The Phnom Penh Post Search

Search form




Logo of Phnom Penh Post newspaper Phnom Penh Post - កម្ពុជា​ត្រូវការ​ឈាម​សង្គ្រោះ​ជីវិត​ជិត​ ១០​ ម៉ឺន​ប្លោក​ក្នុង​ ១​ ឆ្នាំ វិស័យ​ឯកជន​ និង​រដ្ឋ​កំពុង​ធ្វើ​យុទ្ធនាការ​ជួយ

កម្ពុជា​ត្រូវការ​ឈាម​សង្គ្រោះ​ជីវិត​ជិត​ ១០​ ម៉ឺន​ប្លោក​ក្នុង​ ១​ ឆ្នាំ វិស័យ​ឯកជន​ និង​រដ្ឋ​កំពុង​ធ្វើ​យុទ្ធនាការ​ជួយ

Content image - Phnom Penh Post
ប្រជាពលរដ្ឋ​ស្ម័គ្រចិត្ត​ផ្ដល់​ឈាម​នាពេល​កន្លងមក​។ រូប Cambodia Blood Service

កម្ពុជា​ត្រូវការ​ឈាម​សង្គ្រោះ​ជីវិត​ជិត​ ១០​ ម៉ឺន​ប្លោក​ក្នុង​ ១​ ឆ្នាំ វិស័យ​ឯកជន​ និង​រដ្ឋ​កំពុង​ធ្វើ​យុទ្ធនាការ​ជួយ

ភ្នំពេញៈ មន្ត្រី​មជ្ឈមណ្ឌល​ជាតិ​ផ្តល់​ឈាម​បាន​បញ្ជាក់ថា កម្ពុជា​មាន​តម្រូវការ​ឈាម ដើម្បី​ជួយសង្គ្រោះ​ជីវិត​មនុស្ស​ប្រមាណ​ជិត​ ១០ ​ម៉ឺន​ប្លោក ក្នុង​ ១​ ឆ្នាំ ដែល​ចំនួន​នេះ គឺ​លើសពី​ឆ្នាំមុនៗ ជិត​ ២០​ ភាគរយ​។ ឆ្លើយតប​តម្រូវការ​នេះ វិស័យ​ឯកជន និង​ស្ថាប័នរដ្ឋ​កំពុង​មាន​យុទ្ធនាការ​ជា​បន្តបន្ទាប់​ក្នុងការ​ផ្តល់​ឈាម​។

លោក​ លី សុវិទ្យ អនុប្រធាន​មជ្ឈមណ្ឌល​ជាតិ​ផ្តល់​ឈាម​ប្រាប់​ភ្នំពេញ​ប៉ុស្តិ៍ តាមរយៈ​តេឡេក្រាម​នៅ​ថ្ងៃទី​ ១២ ឧសភា ថា កន្លងមក នៅ​រៀងរាល់​ ៦ ​នាទី​ម្តង កម្ពុជា​ត្រូវការ​ឈាម​ ១​ ប្លោក ដើម្បី​ជួយសង្គ្រោះ​ជីវិត​អ្នកជំងឺ​។ តម្រូវការ​ឈាម​ប្រចាំថ្ងៃ​សរុប​ប្រមាណ​ជាង ២០០ ​ប្លោក​នៅ​រាជធានី​ភ្នំពេញ ខណៈ​តម្រូវការ​ទូទាំង​ប្រទេស​មាន​ប្រមាណ​ជិត ​១០ ​ម៉ឺន​ប្លោក​ក្នុង​ ១​ ឆ្នាំ ដែល​លើសពី​ឆ្នាំមុនៗ​ជិត​ ២០ ​ភាគរយ​។ មជ្ឈមណ្ឌល​ជាតិ​ផ្តល់​ឈាម​បាន​គ្របដណ្តប់​ជាង​ ៧០ ​ភាគរយ​នៃ​ការផ្គត់ផ្គង់​ឈាម​នៅ​ទូទាំង​ប្រទេស​។

លោក​ សុវិទ្យ បានឱ្យដឹង​ទៀតថា តាម​ទិន្នន័យ​របស់​អង្គការ​សុខភាព​ពិភពលោក ចំពោះ​ការទទួល​ឈាម​តាមរយៈ​សប្បុរសជន ដោយ​មិន​គិត​កម្រៃ និង​ដោយ​ស្ម័គ្រចិត្ត ឆ្លើយតបបាន​ប្រមាណ​ ១០ ​ភាគរយ​នៃ​តម្រូវការ សរុប​ក្នុងប្រទេស​តែប៉ុណ្ណោះ​។ រីឯ​ប្រទេស​ជិតខាង​មាន​ការបរិច្ចាគ​ឈាម​ដោយ​ស្ម័គ្រចិត្ត អាច​ផ្គត់ផ្គង់​រហូតដល់​លើសពី​ ៩០ ​ភាគរយ​នៃ​តម្រូវការ​ឈាម​។ លោក​ថ្លែងថា ទោះបី​ការផ្តល់​ឈាម​ដោយ​ស្ម័គ្រចិត្ត​នៅមាន​ការខ្វះខាត​ច្រើន​ក៏ដោយ ប៉ុន្តែ​កម្ពុជា​អាច​ទប់ទល់​ភាពខ្វះខាត​ឈាម​បាន ដោយសារ​តែមាន​អ្នកបរិច្ចាគឈាម​ជំនួស​រហូត​ដល់​ជាង ៨០​ ភាគរយ​។

លោក​ថ្លែងថា​៖ «​យើង​អាច​ទប់ទល់​បាន​ដោយសារ​មាន​អ្នកផ្តល់​ឈាម​ជំនួស ហើយ​យើង​ក៏​អត់​ចង់បាន​អ្នកផ្តល់​ឈាម​ជំនួស​ដែរ​។ យើង​ចង់​បាន​អ្នកផ្តល់​ឈាម​ស្ម័គ្រចិត្ត​ឱ្យមាន​ការកើនឡើង ដូច​ប្រទេស​ជិតខាង​រហូតដល់​ ៩០ ​ភាគរយ​ឯណោះ​បាន​យើង​អាច​ផ្គត់ផ្គង់​ឈាម​បាន​គ្រប់គ្រាន់​»​។

លោក​អះអាងថា កិច្ច​បរិច្ចាគ​ឈាមមាន​អត្ថប្រយោជន៍​ច្រើន និង​មិន​ប៉ះពាល់​ដល់​សុខភាព​ទេ ហើយ​ឈាមមាន​ប្រភព​តែមួយគត់ គឺ​ពី​មនុស្ស​។ រហូត​មកទល់​ពេលនេះ​មិនទាន់មាន​រោងចក្រ​ណា​ផលិត​ឈាម​បានទេ​។ លោក​បញ្ជាក់ថា​៖ «​សូមកុំ​រង់ចាំ​ដល់​វេលា​មួយ​នៅពេល​ដែល​យើង​ចង់​ធ្វើ​អំណោយ​ឈាម បែរជា​ហួសពេល​»​។

ខណៈ​តម្រូវការ​ឈាម​ ដើម្បី​សង្គ្រោះ​អាយុជីវិត មាន​ការ​កើនឡើង​ពី​ ១ ​ថ្ងៃ​ទៅ ​១ ​ថ្ងៃ ហើយ​ការផ្គត់ផ្គង់​ឈាម​បាន​ធ្លាក់ចុះ​គួរឱ្យ​កត់សម្គាល់​ចាប់តាំងពី​ព្រឹត្តិការណ៍​សហគមន៍ ​២០ កុម្ភៈ មក សមាគម​មីក្រូហិរញ្ញវត្ថុ​កម្ពុជា ធនាគារជាតិ​នៃ​កម្ពុជា សហភាព​-​សហព័ន្ធ​យុវជន​កម្ពុជា​រាជធានី​- ភ្នំពេញ សហភាព​សហព័ន្ធ​-​យុវជន​កម្ពុជា​វិស័យ​ធនាគារ និង​សមាគម​ធនាគារ​កម្ពុជា​បាន​សហការ​ជាមួយ​មជ្ឈមណ្ឌល​ជាតិ​ផ្តល់​ឈាម​រៀបចំ​យុទ្ធនាការ​បរិច្ចាគ​ឈាម​ក្រោម​ប្រធានបទ «​សង្គ្រោះ​ជីវិត​ខ្ញុំ​»​។

លោក ​សុខ វឿន ប្រធាន​ក្រុមប្រឹក្សាភិបាល​សមាគម​មីក្រូហិរញ្ញវត្ថុ​កម្ពុជា បានឱ្យ​ដឹងថា កម្មវិធី​នេះ​ធ្វើឡើង​នៅ​ថ្ងៃទី ​១២ ឧសភា នៅ​ទីស្នាក់ការ​កណ្តាល សហភាព​សហព័ន្ធ​យុវជន​កម្ពុជា រាជធានី​ភ្នំពេញ អគារ​ខេមរានី វិថី​វិចិត្រសិល្បៈ ខណ្ឌ​ជ្រោយចង្វារ ដោយមាន​អ្នក​ចុះឈ្មោះ​ចូលរួម​សរុប​ប្រមាណ​ជាង​ ៧០០ ​នាក់​។ បន្ថែម​ពីលើ​ការបរិច្ចាគ​ឈាម សមាគម​មីក្រូហិរញ្ញវត្ថុ​កម្ពុជា បរិច្ចាគ​ថវិកា​ចំនួន​ ៤​ ម៉ឺន​រៀល​បន្ថែម​សម្រាប់​ឈាម​ ១ ​ប្លោក​ជូន​ដល់​មន្ទីរពេទ្យ​គន្ធបុប្ផា​ផងដែរ​។

លោក​បាន​ថ្លែងថា​៖ «​ក្រោម​កិច្ចសហការ​ពី​ស្ថាប័ន​ទាំង​ ៤ យុទ្ធនាការ​បរិច្ចាគ​ឈាម​ «​សង្គ្រោះ ជីវិត​ខ្ញុំ​» មាន​គោលបំណង​ធំៗ​ចំនួន​ ៣ គឺ​ទី​ ១ កៀរគរ​ការបរិច្ចាគ​ឈាម​ពី​បុគ្គលិក​ក្នុង​វិស័យ​ធនាគារ និង​ហិរញ្ញវត្ថុ ភាគី​ពាក់ព័ន្ធ និង​សាធារណជន​ ដើម្បី​ជួយសង្គ្រោះ​ជីវិត​អ្នក​ដែលមាន​តម្រូវការ​ឈាម​បន្ទាន់​។ ទី​ ២ បរិច្ចាគ​ថវិកា​សប្បុរសធម៌​ជួយ​ដល់​មន្ទីរពេទ្យ​គន្ធបុប្ផា និង​ទី​ ៣ លើក​កម្ពស់​ការយល់ដឹង​អំពី​សារៈសំខាន់​នៃ​ការបរិច្ចាគ​ឈាម​»​។

លោក ​រ័ត្ន សុវណ្ណនរៈ អគ្គនាយក​ត្រួតពិនិត្យ​នៃ​ធនាគារ​ជាតិ​នៃ​កម្ពុជា​ថ្លែងថា វិស័យ​ធនាគារ​ក៏​បាននិង​កំពុង​ចូលរួម​ការងារ​មនុស្សធម៌​ជាច្រើន ដូចជា ការបរិច្ចាគ​ថវិកា​ជូន​កាកបាទ​ក្រហម​កម្ពុជា ការកសាង​ហេដ្ឋារចនាសម្ព័ន្ធ​នានា ការបណ្តុះបណ្តាល​ធនធានមនុស្ស និង​ការងារ​មនុស្សធម៌​ផ្សេងៗ​ទៀត​ជាដើម​។

លោក​ថ្លែងថា​៖ «​ដោយ​ពិនិត្យឃើញ​ថា តម្រូវការ​ឈាម​នៅ​កម្ពុជា​មាន​ការកើនឡើង​ជា​រៀងរាល់​ឆ្នាំ ខណៈ​ដែល​អ្នកបរិច្ចាគឈាម​មិនបាន​គ្រប់គ្រាន់​តាម​តម្រូវការ​ទើប​ថ្ងៃនេះ​យើង​ជួបជុំគ្នា​ចូលរួម​យុទ្ធនាការ​ស្តីពី “​សង្គ្រោះ ជីវិត​ខ្ញុំ​” ​និង​បន្ថែម​ជាមួយ​ការប្រមូល​ថវិកា​បរិច្ចាគ​ជូន​មន្ទីរពេទ្យ​គន្ធបុប្ផា​ផងដែរ​»​។

លោកស្រី​ តិមា វិច្ឆិកាល សមាជិក​គណៈកម្មាធិការ​កណ្តាល​សហភាព​សហព័ន្ធ​យុវជន​កម្ពុជា និង​ជា​អនុប្រធាន​សហភាព​សហព័ន្ធ​យុវជន​កម្ពុជា​រាជធានី​ភ្នំពេញ​បាន​ថ្លែងថា ការចូលរួម​ពី​គ្រប់​កោសិកា​របស់​សង្គម​កម្ពុជា​ក្នុង​ការ​បរិច្ចាគ​ឈាម ដោយ​ស្ម័គ្រចិត្ត​នេះ គឺជា​ចលនា​សង្គ្រោះ​អាយុជីវិត​របស់​ប្រជាជន​ និង​កុមារ​ដែល​កំពុងមាន​តម្រូវការ​ឈាម​ជា​ចាំបាច់ នៅតាម​មន្ទីរពេទ្យ មណ្ឌល​សុខភាព​នានា ដើម្បី​រស់រាន​មានជីវិត​។

លោកស្រី​បញ្ជាក់ថា​៖ «​យុទ្ធនាការ​បរិច្ចាគ​ឈាម និង​ការបរិច្ចាគ​ថវិកា​ជួយ​មន្ទីរពេទ្យ​គន្ធបុប្ផា​នេះ​នឹង​វិវឌ្ឍ​ក្លាយ​ទៅជា​ចលនា​ជាតិ ដែលមាន​ភាពសកម្ម​រស់រវើក និង​រីក​សាយភាយ​ទូទាំង​ផ្ទៃ​ប្រទេស ដើម្បី​ជា​ចំណែក​នៃ​ការចូលរួម​លើក​កម្ពស់​មនសិការ ខ្មែរ​ជួយ​ខ្មែរ និង​ស្មារតី​នៃ​វប្បធម៌​ចែករំលែក​»​។

លោកស្រី ដា អ្នកនាំពាក្យ​ក្រសួង​ផែនការ​ថ្លែង​នៅ​ថ្ងៃទី​ ១២ ឧសភា ថា ឆ្លើយតប​ការចាំបាច់​របស់​មជ្ឈមណ្ឌល​ជាតិ​ផ្តល់​ឈាម និង​សប្បុរសជន​អ្នកផ្តល់​ឈាម លេខាធិការដ្ឋាន​សហភាព​សហព័ន្ធ​យុវជន​កម្ពុជា​ (​សសយក​) និង ស.ស.យ.ក. វិស័យ​ផែនការ នឹងមាន​កម្មវិធី​ផ្តល់​ឈាម នៅ​ថ្ងៃទី​ ១៩ ឧសភា នេះ ចាប់ពី​វេលាម៉ោង​ ៨ ​និង​ ៣០ ​នាទី​ព្រឹក​តទៅ​នៅ​ទីស្តីការ​ក្រសួង​ផែនការ​។

លោក​បាន​បញ្ជាក់ថា​៖ «​ការបរិច្ចាគ​ឈាម វា​ពិតជា​អាចជួយ​សង្គ្រោះ​ជីវិត​មនុស្ស​នៅ​ជុំវិញ​​ខ្លួន​របស់​យើង​បាន នៅពេលដែល​ពួកគេ​ត្រូវការ​ឈាម​ជា​ចាំបាច់​។ យើងខ្ញុំ​ចង់​ចូលរួម​ចំណែក​ជួយ​សង្គមជាតិ មិន​ថា ជា​ការងារ​អ្វី​នោះទេ សំខាន់​ឱ្យតែ​សាង​អំពើ​ល្អ​»៕

អត្ថបទគួរចាប់អារម្មណ៍