មណ្ឌលគិរី/បាត់ដំបងៈ នគរបាលប្រឆាំងគ្រឿងញៀនខេត្ត មណ្ឌលគិរីនៅថ្ងៃទី ១២ ឧសភា កំពុងរៀបចំកសាងសំណុំរឿងបញ្ជូនជនសង្ស័យ ១១ នាក់ទៅសាលាដំបូងខេត្តជាមួយគ្រឿងញៀនជាង ៣ ក្រាម ខណៈជន ៤ នាក់ទៀត ត្រូវបានឃុំខ្លួនក្នុងពន្ធនាគារខេត្តបាត់ដំបងកាលពីថ្ងៃទី ១០ ឧសភា ពាក់ព័ន្ធគ្រឿងញៀន ១០១ ថង់តូច។
លោក ស៊ុម សោភ័ណ្ឌ ស្នងការរងទទួលផែនការងារនគរបាលប្រឆាំងគ្រឿងញៀនខេត្តមណ្ឌលគិរីឱ្យដឹងនៅថ្ងៃទី ១២ ឧសភា ថា សមត្ថកិច្ចបានឃាត់ខ្លួនជនសង្ស័យចំនួន ១១ នាក់ (ស្រី ២ នាក់) និងកំពុងរៀបចំសំណុំរឿងបញ្ជូនពួកគេទៅសាលាដំបូងខេត្តមណ្ឌលគិរី។
លោកថ្លែងថា៖ «ពួកគេមានខ្លះជាអ្នកប្រើប្រាស់ អ្នកខ្លះជួញដូរ និងរក្សាទុកគ្រឿងញៀន»។ លោកឱ្យដឹងថា កាលពីរសៀលថ្ងៃទី ៩ និងថ្ងៃទី ១០ ខែឧសភា ឆ្នាំ ២០២២ កម្លាំងជំនាញនៃការិយាល័យប្រឆាំងគ្រឿងញៀនខេត្តមណ្ឌលគិរី និងនគរបាលក្រុងសែនមនោរម្យដែលសម្របសម្រួលផ្លូវច្បាប់ពីលោក ម៉ម វ៉ាន់ដា ព្រះរាជអាជ្ញាអមសាលាដំបូងខេត្តមណ្ឌលគិរីបានបង្ក្រាបបទល្មើសគ្រឿងញៀននៅភូមិ ស្វាយចេក សង្កាត់សុខដុម ក្រុង សែនមនោរម្យ និងឃុំពូជ្រៃ ស្រុកពេជ្រាដា ខេត្តមណ្ឌលគិរី។ ក្នុងការបង្ក្រាបនោះ សមត្ថកិច្ចឃាត់ខ្លួនមនុស្សបាន ១១ នាក់ដែលមាន អាយុចន្លោះពី ១៩ ដល់ ៣៧ ឆ្នាំ។ ក្នុងចំណោម ១១ នាក់នោះមានមុខសញ្ញាសង្ស័យជួញដូរ រក្សាទុកគ្រឿងញៀន ៥ នាក់ និងអ្នកប្រើប្រាស់គ្រឿងញៀនមាន ៦ នាក់។ សមត្ថកិច្ចដកហូតបានសារធាតុញៀនទម្ងន់ជាង ៣ ក្រាម និងកាំភ្លើងកែច្នៃ ១ ដើម។
ដោយឡែក លោក កុយ ហៀង ស្នងការរងទទួលផែនការងារនគរបាលប្រឆាំងគ្រឿងញៀនខេត្តបាត់ដំបងប្រាប់ភ្នំពេញប៉ុស្តិ៍នៅថ្ងៃទី ១២ ឧសភា ថា ឈ្មោះ យី ហេង ភេទស្រី អាយុ ២២ ឆ្នាំ វិត សេង ភេទប្រុស អាយុ ៥៩ ឆ្នាំ ប៊ុន ថុល ហៅ ធួន ភេទ ប្រុស អាយុ ២៧ ឆ្នាំ និង សាន សល់ ភេទស្រី អាយុ ៣៥ ឆ្នាំ ត្រូវបានឃុំខ្លួនក្នុងពន្ធនាគារហើយកាលពីថ្ងៃទី ១០ ឧសភា។
លោកប្រាប់ថា៖ «ជនប្រុសស្រីទាំង ៤ នាក់នោះ ត្រូវបានចៅក្រមស៊ើបសួរសម្រេចចេញដីកាឃុំខ្លួនពួកគេក្នុងពន្ធនាគារហើយបន្ទាប់ពីតំណាងអយ្យការចោទប្រកាន់ពីបទជួញដូរគ្រឿងញៀន»។
លោកបញ្ជាក់ថា ពួកគេទាំង ៤ នាក់ត្រូវបានសមត្ថកិច្ចឃាត់ខ្លួនកាលពីរសៀលថ្ងៃទី ១០ ខែឧសភា ឆ្នាំ ២០២២ ក្នុងបទល្មើសជាក់ស្តែងនៅភូមិបវេល១ ឃុំបវេល ស្រុកបវេល ខេត្តបាត់ដំបង។ ជាមួយគ្នានោះសមត្ថកិច្ចរឹបអូសបានថ្នាំញៀនប្រភេទម៉ាទឹកកកចំនួន ៨ ថង់តូច ទូរស័ព្ទដៃចំនួន ២ គ្រឿង និងថង់សម្រាប់ច្រកថ្នាំញៀនលក់មួយចំនួនទៀត។ រីឯជនសង្ស័យ ២ នាក់ទៀតឃាត់ខ្លួននៅ ភូមិ ថ្នល់បត់ ឃុំអូររំដួល ស្រុកភ្នំព្រឹក និង នៅភូមិអូរចំណិប ឃុំតាស្ដា ស្រុកសំពៅលូន។ សមត្ថកិច្ចដកហូតវត្ថុតាងបានថ្នាំញៀនប្រភេទម៉ាទឹកកកចំនួន ១៨ ថង់តូច ថ្នាំញៀនយ៉ាម៉ាចំនួន ៧៥ ថង់តូច ទូរស័ព្ទដៃ ២ គ្រឿង ជញ្ជីងថ្លឹងថ្នាំញៀនលក់ ១ គ្រឿង និងសម្ភារជក់ថ្នាំញៀនមួយចំនួនទៀត៕