លោកថា ប្រធានបទខាងលើនេះ បង្ហាញយ៉ាងច្បាស់នូវអត្ថន័យថា គ្រួសារពិតជាកោសិកាមួយដ៏សំខាន់ក្នុងការដើរតួនាទីជាកម្លាំងចលករក្នុងការផ្តល់នូវបទពិសោធ ចំណេះដឹងជាមូលដ្ឋាន ជំរុញកិច្ចអភិវឌ្ឍសេដ្ឋកិច្ច សង្គមកិច្ច និងវប្បធម៌ ពិសេស ការរក្សាបាននូវសន្តិភាព តុល្យភាពសង្គម និងស្ថិរភាពជាតិ។
ក្របខ័ណ្ឌគោលនយោបាយជាតិគាំពារសង្គម ២០១៦-២០២៥ គោលនយោបាយនេះកំពុងផ្តោតជាចម្បងដល់ការលើកកម្ពស់ជីវភាពគ្រួសារការឧបត្ថម្ភសាច់ប្រាក់ជូនគ្រួសារក្រីក្រក្នុងអំឡុងពេលប្រយុទ្ធនឹងជំងឺកូវីដ ១៩ អំឡុងពេលបិទខ្ទប់ និងការផ្តល់សាច់ប្រាក់សម្រាប់កញ្ចប់គ្រួសារក្រីក្រដូចជាស្ត្រីមានផ្ទៃពោះ និងកុមារអាយុក្រោម ២ ឆ្នាំ មនុស្សវ័យចាស់គ្មានទីពឹង ជនពិការក្រីក្រ។
លោក ហ៊ុន សែន បញ្ជាក់ថា៖ «មូលនិធិជាតិជំនួយសង្គមត្រូវបន្តរៀបចំគោលនយោបាយផ្សេងៗក្នុងការផ្តល់កិច្ចអន្តរាគមន៍គាំពារសង្គមជារួម និងជំនួយសង្គមដោយឡែកដល់ប្រជាជនទូទៅ ពិសេសជនរងគ្រោះ និងងាយរងគ្រោះ ដើម្បីសំដៅលើកកម្ពស់ ជីវភាពរស់នៅ និងការកសាងគុណភាពជីវិតប្រកបដោយបរិយាប័ន្ន»។
លោកស្នើឱ្យដៃគូអភិវឌ្ឍ អង្គការ មិនមែនរដ្ឋាភិបាលទាំងជាតិ និងអន្តរជាតិបន្តចូលរួមឱ្យបានកាន់តែសកម្មបន្ថែមទៀតក្នុងការជួយគាំទ្រដល់សកម្មភាព កម្មវិធីអភិវឌ្ឍន៍គ្រួសារទាំងថវិកា និងធនធានមនុស្ស ដើម្បីធានាឱ្យបាននូវការលើកកម្ពស់ដល់ភាពរឹងមាំរបស់គ្រួសារទាំងអស់នៅព្រះរាជាណាចក្រកម្ពុជា។
លោក ហ៊ុន សែន ស្នើថា៖ «ក្រសួង ស្ថាប័នពាក់ព័ន្ធទាំងអស់ អាជ្ញាធរមូលដ្ឋានគ្រប់លំដាប់ថ្នាក់ កាកបាទក្រហមកម្ពុជា សប្បុរសជននានា សូមបន្តជំរុញចលនាលើកកម្ពស់ដល់សុខុមាលភាពគ្រួសារ និងបន្តបង្កើនសកម្មភាពមនុស្សធម៌ឱ្យកាន់តែខ្លាំងក្លាថែមទៀតតាមគ្រប់រូបភាពដែលអាចធ្វើទៅបាន ទាំងការជំរុញចលនា និងសកម្មភាពនោះ ទោះធ្វើដោយ ផ្ទាល់ក្ដី ឬដោយប្រយោលក្តី»។
លោកក៏បានអំពាវនាវដល់គ្រួសារ និងសហគមន៍នីមួយៗត្រូវបន្តពង្រឹងស្មារតី សាមគ្គីភាពល្អ យកចិត្តទុកដាក់អប់រំសីលធម៌ និងប្រពៃណីទំនៀមទម្លាប់ល្អប្រកបដោយមនសិការ និងការទទួលខុសត្រូវខ្ពស់ដល់សមាជិកគ្រួសារខ្លួនតាមរយៈការផ្តល់ការអប់រំរៀនសូត្រ សីលធម៌ សុជីវធម៌ ចរិយាធម៌ ចំណេះដឹងទូទៅ និងជំនាញវិជ្ជាជីវៈផ្សេងៗផងដែរ។
ទោះបីជារាជរដ្ឋាភិបាលកម្ពុជាបានប្រារព្ធទិវាអន្តរជាតិស្តីពីគ្រួសារ ១៥ ឧសភា ចំនួន ២៨ លើករួចមកហើយក៏ដោយ ក្នុងនាមរាជរដ្ឋាភិបាលដែលមានក្រសួងសង្គមកិច្ច អតីតយុទ្ធជន និងយុវនីតិសម្បទា តែងតែរៀបចំព្រឹត្តិការណ៍ជួបជុំ ការផលិតនូវខ្សែភាពយន្តអប់រំខ្លីៗ និងកម្មវិធីផ្សព្វផ្សាយអំពីការអប់រំ ទូន្មានដល់កូនចៅ ប្រុសស្រី លោកគ្រូ អ្នកគ្រូ សិស្ស និស្សិត កម្មករ កម្មការិនី ផ្សព្វផ្សាយជាច្រើន ដើម្បីអបអរសាទរក្នុងឱកាសប្រារព្ធទិវានេះជារៀងរាល់ឆ្នាំ។
ក្នុងន័យនេះ លោក ហ៊ុន សែន ស្នើឱ្យក្រសួងសង្គមកិច្ចសហការជាមួយក្រសួងព័ត៌មាន និងសមាគមទូរទស្សន៍រៀបចំឱ្យមានជាវេទិកាតុមូល និងការផលិតវីដេអូអប់រំ ដើម្បីចាក់ផ្សាយនៅតាមស្ថានីយទូរទស្សន៍ រោងភាពយន្ត និងទីសាធារណៈផ្សេងៗពីគុណតម្លៃគ្រួសារក្នុងការចូលរួមទប់ស្កាត់នៃការរីករាលដាលជំងឺកូវីដ ១៩ និងសហការជាមួយក្រសួងអប់រំ និងក្រសួងការងារ ដើម្បីធ្វើការផ្សព្វផ្សាយនៅតាមគ្រឹះស្ថានអប់រំ និងរោងចក្រ សហគ្រាសនានាទូទាំងប្រទេស។
លោកស្រី ម៉ែន នារីសោភ័គ អគ្គលេខាធិការរងទី ១ កាកបាទក្រហមកម្ពុជាបានថ្លែងក្នុងកិច្ចសម្ភាសន៍មួយថា កាកបាទក្រហមកម្ពុជាមានយុទ្ធសាស្ត្រ ២០០៣-២០១០ បន្ទាប់មកមានយុទ្ធសាស្ត្រ ២០១១-២០២០។ បច្ចុប្បន្នកាកបាទក្រហមកំពុងអនុវត្តយុទ្ធសាស្ត្រ ២០២១-២០៣០។
កាកបាទក្រហមកម្ពុជាមានយុទ្ធសាស្ត្រលើវិស័យអាទិភាពចំនួន ៤ ក្នុងនោះមាន ការងារគ្រប់គ្រងគ្រោះមហន្តរាយ ការថែទាំសុខភាពតាមសហគមន៍ ការលើកកម្ពស់គោលការណ៍គ្រឹះ តម្លៃមនុស្សធម៌ និងការងារអភិវឌ្ឍន៍សាខា អនុសាខាទាំង ២៥ រាជធានីខេត្ត។
លោកស្រីថ្លែងថា៖ «ការជួយរបស់កាកបាទក្រហមកម្ពុជាពី ១ ឆ្នាំ ទៅ ១ ឆ្នាំក្នុងរង្វង់ប្រតិបត្តិការរបស់យើង គឺយើងត្រូវការថវិកាខ្ទង់ពី ១២ ទៅ ១៣ លានដុល្លារអាមេរិក។ តាំងពីឆ្នាំ ២០១១ មក ថវិកាដែលយើងទទួលបានទិវា ៨ ឧសភា យើង តែងតែធ្វើការបរិច្ចាគ ១ លានដុល្លារទៅមន្ទីរពេទ្យគន្ធបុប្ផា មន្ទីរពេទ្យកុមារអង្គរ និងតាមមណ្ឌលកុមារកំព្រាមួយចំនួនផងដែរ»។
ក្នុងរយៈពេលនៃការទប់ស្កាត់ជំងឺកូវីដ ១៩ កាកបាទក្រហមកម្ពុជាក៏បានចូលរួមចែករំលែកជាមួយរាជរដ្ឋាភិបាលជាច្រើនផងដែរ៕
