ព្រះសីហនុៈ នគរបាលស្រុកព្រៃនប់ នៅថ្ងៃទី១២ ឧសភា បន្តស្វែងរកចាប់ខ្លួនបុរសស្រវឹងខួបម្នាក់ពាក់ព័ន្ធនឹងការវាយសម្លាប់ប្រពន្ធរបស់ខ្លួនកំពុងមានផ្ទៃពោះ៧ខែ ដែលសង្ស័យមកពីរឿងប្រចណ្ឌ ប្រព្រឹត្តកាលពីយប់ថ្ងៃទី១០ ឧសភា នៅភូមិ-ឃុំជើងគោ ស្រុកព្រៃនប់ ខេត្តព្រះសីហនុ។
លោក អ៊ួង វុទ្ធី អធិការនគរបាលស្រុកព្រៃនប់ ឱ្យដឹងនៅថ្ងៃទី១២ឧសភា ថា ករណីជនសង្ស័យ ឈ្មោះ យ៉ែម ចិន្តា អាយុ ៣៧ឆ្នាំ កំពុងត្រូវបានសមត្ថកិច្ចរបស់លោកស្វែងរកចាប់ខ្លួន ពាក់ព័ន្ធនឹងការវាយសម្លាប់ប្រពន្ធរបស់គាត់ ឈ្មោះវ៉ាន់ វុន អាយុ៣៦ឆ្នាំ។ ពួកគេរស់នៅភូមិ-ឃុំជើងគោ ស្រុកព្រៃនប់ ខេត្តព្រះសីហនុ។
លោកថ្លែងថា៖«ចាប់តាំងពីថ្ងៃកើតហេតុ រហូតដល់ពេលនេះ សមត្ថកិច្ចរបស់យើងកំពុងស្វះស្វែងរកជនសង្ស័យ ដើម្បីចាប់ខ្លួន។ យើងកំពុងតែធ្វើការងារនេះយ៉ាងសកម្មបំផុត»។
លោកហុក ប្រឹម នាយនគរបាលប៉ុស្តិ៍ឃុំជើងគោប្រាប់នៅថ្ងៃទី១២ ឧសភា ថា គ្រួសារនេះមានកូនចំនួន៦នាក់(ស្រី២នាក់)ហើយកំពុងមានផ្ទៃពោះ៧ខែកូនម្នាក់ទៀត។ ពួកគេមានរបរជាអ្នកដុតធ្យូងលក់។ ទាំង២នាក់ប្តីប្រពន្ធនេះក៏ជាមនុស្សញៀនស្រា និងឈ្លោះគ្នាជាប្រចាំមិនលួសថ្ងៃណាឡើយ។
លោកបន្តតាមសាច់ញាតិ និងសាក្សីនៅក្បែរផ្ទះរបស់ស្ត្រីរងគ្រោះថា បុរសសង្ស័យពេលផឹកស្រាស្រវឹងតែងតែឈ្លោះជាមួយស្ត្រីរងគ្រោះនិងចោទប្រពន្ធថាលួចមានស្នេហាជាមួយប្រុសផ្សេង។ នៅមុនពេលកើតហេតុ គេបានឮសំឡេងទាំង២នាក់ប្តីប្រពន្ធមានទំនាស់ឈ្លោះវាយតប់គ្នា តែអ្នកជិតខាងមិនបានចាប់អារម្មណ៍នឹងគ្រួសារនេះទេ ដោយសារពួកគេមានទម្លាប់ឈ្លោះនិងវាយតប់គ្នាជាប្រចាំថ្ងៃមកហើយ។ លុះក្រោយមក ទើបអ្នកជិតខាងផ្ទះរបស់ស្ត្រីរងគ្រោះដឹងដោយឮសំឡេងកូនៗយំហើយក៏ទៅមើល ឃើញស្ត្រីរងគ្រោះត្រូវបានប្តីវាយស្លាប់បាត់ទៅហើយ។ ភ្លាមៗនោះអ្នកភូមិបានរាយការណ៍ប្រាប់មកសមត្ថកិច្ចនគរបាលប៉ុស្តិ៍របស់លោក។
បើតាមលោកហុក ប្រឹម ក្រោយពីទទួលបានព័ត៌មាននេះមក លោកបានរាយការណ៍ទៅលោក អ៊ួង វុទ្ធី អធិការនគរបាលស្រុកព្រៃនប់។ ពេលនោះលោកមេប៉ុស្តិ៍ បានចុះដល់ផ្ទះកើតហេតុ ដោយមានទាំងនគរបាលកោសល្យវិច័យខេត្តព្រះសីហនុ និងគ្រូពេទ្យចូលរួមផង។ នៅកន្លែងកើតហេតុ សមត្ថកិច្ចបានសាកសួរកូនៗរបស់ស្ត្រីរងគ្រោះ ពួកគេក៏បានប្រាប់ថា នៅពេលកើតហេតុយប់ថ្ងៃទី១០ ឧសភានោះ កូនៗរបស់ស្ត្រីរងគ្រោះបានឃើញឪពុករបស់គេវាយសម្រាតខោម្តាយ ហើយបានយកអង្រែបុកគ្រឿងរុកប្រដាប់ភេទ និងវាយរហូតដល់ស្លាប់នៅក្នុងផ្ទះ។
លោកបញ្ជាក់ថា ជនសង្ស័យធ្លាប់ជាប់គុកម្តងមកហើយ ពាក់ព័ន្ធនឹងការបង្ករបួសស្នាមកាប់ប្អូនថ្លៃខ្លួន ហើយទើបតែចេញពីពន្ធនាគារបានជាង១ឆ្នាំប៉ុណ្ណោះ ហើយក៏មានរឿងបែបនេះទៀត៕