The Phnom Penh Post Search

Search form




Logo of Phnom Penh Post newspaper Phnom Penh Post - សួន​រុក្ខជាតិ​អង្គរ​មាន​រុក្ខជាតិ​ជាង​ ៥០០ ​ប្រភេទ ​ត្រូវ​លើក​ទៅ​សម្ពោធ​ថ្ងៃ​ ១៩ ​ឧសភា

សួន​រុក្ខជាតិ​អង្គរ​មាន​រុក្ខជាតិ​ជាង​ ៥០០ ​ប្រភេទ ​ត្រូវ​លើក​ទៅ​សម្ពោធ​ថ្ងៃ​ ១៩ ​ឧសភា

Content image - Phnom Penh Post
មន្ត្រី​អាជ្ញាធរ​ជាតិ​អប្សរា និង​អ្នក​ថែ​សួន​រុក្ខជាតិ​អង្គរ ជួប​ស្វាគមន៍​រដ្ឋមន្ត្រី​ក្រសួង​វប្បធម៌​ពីថ្ងៃ​ទី ៥​ ឧសភា​។ រូបថត ANA

សួន​រុក្ខជាតិ​អង្គរ​មាន​រុក្ខជាតិ​ជាង​ ៥០០ ​ប្រភេទ ​ត្រូវ​លើក​ទៅ​សម្ពោធ​ថ្ងៃ​ ១៩ ​ឧសភា

សៀមរាបៈ សួន​រុក្ខជាតិ​អង្គរ​ដែល​មាន​ដើមឈើ​រាប់ម៉ឺន​ដើម ក្នុង​នោះ​មាន​រុក្ខជាតិ​ជាង ៥០០ ​ប្រភេទ​ផ្សេងៗ​គ្នា ដែល​គ្រោង​សម្ពោធ​ដាក់ឱ្យ​ដំណើរការ​ជា​ផ្លូវការ​នៅ​ថ្ងៃទី​ ៩ ខែឧសភា ត្រូវបាន​លើក​ពេល​ទៅធ្វើ​នៅ​ថ្ងៃទី ១៩ ខែឧសភា​វិញ ដោយសារ​មាន​បញ្ហា​បច្ចេកទេស​ការងារ​មួយចំនួន និង​ការជាប់រវល់​របស់​ថ្នាក់ដឹកនាំ​។

លោក​ ឡុង កុសល អគ្គនាយករង និង​ជា​អ្នកនាំពាក្យ​អាជ្ញាធរ​ជាតិ​អប្សរា​ថ្លែង​នៅ​ថ្ងៃទី​ ១០ ខែឧសភា​ថា កម្មវិធី​សម្ពោធ​ដាក់ឱ្យ​ប្រើប្រាស់​ជា​ផ្លូវការ​នូវ​សួន​រុក្ខជាតិ​អង្គរ ត្រូវបាន​លើក​ពេល​ពី​ថ្ងៃទី ៩ ខែឧសភា ទៅ​ថ្ងៃទី​ ១៩​ ឧសភា​វិញ ដោយសារ​តែមាន​បញ្ហា​បច្ចេកទេស​ការងារ​មួយចំនួន ជាពិសេស​គឺ​ថ្នាក់ដឹកនាំ​ជា​គណៈអធិបតី​ជាប់រវល់​។

លោក​ឱ្យដឹងថា ដើម្បី​បង្កើន​កិច្ចអភិវឌ្ឍន៍​ក្នុង​តំបន់​រមណីយដ្ឋាន​អង្គរ និង​ទាក់ទាញ​ភ្ញៀវទេសចរ​ផង អាជ្ញាធរ​ជាតិ​អប្សរា​បាន​បង្កើត​សួន​រុក្ខជាតិ​អង្គរ​លើ​ផ្ទៃដី​ប្រមាណ​ជិត ​១៥​ ហិកតា ដោយមាន​រៀបចំ​ជា​សួន​សំខាន់ៗ​ជាច្រើន​។ ក្នុងនោះ​អាជ្ញាធរ​ជាតិអប្សរា​បាន​ដាំ​កូនឈើ និង​ប្រភេទ​រុក្ខជាតិ​ផ្សេងៗ​គ្នា រាប់ម៉ឺន​ដើម​ដែល​មាន​រុក្ខជាតិ​ជាង ៥០០ ​ប្រភេទ​ផ្សេងៗ​គ្នា​។

នៅ​ទីនោះ មាន​សួនសត្វ និង​សួន​រុក្ខជាតិ​សំខាន់ៗ​ចំនួន​ ៥​ សួន​បាន​បង្កើតឡើង​ក្នុង​រចនាប័ទ្ម​បែប​ខ្មែរ រួមមាន សួន​ឱសថ​ និង​គ្រឿងទេស សួនផ្កា​ស្មៅ និង​ផ្កា​ចម្រុះ សួន​អម្បូរ​ត្នោត សួន​ខ្មែរ សួន​ព្រៃឈើ និង​សត្វព្រៃ​អង្គរ​ជាដើម​។ សួន​ទាំងនោះ​មាន​ភាពទាក់ទាញ​ខុសប្លែក​ពីគ្នា ជាពិសេស​មាន​ដើមឈើ និង​រុក្ខជាតិ​កម្រៗ​ជាច្រើន​ប្រភេទ បម្រើ​ផលប្រយោជន៍​ខុសប្លែក​ពីគ្នា សម្រាប់​មនុស្ស​ជំនាន់​ក្រោយ​បាន​ស្គាល់ និង​ការងារ​សិក្សា​ស្រាវជ្រាវ​។

លោក​ ឡុង កុសល ថ្លែង​ទៀតថា ដំបូង​សួន​រុក្ខជាតិ​អង្គរ​នេះ គឺជា​សួន​គ្រឿងទេស​ដែលមាន​ទំហំ​ដី​ត្រឹម​ជាង ២ ​ហិកតា​ប៉ុណ្ណោះ ប៉ុន្តែ នៅ​ឆ្នាំ​ ២០១០ អាជ្ញាធរ​ជាតិ​អប្សរា​បាន​រៀបចំ​ពង្រីក​សួន​នេះ​ឱ្យ​កាន់តែ​ធំ​ជាង​មុន ដោយ​រៀបចំ​ប្រព័ន្ធ​ទឹក ដែល​មាន​ប្រភពពី​ស្ទឹង​សៀមរាប ដើម្បី​ស្រោចស្រព​រុក្ខជាតិ​ទាំងនេះ ហើយ​នៅ​ឆ្នាំ ​២០១៨ អាជ្ញាធរ​ជាតិ​អប្សរា​ក៏បាន​ដាក់​បន្ថែម​សត្វ​ជាច្រើន​ប្រភេទ ដូចជា​អណ្តើក ក្ងោក ព្រាប ទន្សាយ និង​សត្វ​ស្លាប​មួយចំនួន​នៅក្នុង​សួន​នេះ​។ លោក​បញ្ជាក់ថា​៖ «​សួន​រុក្ខជាតិ​អង្គរ​នេះ មាន​ភាពទាក់ទាញ​ខុសប្លែក​ពី​សួន​ដទៃទៀត​ជាច្រើន ជាពិសេស​គឺមាន​ដាំ​ដើមឈើ និង​រុក្ខជាតិ​កម្រៗ​ជាច្រើន​ប្រភេទ​សម្រាប់​ឱ្យ​កូន​ខ្មែរ និង​អ្នកទេសចរ​ជំនាន់​ក្រោយៗ​បាន​ស្គាល់ និង​អាចមក​សិក្សា​ស្រាវជ្រាវ​ទៀតផង​» ។

បើតាម​អ្នកនាំពាក្យ​អាជ្ញាធរ​ជាតិ​អប្សរា សួន​រុក្ខជាតិ​អង្គរ​នេះ​អាច​នឹង​ផ្ដល់​ផលិតផល​ទេសចរណ៍​ថ្មីៗ​ថែមទៀត​ក្នុងការ​ទាក់ទាញ​ភ្ញៀវទេសចរ​ជាតិ និង​អន្តរជាតិ ដែល​មកដល់​ទឹកដី​ខេត្ត​សៀមរាប​ឱ្យ​ចាប់អារម្មណ៍​ក្នុង​ការចូលមក​កម្សាន្ត ដើរ​លម្ហែ​-​កាយ ក៏ដូចជា​ការដើរ​ហាត់​-​ប្រាណ​ក្រៅពី​បាន​ទៅ​ទស្សនា​ប្រាសាទ​អង្គរ និង​ប្រាសាទ​នានា​រួមទាំង​តំបន់​ផ្សេងៗ​ទៀត​។

លោក ​សុខ វិជ្ជា អ្នកស្រាវជ្រាវ​ជីវចម្រុះ​ថ្លែង​នៅ​ថ្ងៃទី ​១០ ខែឧសភា​ថា ការបង្កើតឱ្យមាន​សួន​រុក្ខជាតិ​អង្គរ​នេះ គឺមាន​ប្រយោជន៍​ធំធេង​ណាស់​ដោយ​សារ ទី​ ១ អាចជា​មជ្ឈមណ្ឌល​មួយ សម្រាប់​អ្នកសិក្សា​ស្រាវជ្រាវ ផ្នែក​រុក្ខជាតិ ជំនាន់​ក្រោយៗ ក៏ដូចជា​និស្សិត​ចុះ​កម្មសិក្សា ឬមួយ​សរសេរ​សារ​ណា​ផ្សេងៗ ក៏​អាច​ទៅធ្វើ​ការស្រាវជ្រាវ​នៅ​ទីនោះ​បាន​។ ទី​ ២ គឺជា​ការចូលរួម​ថែរក្សា និង​អភិរក្ស​ពូជ​រុក្ខជាតិ​ក្នុងស្រុក​ផងដែរ​។

លោក​បាន​បញ្ជាក់ថា​៖ «​ដោយសារ​មានការ​ទន្ទ្រាន​ដី​កសិកម្ម​វា​ធ្វើឱ្យ​រុក្ខជាតិ​កម្រ​មួយចំនួន​ប្រឈម​នឹង​ការ​ផុត​ពូជ ហេតុនេះ​បើសិនជា​មានការ​បង្កើត​សួន​រុក្ខជាតិ​បែប​ហ្នឹង​ឡើងមក គឺ​វា​ជា​អត្ថប្រយោជន៍ ក៏​ដូចជា​គុណប្រយោជន៍​មួយ​ដ៏ធំធេង សម្រាប់​ស្រុក​ខ្មែរ​យើង​ដែរ​»​។

ប៉ុន្តែ​អ្នកស្រាវជ្រាវ​ជីវចម្រុះ​រូបនេះ​បាន​លើកឡើងថា ការដាក់​បញ្ជូល​អណ្តើក ក្ងោក ព្រាប ទន្សាយ​ជាដើម នៅក្នុង​សួន​រុក្ខជាតិ​នេះ បើ​គិតពី​លក្ខណៈ​វិទ្យាសាស្ត្រ និង​សិក្សា​ទៅលើ​ប្រព័ន្ធ​អេកូឡូស៊ី គឺ​មិន​សមស្រប​សម្រាប់​សត្វ​ទាំង​នោះឡើយ ដោយសារ​វា​ខុស​បរិស្ថាន​របស់​ពួកវា​៕

អត្ថបទគួរចាប់អារម្មណ៍