ភ្នំពេញៈ ឯកអគ្គរាជទូតកម្ពុជាប្រចាំប្រទេសកូរ៉េខាងត្បូង លោកស្រី ជ្រឹង បុទុមរង្សី នាថ្ងៃទី ១០ ឧសភា ទទួលបានពានរង្វាន់ឯកអគ្គរាជទូតឆ្នើមប្រចាំឆ្នាំ ២០២២ ពីស្ថាប័ន Korea Consumer Global Council ដែលបានចូលរួមចំណែកយ៉ាងសំខាន់ក្នុងចំណងមិត្តភាព និងកិច្ចសហប្រតិបត្តិការកម្ពុជា-កូរ៉េខាងត្បូង បន្ទាប់ពីបំពេញតួនាទីជាឯកអគ្គរាជទូតអស់រយៈពេល ៧ ខែ។
ស្ថានទូតកម្ពុជាប្រចាំកូរ៉េខាងត្បូងបញ្ជាក់ក្នុងទំព័រហ្វេសប៊ុកនាថ្ងៃទី ១១ ឧសភាថា លោកស្រីទទួលបានពានរង្វាន់ពីស្ថាប័ន Korea Consumer Global Council ដែលជាស្ថាប័នផ្សារភ្ជាប់ទំនាក់ទំនងរវាងបណ្តាអតិថិជន និងបណ្តាក្រុមហ៊ុនតាមរយៈការប្រឹក្សាយោបល់ ដើម្បីជាការទទួលស្គាល់អំពីការចូលរួមចំណែក យ៉ាងសកម្មរបស់លោកស្រីលើវិស័យការទូតផ្តោតលើចំណងមិត្តភាព និងកិច្ចសហប្រតិបត្តិការរវាងកម្ពុជា និងកូរ៉េខាងត្បូង។
លោកស្រី ជ្រឹង បុទុមរង្សី សរសេរលើហ្វេសប៊ុក នាថ្ងៃទី ១១ ឧសភា ថា៖ «នេះជាការលើកទឹកចិត្តមួយដ៏មានតម្លៃដែលសបញ្ជាក់ថា ការខិតខំប្រឹងប្រែងរបស់នាងខ្ញុំក្នុងការបំពេញតួនាទី និងភារកិច្ចបម្រើជាតិ មាតុភូមិ និងបម្រើដល់ផលប្រយោជន៍បងប្អូនខ្មែរយើង ពិតជាមានការគាំទ្រពីភាគីកូរ៉េ ដែលជាម្ចាស់ផ្ទះពិតប្រាកដណាស់»។
លោកស្រីបញ្ជាក់ថា លោកស្រីពុំអាចបំពេញកិច្ចការងារទាំងនេះបានទេ ប្រសិនបើពុំមានការចូលរួម គាំទ្រ និងលើកទឹកចិត្តពីមន្ត្រីរាជការ និងបុគ្គលិកនៃស្ថានទូតកម្ពុជាប្រចាំកូរ៉េខាងត្បូង ព្រមទាំងក្រុមគ្រួសាររបស់លោកស្រីផ្ទាល់រួមទាំងក្តីអាណិតស្រឡាញ់ពីប្រជាពលរដ្ឋខ្មែរដែលរស់នៅ និងធ្វើការនៅប្រទេសកូរ៉េខាងត្បូង។
លោកស្រីឯកអគ្គរាជទូតប្តេជ្ញាខិតខំប្រឹងប្រែងឱ្យអស់ពីសមត្ថភាព ដើម្បីបន្តអនុវត្តតួនាទី និងភារកិច្ចក្នុងនាមជាឯកអគ្គរាជទូតកម្ពុជាប្រចាំកូរ៉េខាងត្បូង ដើម្បីសម្រេចឱ្យបាននូវសមិទ្ធផល និងជោគជ័យថ្មីៗបន្ថែមទៀត ដើម្បីបម្រើផលប្រយោជន៍ និងបុព្វហេតុដល់ប្រទេស និងប្រជាជនកម្ពុជាឱ្យកាន់តែល្អប្រសើរឡើង។ លោកស្រីប្តេជ្ញាជំរុញកិច្ចសហប្រតិបត្តិការទ្វេភាគីរវាងកម្ពុជា និងកូរ៉េខាងត្បូងលើវិស័យការទូត សេដ្ឋកិច្ច ពាណិជ្ជកម្ម វប្បធម៌ និងឧស្សាហកម្ម ទេសចរណ៍នៅក្នុងប្រទេសកម្ពុជា។
មុនត្រូវបានតែងតាំងជាឯកអគ្គរាជទូតកម្ពុជាប្រចាំប្រទេសកូរ៉េខាងត្បូង លោកស្រី ជ្រឹង បុទុមរង្សី គឺជារដ្ឋលេខាធិការនៃក្រសួងការបរទេស និងសហប្រតិបត្តិការអន្តរជាតិ។ លោកស្រីបានចាប់ផ្ដើមការងារដំបូងក្នុងក្របខ័ណ្ឌរដ្ឋាភិបាល កាលពីឆ្នាំ ២០១២ ក្នុងតួនាទីជាអ្នកសម្របសម្រួលថ្នាក់ខេត្តប្រចាំនៅខេត្តកំពតលើការធ្វើសមាហរណកម្មដីធ្លី។ បន្ទាប់មកលោកស្រីបានទទួលតួនាទីជាអនុរដ្ឋលេខាធិការក្រសួងប្រៃសណីយ៍ និងទូរគមនាគមន៍ និងក្រសួងការបរទេស និងសហប្រតិបត្តិការអន្តរជាតិ។
ក្នុងបទសម្ភាសជាមួយភ្នំពេញប៉ុស្តិ៍ពីខែកញ្ញា ឆ្នាំ ២០២១ មុនចាកចេញពីកម្ពុជា លោកស្រីថ្លែងថាក្នុងតួនាទីជាឯកអគ្គរាជទូត លោកស្រីមានគោលបំណងពង្រឹងទំនាក់ទំនងទ្វេភាគីរវាងប្រទេសទាំង ២។
សហប្រធានស្ថាប័ន Korea Consumer Global Council លោកស្រី Yoon Jeong-Yeon និងលោកស្រី Cho Eun-Young បញ្ជាក់ថា លោកស្រី ជ្រឹង បុទុមរង្សី បានខិតខំប្រឹងប្រែងលើកកម្ពស់ទំនាក់ទំនងទ្វេភាគីរវាងកូរ៉េ និងកម្ពុជា និងត្រូវបានគេរំពឹងថានឹងនាំមកនូវសមិទ្ធផលការទូតដ៏ច្រើនសន្ធឹកសន្ធាប់បន្ថែមទៀត សម្រាប់ប្រទេសទាំង ២ មិនត្រឹមតែក្នុងវិស័យការទូតប៉ុណ្ណោះទេ ប៉ុន្តែថែមទាំងក្នុងវិស័យកិច្ចសហប្រតិបត្តិការសេដ្ឋកិច្ច និងឧស្សាហកម្មរវាងកូរ៉េ និងកម្ពុជាក្នុងប៉ុន្មានឆ្នាំខាងមុខនេះ។
លោកស្រីសហប្រធានទាំង ២ បញ្ជាក់ថា៖ «ក្នុងការទទួលស្គាល់ ការរួមចំណែក ខាងការទូតដ៏ល្អឥតខ្ចោះរបស់លោកជំទាវ ចំពោះទំនាក់ទំនងមិត្តភាព និងកិច្ចសហប្រតិបត្តិការរវាងប្រទេសទាំង ២ Korea Consumer Global Council សូមប្រគល់ពានរង្វាន់ឯកអគ្គរាជទូតឆ្នើមប្រចាំ ២០២២ជូនចំពោះលោកជំទាវ»។
កាលពីខែមីនា ឆ្នាំ ២០២១ លោក ឡុង ឌីម៉ង់ អតីតឯកអគ្គរាជទូតកម្ពុជាប្រចាំកូរ៉េខាងត្បូងទទួលបានពានរង្វាន់ឯកអគ្គរាជទូតឆ្នើមប្រចាំឆ្នាំ ២០២១ ពីសមាគមទូតមិត្តភាពវប្បធម៌កូរ៉េ (Korea Ambassador Culture Friendship Association) ដែលបានរួមចំណែកដល់ការពង្រឹងចំណងទំនាក់ទំនងសេដ្ឋកិច្ច និងវប្បធម៌រវាងកម្ពុជា និងកូរ៉េខាងត្បូង៕